Staršynia Pałaty pradstaŭnikoŭ Uładzimier Kanaploŭ sustreŭsia ŭ Maskvie z kiraŭnikom Parlamenckaj asamblei Rady Eŭropy (PARE) Rene Van der Linderam. Sustreča adbyłasia ŭ ramkach forumu «Pra budučyniu demakratyi» i mieła niefarmalny charaktar. U časie jaje abmiarkoŭvalisia dačynieńni miž Radaj Eŭropy i aficyjnym Mienskam. Pa słovach Uładzimiera Kanaplova, staršynia PARE vykazaŭ hatovaść naviedać ź vizytam Biełaruś, a taksama pravieści kanferencyju pa pytańniach mižparlamenckaha supracoŭnictva ź Biełaruśsiu.
Van der Linden: Zaraz ja sprabuju inicyjavać novy dyjaloh u imia mahčymaha vizytu ŭ Miensk pry peŭnych umovach. Ja nia dumaju, što palityka izalacyi źmienić sytuacyju na lepšaje. Tamu, ja pierakanany, Rada Eŭropy musić pasprabavać znajści šlachi dla pačatku dyjalohu miž hramadzianskaj supolnaściu, apazycyjaj i druhim bokam u Miensku.
Vy tolki što zhadali mahčymaść vašaha vizytu ŭ Miensk. Ci možacie vy ŭžo nazvać kankretnyja terminy?
Van der Linden: Nie. Ničoha kankretnaha ja skazać nie mahu. Ja zajaviŭ, što hatovy pryjechać u Miensk pry peŭnych umovach. Zaraz my vyvučajem sytuacyju, kab zrazumieć, ci mahčyma budzie realizavać hetuju ideju, ci nie. Naturalna, što ŭmovy takoha vizytu musiać być prymalnyja i dla aficyjnaha Miensku, i dla mianie.
U časie vašaj sustrečy viałasia havorka pra mahčymuju kanferencyju pa mižparlamenckim supracoŭnictvie miž Radaj Eŭropy i Biełaruśsiu. Ci jość užo kankretnyja napracoŭki pa hetym pytańni?
Van der Linden: Pakul jašče rana havaryć pra praviadzieńnie kankretnaj kanferencyi, havorka idzie tolki pra mahčymaść arhanizacyi takoha mierapryjemstva, adnak nijakich kankretnych rašeńniaŭ pakul nie pryniata. U Radzie Eŭropy jość ludzi, jakija kažuć, što my pavinny arhanizavać takuju kanferencyju ź inšymi mižnarodnymi arhanizacyjami, što my pavinny vyznačyć z hetymi arhanizacyjami ahulnuju pazycyju, ale pakul, paŭtarusia, nijakaha kankretnaha rašeńnia nie pryniata.
Što nieabchdna zrabić dla taho, kab adnosiny miž Radaj Eŭropy i aficyjnym Mienskam palepšylisia?
Van der Linden: Ja dumaju, vielmi važna pakazać, što Rada Eŭropy daje mahčymaść arhanizacyjam, hramadzkaj supolnaści raźvivacca ŭ demakratyčnym kirunku. Ja ŭžo raniej kazaŭ, što było b vielmi važnym arhanizavać u Miensku infarmacyjnaje biuro Rady Eŭropy, jakoje nia budzie zajmacca jakoj-kolviek prapahandaj, hetaha my nia chočam, a budzie davać infarmacyju pra toje, jakija kaštoŭnaści adstojvaje Rada Eŭropy, infarmacyju pra sytuacyju ŭ Eŭropie.
Ci spadziejaciesia vy na toje, što biełaruskija ŭłady pojduć vam nasustrač?
Van der Linden: Ja spadziajusia, što i jany nie zacikaŭlenyja ŭ izalacyi. Ja dumaju, što kožnaja kraina zacikaŭlenaja ŭ dyjalohu, u mahčymaściach naładžvać i raźvivać kantakty na mižnarodnym uzroŭni. Ja spadziajusia, što ŭ hetym sensie niešta pamianiajecca na lepšaje, kab my mahli skazać, što my bačym novyja šlachi na ŭstupleńnie ŭ budučyni Biełarusi ŭ Radu Eŭropy. Bo da hetaha času Biełaruś zastajecca adzinaj eŭrapiejskaj krainaj, jakaja nie ŭvachodzić u Radu. I ciapier Rada Eŭropy daje mahčymaść vieści bolš hnutkuju palityku, kab naładzić masty, pačać dyjaloh, jaki ŭ našych dačynieńniach pasunie nas dalej.
Hutaryŭ Hienadź Kieśnier
