Nia tolki Kreml šmatviežavy, ale ž i Eŭropa šmatofisnaja. Tak što hulnia ŭ intehracyju moža źmianicca hulnioju ŭ demakratyzacyju.
U interviju ahiencyi "MiK" Uładzimier Niściuk, adzin ź lideraŭ BSDP, prezentuje svaju partyju jak najlepšaha pasiarednika ŭ dyjalohu z uładaj. Adrozna ad "radykalnaj", "nacyjanalistyčnaj" apazycyi, ź jakoj Łukašenka, maŭlaŭ, nikoli za adzin stoł nia siadzie.
Adnačasna, ličyć sp.Niściuk, i Eŭropie varta ad pahrozaŭ pierajści da pošuku kampramisu ź Mienskam. A na čale dalikatnaj misii moh by stać, naprykład, mudry Brazaŭskas.
Zaznačym: były kiraŭnik Litvy — taksama sacyjał-demakrat. Uvohule ŭ zhadanym interviju vyrazna prasočvajucca — i heta zrazumieła — partyjnyja intaresy. Ale pasprabujma abstrahavacca ad ich. Chiba što dadamo maleńkaj remarkaj: sproby BSDP pazycyjanavacca na tle "radykalnaj" apazycyi vyklikali ŭ analitykaŭ družnuju ironiju. Na minułych vybarach najpieršym radykałam u vačoch uład byŭ mienavita lider hetaj partyi Kazulin.
Adnak zaraz havorka pra inšaje.
Eŭropa sapraŭdy padaje prykmiety hatovaści raspačać niejki novy tur palityčnaha handlu. Hladziecie, jak tam adrazu ŭchapilisia za chistkuju nahodu adsunuć pytańnie pra pazbaŭleńnie Biełarusi preferencyjaŭ u handli! Maŭlaŭ, nia varta psavać malinu akurat tady, kali ŭ ženeŭskuju štab-kvateru Mižnarodnaj arhanizacyi pracy vypraŭlajecca pradstaŭničaja delehacyja aficyjnaha Miensku.
Možna toje-siojo paabiacać nia tolki Ženevie (to bok MAP), ale i Bruselu (EZ), i Strasburu (Radzie Eŭropy), i Venie (ABSE). Bo sapraŭdy, mała toho što Kreml šmatviežavy, dyk ža i Eŭropa šmatofisnaja. Eŭrabiurakratam, jak lubym biurakratam, važna imitavać praces.
Palitolah Mikałaj Łukša ličyć, što takaja hulnia vyhadnaja abodvum bakam. Jon nahadaŭ pra sproby "hramadzka-palityčnaha dyjalohu" jašče za časami ambasadara Vika na čale misii ABSE. Moj surazmoŭca padkreśliŭ: EZ — heta piaresty kanhlamerat z 25 dziaržaŭ, dzie dasiahajecca składany balans miž intaresami mnostva hrupaŭ. Pryčym labijavańniem bolej žorstkaha padychodu zajmajucca najpierš pravaabaroncy, niedziaržaŭnyja arhanizacyi — to bok nia samyja ŭpłyvovyja struktury. Miž tym surjoznym ekanamičnym hulcam — aby cicha.
Karaciej, Brusel budzie rabić vyhlad, što pracuje nad prablemaj demakratyzacyi Biełarusi, a Miensk — što hatovy na peŭnyja sastupki. Palitolah zhadžajecca, što ciapierašni hazavy cisk Maskvy padšturchoŭvaje biełaruskaje kiraŭnictva da peŭnaj "pierabalansoŭki" zamiežnaj palityki. Ale ž, na dumku Mikałaja Łukšy, u Eŭropy nikoli nie było i pakul što nie prahladajecca vyraznaj stratehii ŭździejańnia na režym.
Dyk ci nie atrymajecca, što Miensk, jaki dziesiać hadoŭ tłumiŭ Kreml, hulajučy ŭ bratniuju intehracyju, ciapier raspačnie viazkuju hulniu z Zachadam u demakratyzacyju?
Palitolah Andrej Fiodaraŭ padkreślivaje, što ŭ mierkavanym dyjalohu Eŭropa musić uličyć raniejšy dośvied. To bok — damahacca hranična kankretnych krokaŭ na kanceptualnych kirunkach. Dostup apazycyi da elektronnych medyjaŭ? Chaj budzie ćviordaja kvota: naprykład, hadzina na tydzień. Źmiakčeńnie vybarčaha zakanadaŭstva? Taksama — harantujcie kvoty dla partyjaŭ u kamisijach. I hetak dalej.
Sapraŭdy, inačaj budzie zahannaje koła. Vypuściać adnaho palitviaźnia, a praź miesiac pasadziać troch...
Chacia, zhadziciesia, navat dziela svabody adnaho čałavieka varta vykarystoŭvać usie dyplamatyčnyja mahčymaści.
