Adkazvaje pastar carkvy «Novaje žyćcio» Viačasłaŭ Hančarenka
My stvaryli novy termin – post-haładoŭka. My nie padzialajem paasobku post i haładoŭku. Dla nas jak chryścijanaŭ prostaja haładoŭka nie zusim adpaviadaje našym patrabavańniam. Post dazvalaje nam być pačutymi Boham. Haładoŭka dazvalaje być pačutymi ludźmi. Pahetamu my abjadnali dvpa hetyja paniatki ŭ adzin. My chočam być pačutyja Boham i ludźmi. My adnačasova znachodzimsia ŭ paście i ŭ haładoŭcy.
Tak, nam lepiej skazać: «My ŭ paście jak chryścijanie». Ale hety paniatak nie danosić ludziam sutnaść našaha rašeńnia. Pieravažna ludzi majuć śvieckaje ŭsprymańnie pasta. Post u hetym razumieńni nie ŭsprymajecca, jak poŭnaja admova ad ježy, jak heta praktykujem my. Taksama, post nie asacyjujecca z pratestam. My nie mahli abvieścić hetuju akcyju tolki haładoŭkaj. Sprava ŭ tym, što my možam pryciahnuć uvahu i hramadzkaści, i ŭradu, ale niama harantyjaŭ, što našaje pytańnie budzie vyrašanaje aptymalna. Pahetamu post havoryć ab tym, što my ŭskładajem nadzieju na Boha, jaki moža vyrašyć našaje pytańnie.
Nakolki daloka my idziem u hetym?
Kožny vyznačaje dla siabie sam. Napeŭna buduć tyja, chto pojdzie da momantu, pakul našyja patrabavańni nia vykanajuć. U toj ža čas siarod udzielnikaŭ akcyi jość tyja, chto prymaje ŭdzieł u paście-haładoŭcy da taho času, pakul dazvalaje zdaroŭje. Rašeńnie ab pierapynieńnihaładoŭki kožny prymaje samastojna. U vypadku, kali źjaŭlajecca pahroza dla zdaroŭja, toj čałaviek moža być vyviedzieny z haładoŭki prymusova.
Pavodle newlife.by
Carkva «Novaje žyćcio» źjaŭlajecca adnoj z cerkvaŭ poŭnaha evanhiella. Kolkaść viernikaŭ u Miensku składaje 750 čałaviek. U Biełarusi carkva maje svaje filii ŭ Baraŭlanach – carkva «Žyvoje słova», Žodzinie – carkva «Novaje pakaleńnie», u Lidzie, Ivanavie, Stoŭpcach, Horadni, Smalavičach i Haradziščy – cerkvy «Novaje žyćcio». Adna filija znachodzicca ŭ Azerbajdžanie (h. Baku). Ahulnaja kolkaść prychadžanaŭ u filijach składaje paŭtysiačy čałaviek.
Aficyjnym dniom narodzinaŭ carkvy ličycca 17 červienia 1992 h., kali adbyłasia pieršaje vodnaje chryščeńnie. U tym ža hodzie carkva była zarehistravanaja ŭ Mienharvykankamie. A pačanałasia ŭsio z nabaženstvaŭ, dziela jakich vykupaoisia ŭsie kvitki ŭ adnym ź mienskich kinateatraŭ. Adno takoje mierapryjemstva kaštavała budučamu pastaru miesiačnaha zarobku, adnak vyklikała vialikuju cikavaść siarod viernikaŭ. Supravadžalisia nabaženstvy adnoj kalonkaj i hitaraj, padoranymi misijaneram z Narvehii.
