Italjanskaja palicyja abjaviła ŭ vyšuk 10-hadovuju biełarusku Viku – vychavanku dziciačaha domu ŭ Biełarusi. U Italii Vika znachodziłasia na azdaraŭleńni ŭ italjanskaj siamji ŭ Kahaleta pad Hienujaj. Dziaŭčynka pahražaje, što skončyć žyćcio samahubstvam, kali jaje adpraviać u Biełaruś. Za dziaŭčynku zastupiłasia italjanskaja siamja, jakaja praz sud sprabavała praciahnuć jaje znachodžańnie ŭ Italii.
Italjanski sud pastanaviŭ, što ŭ vieraśni dziaŭčynku pavinny ahledzieć biełaruskija dy italjanskija daktary. Potym, paśla harantyjaŭ jaje budučaj biaśpieki, jaje nieabchodna adpravić u Biełaruś.
Pavodle advakata, italjanskija daktary ŭstanavili, što 10-hadovaja Vika ŭ biełaruskim dziciačym domie pieražyła maralnuju, fizyčnuju i seksualnuju źniavahu. Italjancy Maryja Kjara Barnočyn i Alesandra Hvista schavali dzicia. Jany zajaŭlajuć, što nie atrymali dastatkovych dokazaŭ i harantyjaŭ maralnaj i fizyčnaj biaśpieki dziaŭčynki. Pavodle italjancaŭ, Vika pahražaje skončyć žyćcio samahubstvam, kali jaje adpraviać nazad u Biełaruś.
Ciapier ambasadar Biełarusi ŭ Italii Alaksiej Skrypko znachodzicca ŭ Hienui, dzie mieścicca prakuratura i sud u spravach niepaŭnaletnich. Ci ŭdałosia znajści Viku?
(Skrypko:) «Pakul nie. Jaje naŭmysna chavaje italjanskaja siamja. My ažyćciaŭlajem usie nieabchodnyja dziejańni ŭ poŭnym supracoŭnictvie z kampetentnymi italjanskimi orhanami j siłami pravaparadku dziela maksymalna chutkaha pošuku i viartańnia ŭ Biełaruś dziaŭčynki. U hety momant jaje pakul jašče nie znajšli».
Zajavu italjanskaj siamji, što dziaŭčynka pahražaje skončyć samahubstvam, kali jaje adpraviać u Biełaruś, ambasadar Skrypko prakamentavaŭ tak:
(Skrypko:) «Hetaje ćvierdžańnie italjanskaj siamji, jakoje my abaviazkova pravierym i abaviazkova praviadziem maksymalna hłybokaje raśśledavańnie abstavinaŭ, jakija zrabilisia padstavaj dla takich ćvierdžańniaŭ. I takija dziejańni ŭžo pravodziacca».
Ambasadar Skrypko jašče nie atrymaŭ aficyjnych papieraŭ adnosna zajavy italjanskaha boku – pra toje, što 10-hadovaja Vika ŭ biełaruskim dziciačym domie spaznała maralnuju, fizyčnuju i seksualnuju źniavahu. Maŭlaŭ, biełaruskija dyplamaty nia majuć kantaktu ź niepaŭnaletniaj dla pravierki hetaj infarmacyi. Ale ci dazvolić biełaruski bok padoŭžyć znachodžańnie dziaŭčynki ŭ italjanskaj siamji?
(Skrypko:) «My nia možam pahadzicca ź siamjoj, jakaja parušaje nia tolki mižnarodny pravaparadak, ale i zakonnaść svajoj krainy. Italjanski sud u spravach niepaŭnaletnich pastanaviŭ znajści j viarnuć hetuju dziaŭčynku ŭ Respubliku Biełaruś, i z 8 vieraśnia hetaja pastanova parušajecca italjanskim bokam. Tym bolš ichnyja dziejańni padpadajuć pad kryminalnaje złačynstva – vykradańnie niepaŭnaletnich».
Tym časam italjancy hatovyja pravieści demanstracyju ŭ padtrymku biełaruskaj dziaŭčynki, jakaja žadaje zastacca ŭ Italii.
