Dziaržaŭnaja mašyna pracuje niakidka, ale metadyčna. Voś padcyravali vybarčaje zakanadaŭstva, miarkujuć borździeńka prahnać prajekt praz parlament na pačatku vosieńskaj sesii. Apazycyju ščylniej abkładajuć čyrvonymi ściažkami. Heta tyčycca vyłučeńnia naziralnikaŭ, sustrečaŭ z vybarščykami, vykarystańnia zamiežnych srodkaŭ... Nieŭprykmiet šlifujecca artykuł za artykułam. Kantora piša!
Dzivić nia heta, a anemičnaja reakcyja apanentaŭ ułady. Adzin lider prazorliva deklaruje, što "ŭłada baicca praniknieńnia niepažadanych elementaŭ u miascovyja saviety". Inšy, jakoha ličać hałoŭnym kankurentam pieršaha, kaža, što "nam absalutna ŭsio adno", bo "iość namier vykarystać vybarčuju kampaniju dla vyrašeńnia svaich zadačaŭ".
Ale ž prakrustaŭ łožak jurydyčnych navełaŭ rychtujecca nia tolki pad "małaznačnyja" miascovyja, a pad usie nastupnyja vybary! Pra demakratyzacyju vybarčaha zakanadaŭstva daŭno dziaŭbie Eŭropa. Pad hetym lozunham haładali pazaletaś deputaty z hrupy "Respublika". I voś finał: "nam absalutna ŭsio adno"! Za što zmahalisia, panovie revalucyjanery?
Vožyku zrazumieła, što demakratyčnyja papraŭki nie prapuściać. Ale ž siońnia u Domie ŭradu mohuć skazać, što nam ničoha i nie prapanoŭvali...
Palityka na 99% składajecca ź pijaru. Apanenty ŭłady navat svaje ścipłyja mahčymaści ŭ hetaj halinie vykarystoŭvajuć u lepšym vypadku z kaeficyjentam karysnaha dziejańnia paravoza.
Na dumku palitolaha Valera Karbaleviča, apazycyi nie staje chutkaj i daścipnaj reakcyi ŭ tych vypadkach, kali ŭłada siadaje ŭ łužynu. A takich vypadkaŭ, kaža ekspert, za apošnija miesiacy było bahata. Naprykład, zavał na "Biełaruśkalii" paśla taho jak "naviersie" vyrašyli handlavać uhnajeńniami biez prylipałaŭ-pasiarednikaŭ... (zusim pa Švejku: usio išło dobra, pakul nie ŭmiašaŭsia hieneralny štab). Ci niadaŭniaja našumiełaja bojka ŭ elektryčcy, kali "vartavyja pravaparadku", nadta krutyja suprać padletkaŭ sa značkami, vyjavili poŭnuju biezdapamožnaść... U takich vypadkach daścipnyja kamentary z vusnaŭ lideraŭ apazycyi mahli b mieć šyroki rozhałas navat siarod apalityčnaj publiki.
Toje ž tyčycca i źmienaŭ ŭ vybarčaje zakanadaŭstva. Tut ułada dała machu. Raniej było tabu (maŭlaŭ, niedarečy čapać zakony pierad čarhovaj kampanijaj), ciapier ža CVK hatovy pierašychtavacca na maršy (naturalna, treba ž chacia b z zakonu ab prezydencie vykraślić niedahlad – zhadku pra limit dvuch terminaŭ!). Na dumku jurysta i pravaabaroncy Michaiła Pastuchova, ciapierašniaje varušeńnie zakanadaŭcaŭ možna było b skarystać dziela prapahandy demakratyčnych źmienaŭ u Vybarčy kodeks. U apazycyjnych štabach daŭno majucca adpaviednyja napracoŭki. Adno što pryhoža ich spakavać – u pramym i pieranosnym sensie – dy pad blicami fotareparteraŭ zanieści na paštamt ci da dźviarej Domu uradu. Chaj tady ŭłada tłumačyć, čamu joj hetyja papraŭki nie pad nos.
Adnak apazycyja słaba reahuje na kankretyku, na toje, što žurnalisty nazyvajuć infarmacyjnymi padstavami. Praściej, viadoma, rabić adozvy pa starych trafaretach. Taksama – kantora piša.
