Biełkaapsajuz pravodzić pieramovy ab eksparcie čarnic u Italiju, Hiermaniju i Kitaj u 2010 hodzie, paviedamiła na pres‑kanfierencyi 1 lipienia ŭ Minsku načalnik upraŭleńnia narychtovak sajuza Aksana Skinder.
«Čarnicy źjaŭlajucca važkaj pazicyjaj ekspartu. Pavodle infarmacyi zamiežnych krynic, biełaruskija čarnicy ŭtrymlivajuć bolš karysnych rečyvaŭ, čym ukrainskija. Heta paćvierdžana łabaratornymi daśledavańniami», — skazała Skinder.
Jana paviedamiła, što letaś u Kitaj była pastaŭlena partyja čarnic, jakaja vykarystana farmaceŭtyčnaj pramysłovaściu. Značny abjom ekspartu prypadaje na krainy Bałtyi. U 2010 hodzie ŭsiaho za miažu było pastaŭlena 4 tysiačy ton čarnic.
Śpiecyjalist adznačyła, što jeŭrapiejskija krainy pakul nie vyznačylisia z canoj zakupki na čarnicy. «My spadziajemsia, što ceny buduć vyznačany na nastupnym tydni. U suviazi z nastupstvami pavodki ŭ Polščy my prahnazujem, što biełaruskaja jahada budzie zapatrabavanaja. My pakul zajmajem pazicyju čakańnia», — rastłumačyła Skinder.
Pavodle infarmacyi Biełkaapsajuza, za studzień—maj 2010 hoda na ekspart było pastaŭlena pradukcyi na 18,4 młn. dołaraŭ, što na 30,1% bolš, čym za anałahičny pieryjad minułaha hoda. Stanoŭčaje salda źniešniaha handlu skłała 11,5 młn. dołaraŭ.
