16 vieraśnia mienskija haradzkija ŭłady dazvolili praviadzieńnie na płoščy Banhałor mitynhu j kancertu, jaki arhanizatary nazyvajuć «Vialikim džynsavym festam». Pra akcyju, što maje adbycca, padrabiazna raspaviadaje karespandentu Euramost.org adzin z arhanizataraŭ akcyi, zastupnik staršyni Partyi BNF Viktar Ivaškievič.
– Značycca, dazvoł na praviadzieńnie akcyi ŭsio-tki atrymali...
– Tak, majem dazvoł na praviadzieńnie mitynhu i kancertu, ale, da žalu, zabaranili šeście, a heta, jak my ŭvažajem, procizakonna. Bo pavodle zakonu my majem prava pierajnačvać farmat. I kali zbor ludziej nasamreč nielha pravodzić u 200-ch metrach ad metro i padziemnych pierachodaŭ (my chacieli byli pravieści zbor la kinateatru «Kastryčnik»), dyk ułady musili byli prapanavać nam inšy maršrut. My jašče budziem asprečvać hetaje rašeńnie, ale ciapier pastanavili, što pakul niama racyi iści na kanflikt, a niesankcyjavanych akcyjaŭ ładzić nia budziem. Tamu zbor ludziej maje adbycca 16 vieraśnia a 16:00 na płoščy Banhałor, dzie da 20:00 projduć dazvolenyja mitynh i kancert. Tam biaruć udzieł pradstaŭniki ŭsich apazycyjnych partyjaŭ – jak tyja, chto ŭvachodzić u šyrokuju demakratyčnuju kaalicyju, tak i pradstaŭniki Biełaruskaj sacyjał-demakratyčnaj partyi (Hramada) i hramadzkich abjadnańniaŭ. I adrozna ad žnivieńskaj akcyi «Pieśni svabody», dzie byŭ tolki kancert, zaraz, chaču padkreślić, budzie dazvoleny mitynh.
– Jakimi inšymi navinkami paradujecie?
– Akcyja 16 vieraśnia pavodle svajho źmiestu budzie niezvyčajnaj akcyjaj. Naprykład, na kancercie, biezumoŭna, biaruć udzieł viadomyja ŭsim rok-hurty (znoŭ-tki ŭ niezvyčajnaj formie), ale, zbolšaha, na sud słuchačoŭ prezentujuć siabie maładyja, mała kamu viadomyja vykanaŭcy. Toje ž samaje i z vystupoŭcami na mitynhu – ludzi pačujuć nia tolki viadomych palitykaŭ, ale i całkam novyja imiony. Abiacaju, što budzie bahata siurpryzaŭ. Ale hałoŭnaje dla nas u praviadzieńni hetaj akcyi – zaprašeńnie ŭ demakratyčnyja šerahi novych ludziej, jakija pryjduć na mierapryjemstva nia prosta jak słuchačy, ale i jak patencyjnyja aktyŭnyja dziejačy, tamu što nie za harami kampanija ŭ miascovyja vybary. Kab heta zrabić, tych siłaŭ, jakich siońnia majem, niedastatkova.
– Ci nie zasmučvaje vas, što ŭžo zanadta lohka haradzkija ŭłady dali «dabro» na praviadzieńnie mitynhu?
– Na fonie ŭsieahulnaj niedazvolenaści padobnych mierapryjemstvaŭ u rehijonach heta sapraŭdy vyhladaje niezvyčajna, ale, na moj pohlad, šyroki rozhałas pra akcyju adyhraŭ svaju rolu. Upeŭnieny, što niedazvoł pryvioŭ by da niesankcyjavanaha mierapryjemstva i mažlivych sutyčak. Napeŭna, tamu ŭłady vyrašyli nie rabić admoŭnaje karcinki (uniknuć jaje ŭsio adno nia zdoleli b) i pravieści ŭsio lubamirna. U rehijonach inšaja sytuacyja – tam, kali mierapryjemstva zabaranili b, na vulicu naŭrad ci chto vyjšaŭ by.
– Na vaš pahlad, kolki čałaviek moža pryjści na płošču?
– Pavodle zakanadaŭstva, akcyja raźličanaja na kolkaść da tysiačy čałaviek. Ja nie mahu skazać peŭna, kolki čałaviek moža być, ale, miarkuju, narodu budzie bolš, čym 25 žniŭnia padčas akcyi «Pieśni svabody».
– Padčas akcyi 25 žniŭnia byli prablemy praz toje, što moładź vymała tak zvanuju niezarehistravanuju symboliku – bieł-čyrvona-biełyja ściahi...
– Ja zaklikaŭ i zaklikaju ŭsich ludziej, jakija maniacca pryjści na płošču Banhałor, pa-pieršaje, pažadana prychodzić u džynsavaj vopratcy, pa-druhoje, mieć z saboju bieł-čyrvona-biełyja, tak by mović, detali – ot takoha koleru kvietki, takija parasony, stužki i h.d. Heta nia jość niezarehistravanaja symbolika. Kaniečnie, mohuć być niejkija inšyja kanflikty ź milicyjaj, ale, miarkuju, my hetyja pytańni budziem vyrašać. Samaje vialikaje, što mohuć zrabić nam na złość, – vymknuć elektraenerhiju padčas kancertu. Ale, treba skazać, što na minułych mierapryjemstvach vystupali i biez stacyjanarnaha padłučeńnia enerhii.
– Jak źbirajeciesia pieracinać mažlivyja pravakacyi?
– U nas budzie družyna, jakaja zojmiecca hetym admysłova. Naprykład, raśpićcio alkaholnych napojaŭ na terytoryi mitynhu budzie pieracinacca. Kali niechta pačnie chulihanić, našyja družyńniki taksama buduć skručvać i pieradavać takich dziejačoŭ milicyjantam. Choć ja nia dumaju, što na akcyi niechta źbirajecca ładzić niejkija metanakiravanyja pravakacyi. Heta mahło b być, kali b mierapryjemstva zabaranili, ale, na moj pahlad, sama milicyja nia duža žadaje nahružać siabie lišniaj rabotaj. Luby čynoŭnik žadaje atrymlivać maksymalnyja hrošy za minimalnyja vydatki na pracu. A pravakacyi – heta ž dadatkovaja praca.
– Raniej było šyroka razreklamavana, što zbor ludziej mieŭsia adbycca la kinateatru «Kastryčnik», ciapier infarmacyja źmianiłasia. Ci nie vyklučajecie taho, što ludzi ŭsio ž pryjduć da «Kastryčnika» i pačnucca nieparazumieńni?
– Nie vyklučaju, tamu i źviartajusia da ŭsich – zbor a 16:00 na płoščy Barhałor. Ź Mienharvykankamam mieli damoŭlenaść, što my terminova paviedamim pra heta ludziam, choć nichto nia moža dać harantyi, što dzieści chtości i nie źbiarecca. My ž robim usio mažlivaje, kab akcyja prajšła arhanizavana.
