Sajuznaja dziaržava, na dumku Łukašenki, moža budavacca tolki na ŭmovach roŭnaści miž dźviuma krainami. Vidać, u śviatle apošnich mytnych skandałaŭ ź biełaruskimi tavarami prahučała zajava ab adkrytaści miežaŭ.
Biełaruś nikoli nia ŭvojdzie ŭ skład Rasiei huberniaj ci akruhaj, u čarhovy raz zajaviŭ Łukašenka.
Biełaruski lider nia bačyć prablemy ŭ tym, što ŭ sajuznaj dziaržavy niama svajho lidera, bo na dadzieny momant jon i nie patrebien. Takim čynam, sajuznaha prezydenta nia budzie.
Možna było čakać, što pierad pradstaŭnikami rasiejskich ŚMI Łukašenka jašče raz zaśviedčyć svajo pryncypovaje žadańnie budavać sajuznaju dziaržavu i abvinavacić Kreml, što mienavita jon tarmozić intehracyju bratnich narodaŭ. Adnak havorka pajšła inšym čynam.
Łukašenka iznoŭ pajšoŭ na šantaž rasiejskaha boku ŭ hazavym pytańni. Jon adznačyŭ, što kali Rasieja pojdzie na padvyšeńnie koštaŭ na błakitnaje paliva, to heta adnaznačna aznačaje razryŭ usich ekanamičnych adnosinaŭ miž našymi krainami. Łukašenka papiaredžvaje rasiejski bok, što ŭ praciŭnym vypadku jon moža pajści na bolš ščylnaje supracoŭnictva z Eŭraźviazam.
Kiraŭnik Biełarusi zapeŭniŭ, što nie źbirajecca pradavać rasiejcam «Biełtranshaz» za 300 miljonaŭ dalaraŭ. Voś, kab jany prapanavali 2 miljardy, Łukašenka, mahčyma, i padumaŭ by. Bo ŭ praciŭnym vypadku jamu pahražaje «turma». I ŭpieršyniu jon adkryta, choć i hipatetyčna zajaviŭ, što akcyi «Biełtranshazu» mohuć być pradadzienyja nie rasiejcam, a treciamu boku, a kankretna -- amerykancam.
U paryvie zachapleńnia kiraŭnik dziaržavy vyhuknuŭ na rasiejski bok: «Vy stracicie svajho adzinaha sajuźnika, vy prosta zhańbicie siabie».
Łukašenka vystupaje ŭ roli prahnazoŭcy, kali kaža, što na bližejšyja hady budaŭnictva sajuza budzie prytarmožana ŭ suviazi z vybarčymi kampanijami ŭ Rasiei.
Pryniaćcio kanstytucyjnaha aktu sajuznaj dziaržavy Łukašenka iznoŭ adkłaŭ na «śviatoje nikoli», bo «Rasieja nia choča i nie hatova iści na bolš surjoznyja adnosiny ŭ sajuznym budaŭnictvie». Jon paraiŭ adkryć kanstytucyjnuju damovu i pačytać, a paśla ubačyć, chto i što tam tarmozić.
Prahučała taksama zajava ab farmavańni novaj siabroŭskaj duhi Biełarusi, jakuju składuć Venesueła, Paŭdniovaja Afryka, Małajzija, Vijetnam, Kitaj i arabskija krainy.
Razam z tym prahučali patetyčnyja zajavy, kštałtu taho što biełarusy hatovy pamirać za Rasieju, kali spatrebicca. Łukašenka jašče raz vystupiŭ u abaronu iranskaj jadziernaj prahramy. Jon čarhovy raz vystupiŭ suprać daminavańnia biełaruskaj movy nad rasiejskaj i ŭpeŭniŭ, što nie źbirajecca stvarać partyju ŭłady.
U cełym vystup prajšoŭ u klasyčnaj stylistycy staranna padrychtavanaha ekspromtu.
