Ministerstva kultury Biełarusi nakiravała ŭ Hrodzienski harvykankam list pra nieabchodnaść prypynieńnia pracaŭ, jakija mohuć pryvieści da źniščeńnia adnaho z budynkaŭ u starym centry Hrodna. Pavodle dakumienta za podpisam namieśnika ministra Uładzimira Hradziuška, pytańnie ab nadańni hetamu domu statusa historyka-kulturnaj kaštoŭnaści bližejšym časam budzie vyniesieny na razhlad Biełaruskaj navukova-mietadyčnaj Rady pa pytańniach historyka-kulturnaj spadčyny. Heta aznačaje, što «miascovy vykanaŭčy orhan pavinien pryniać zachady ŭ spravie pieraškodaŭ pryčynieńniu škody dadzienaj pabudovie».
Historyk architektury Ihar Trusaŭ raspavioŭ, što dom na vulicy Horkaha, pra jaki idzie havorka ŭ liście Ministerstva kultury, byŭ pabudavany ŭ styli kanstruktyvizmu ŭ 20-ch hadach minułaha stahodździa. Takich budynkaŭ u Hrodnie zastałosia mienš za dziesiatak.
Hrodzienskija historyki sprabavali vyratavać stary dom, ale miascovyja ŭłady ŭžo inicyjavali pačatak razbureńnia cełaha kvartału pad nazvaj «Załataja horka» dla pabudovy tam haścinična-spartovaha kompleksu. Volha Čajčyc z respublikanskaj historyka-krajaznaŭčaj arhanizacyi raspaviała, što moładź z Hrodna i Minsku źbirała podpisy hrodziencaŭ u abaronu doma, a historyki nieadnarazova źviartalisia pa instancyjach. Jany namahalisia spynić źniščeńnie hrodzienskich pamiatak daŭniny pad vyhladam «rekanstrukcyi».
Histaryčny centr Hrodna z 1988 hodu znachodzicca pad achovaj dziaržavy. Pavodle śviedčańniaŭ historykaŭ, kolkaść pomnikaŭ architektury ŭ hetym horadzie pieravyšaje kolkaść architekturnych pomnikaŭ va ŭsich inšych haradach Biełarusi.
U apošnija hady miascovyja ŭłady pravodziać rekanstrukcyju centra Hrodna z hrubiejšymi parušeńniami dziejnaha zakanadaŭstva.
Jeŭrapiejskaje radyjo dla Biełarusi paviedamlała pra toje, jak padčas rekanstrukcyi staroj płoščy ŭ Hrodnie zamiest praviadzieńnia archieałahičnych daśledavańniaŭ byŭ źniščany kulturny płast ziamli na vialikaj terytoryi, a hleba z płoščy vyvozicca chaatyčna. U advałach ziamli historyki znachodzili biascennyja znachodki, jakija śviedčać pra minułaje Hrodna.
Ciapier, paśla abnarodvańnia lista Ministerstva kultury ŭ Hrodzienski harvykankam źjaviłasia nadzieja na toje, što biazdumnaje źniščeńnie pomnikaŭ historyi i kultury ŭ Hrodnie budzie prypynienaje. U kastryčniku na pasiedžańni Biełaruskaj navukova-mietadyčnaj Rady pa pytańniach historyka-kulturnaj spadčyny płanujecca razhledzieć pytańnie pra rekanstrukcyju histaryčnaha centru horadu. Ale, pavodle słovaŭ hrodzienskaha historyka Andreja Vaškieviča, radavacca rana, tamu što na čarzie staić pytańnie ab znosie staražytnaha domu pa vulicy Kalučynskaj u starym centry. Dziaržaŭnaja hazieta «Hrodzienskaja praŭda» ŭžo apublikavała list haradžanina, jaki prapanuje źnieści hety dom. Pad znos vyznačanyja i inšyja damy ŭ histaryčnym centry, i za ich historykam jašče daviadziecca vieści baraćbu.
Cikava, što haradski tualet, jaki na praciahu mnohich hadoŭ mieściŭsia ŭ Hrodnie nasuprać Farnaha kaścioła, tak i nie źnieśli. Chacia ŭłady abiacali jaho prybrać adrazu paśla rekanstrukcyi Savieckaj płoščy.
❏
Hladzi jašče:
U Horadni pad pahrozaj znosu ceły histaryčny kvartał — «Novy Śviet»
