268 biełaruskich studentaŭ, jakija z červienia znachodziacca ŭ Polščy, byli raźmierkavanyja ŭ sieradu na dalejšaje navučańnie. Niekatoryja ź ich trapili nia ŭ tyja ŭniversytety i nie na tyja specyjalnaści, jakija jany paznačali ŭ svaich ankietach. Artura, jaki ŭ Biełarusi vyvučaŭ infarmatyku, u Polščy adpravili na metalurhiju. Volhu, jakaja da hetaha try hady vyvučała PR, raźmierkavali na palitalohiju.
Kala 80 niezadavolenych studentaŭ pratestavali ŭ ofisie «Studium Europy Wschodniej» u Varšaŭskim universytecie, što zajmajecca kaardynacyjaj prahramy. «Nam dazvolili abrać kirunki i harady. Ale ŭ vyniku ničoha nia ŭličyli. Ja nie vybirała Žešuv, a ciapier pavinna tam vučycca», – kaža Kaciaryna Tamkovič.
Raźmierkavańniem biełaruskich studentaŭ va ŭniversytety zajmaŭsia dyrektar «Studium Europy Wschodniej» u Varšaŭskim universytecie Jan Malicki i dva jahonyja supracoŭniki. Usiu hetuju mituśniu jany tłumačać asnoŭnym čynam pamyłkami ŭ pierakładzie nazvaŭ kirunkaŭ navučańnia ŭ ankietach.
Jan Malicki ŭčora abvieściŭ, što pierapravieryć raźmierkavańni. «Małyja harady i pryvatnyja ŭniversytety byli vyklučanyja z prahramy. Studenty buduć navučacca ŭ dziaržaŭnych VNU ŭ vialikich haradach», – paviedamiŭ jon. Kala 30 ź ich zaprosiać na hutarku, kab vyśvietlić zroblenyja pamyłki. Malicki kaža, što stypendyjalnaja prahrama realizujecca słušna, i darma biełaruskija studenty, «zamiest taho, kab z entuzijazmam vyvučać polskuju movu, z entuzijazmam akupavali instytut».
Na ŭčorašniaj kanferencyi prysutničaŭ Alaksandar Milinkievič. Jon paviedamiŭ karespandentu: "My ŭdziačnyja Polščy. Praŭda, brakavała spakojnaha dyjalohu sa studentami. Heta maładyja ludzi, što doŭha znachodziacca pa-za domam i navat dobra nia viedajuć polskaj movy. Nielha kapryźničać pry vybary navučalnaj ustanovy, ale ciažka nie pahadzicca, što jany musiać mieć ujaŭleńnie pra toje, što buduć vyvučać Kryteryi raźmierkavańnia nie byli prafesijna apracavanyja".
Michał Dvorčyk, daradca premjera: «U nas nie było šmat času na arhanizacyju prahramy, my dziejničali spantanna, kab pryniać biełarusaŭ užo ciapier.
U miežach stypendyi studenty atrymoŭvajuć miesca ŭ polskich navučalnych ustanovach, miesca ŭ internacie i 1240 złotych štomiesiac (kala 400 dalaraŭ).
