«NN» datelefanavałasia da Ervina Rota, ekśpierta, jaki daśleduje akaličnaści pajezdki Alaksandra Łukašenki ŭ Alpy ŭ 2002 hodzie. Rot padkreślivaje, što skandał vyklikaŭ nie stolki sam fakt vizitu biełaruskaha kiraŭnika, kolki toje, što aŭstryjski bok pajšoŭ na vidavočnyja machinacyi, kab jaho arhanizavać.
Ervin Rot
«NN»: Jak Vy zdoleli sabrać hetyja dakumienty?
Ervin Rot: Ja ŭžo 30 hod pracuju spartovym žurnalistam, i, jak kažuć aŭstryjcy, dobra viedaju, jak biehaje zajac. Ja vypadkova natrapiŭ na paviedamleńnie presavaha ahienctva APA ad 18 sakavika 2002 h. pra vizit Alaksandra Łukašenki, a taksama pračytaŭ materyjały revizii NAK Aŭstryi ŭ časopisie «Profil». Ja praanalizavaŭ abiedźvie publikacyi, i, fihuralna kažučy, spajmaŭ zajca za chvost. Nu i pačaŭ razbłytvać hety kłubok.
«NN»: Jak Vy ličycie, čym było zaprašeńnie Alaksandra Łukašenki ŭ Alpy dla aŭstryjskich arhanizataraŭ vizitu — pośpiecham ci marnavańniem hrošaj?
ER: Pra heta mierkavać ciažka, ja hetym pytańniem nie zajmaŭsia. Casinos Austria, nakolki ja viedaju, nie zaklučyła nijakaha pahadnieńnia ź biełaruskim bokam. Ale kali pahladzieć na ŭsio z šyrokaj pierśpiektyvy, to zaprašeńnie, mahčyma, było całkam paśpiachovym. Aŭstryjskija manapalisty sa śfiery azartnych hulniaŭ cikaviacca doŭhaterminovymi pierśpiektyvami vychadu na novyja rynki. Dziakujučy vizitu Alaksandra Łukašenki ich imidž, u lubym razie, palepšyŭsia.
«NN»: Ale ci jość pramyja dokazy taho, što hetyja hrošy sapraŭdy niepasredna vydatkoŭvalisia na adpačynak kiraŭnika Biełarusi?
ER: Jaho imia staić na kvitancyjach. Na łyžnym kurorcie Zejefield u Tyroli jość piacizorkavy hatel Klosterbrau (u hetym miastečku, darečy, taksama jość kazino, jakoje naležyć kampanii Casinos Austria). I tam, naprykład, u śpisie naviednikaŭ staić imia prezidenta Łukašenki. Bolš za toje, u hateli jość kniha naviednikaŭ, i prezident Łukašenka zrabiŭ u joj asabisty zapis. Jon byŭ tam, sa svaimi synami, z raznastajnymi nabližanymi asobami ŭ składzie vialikaj delehacyi.
«NN»: Što Vy možacie skazać pra vydatki na pryjom kiraŭnika Biełarusi?
ER: Vydatkoŭvać na pryjom takoj delehacyi kala 200 000 jeŭra — heta ŭžo dosyć niezvyčajna. U vydatki, naprykład, byŭ uklučany pryvatny avijapieralot pamiž Vienaj i Insbrukam. Na adpačynku spadar Łukašenka atrymaŭ traŭmu ŭ časie katańnia na łyžach, i jaho daviałosia na viertalocie vyvozić z hornaha schiłu. Hetyja vydatki taksama byli apłačanyja aŭstryjskim bokam. Heta byŭ ščodry pryjom.
Ale chaču padkreślić, što, kali kazać pra vašaha prezidenta, to dla jaho heta była prosta zvyčajnaja pajezdka. A voś što vyklikała rezanans u Aŭstryi, dyk heta toje, što aŭstryjski bok apłačvaŭ jaje, karystajučysia patajemnaj buchhałteryjaj, bieskantrolna. Spadara Łukašenku možna było zaprasić pryvatna, ale, vidavočna, aŭstryjskija arhanizatary pajezdki chacieli niešta prychavać. Choć heta vielmi niezvyčajna, što takaja arhanizacyja, jak Nacyjanalny alimpijski kamitet Aŭstryi, vydatkoŭvaje bolš za 200 000 jeŭra za vizit, da jakoha sam NAK, pa sutnaści, nie maje nijakaha dačynieńnia. Bo padrychtoŭku pajezdki ździajśniaŭ nie NAK Aŭstryi, a dyrektar Casinos Austria spadar Škof. Hrošy prosta pravodzilisia praz rachunak aŭstryjskaha NAK, kab schavać hety fakt. A heta ŭ našaj krainie ŭ vysokaj stupieni supraćzakonna.
«NN»: Ale čamu aŭstryjcam spatrebiłasia takaja schiema?
ER: Vakoł NAK Aŭstryi ŭžo doŭhi čas vyśpiavaje skandał, źviazany ź niezaležnaj (u dvukośsi) kamisijaj, jakaja pravodziła reviziju hetaj struktury. Hetaja kamisija zrabiła vysnovu, nibyta Lea Valner, jaki ŭ toj čas byŭ prezidentam NAK Aŭstryi, ničoha nie viedaŭ pra machinacyi. A ja chacieŭ na asnovie infarmacyi pra hety vizit davieści, što Valner byŭ vielmi hłyboka ŭciahnuty ŭ hetyja spravy, što jon asabista byŭ inicyjataram zaprašeńnia i što mienavita jon vyrašyŭ pravodzić hrošy pa‑za aficyjnaj buchhałteryjaj.
«NN»: A jak Vy asabista staviciesia da taho, što ŭ naš čas biznes, sport i palityka ŭsio bolš i bolš pieraplatajucca?
ER: Hetaja suviaź nie viadzie da dabra. Zaprašać Alaksandra Łukašenku va ŭmovach, kali dziejničała pastanova ES, jakaja nie dazvalała mieć ź im spravy na aficyjnym uzroŭni ni dziaržavam Jeŭrasajuza, ni ich aficyjnym pradstaŭnikam, — na heta hramadskaść Aŭstryi pahla¬dzieła b vielmi krytyčna. Tamu Lea Valner, vidavočna, chacieŭ zachavać u tajamnicy toje, što jon źbirajecca sustrecca sa spadarom Łukašenkam.
