Kryzis u biełaruska-rasiejskich adnosinach pahłyblajecca. Biełaruskaja administracyja ličyć učorašnija vykazvańni prezydenta RF Uładzimiera Pucina «ŭltymatyŭnymi» i «dalokimi ad siabroŭskich i sajuźnickich adnosinaŭ».
«Uličvajučy ton i abranuju formu vykładańnia svajho staŭleńnia da perspektyvaŭ «sajuznaha budaŭnictva», možna skazać, što vykazvańni Ŭładzimiera Pucina nosiać ultymatyŭny charaktar», – zajaviŭ byŭ u sieradu hałava kamisii ŭ mižnarodnych spravach i nacyjanalnaj biaśpieki «rady respubliki» «nacyjanalnaha schodu» Biełarusi Mikałaj Čarhiniec. Jon adznačyŭ, što ŭ adkaz na hetyja vykazvańni Biełaruś moža «razhledzieć pytańnie pra dalejšaje znachodžańnie rasiejskich vajskovych abjektaŭ na svajoj terytoryi».
Čarhiniec adznačyŭ, što raniej prezydent Rasiei ŭžo byŭ vystupaŭ z zajavami nakont budaŭnictva «sajuznaje dziaržavy», «prapanoŭvajučy Biełarusi ŭvajści ŭ skład Rasiejskaj Federacyi, što stałasia krokam niepavahi da suverenitetu Biełarusi».
«Druhim krokam kolki hod tamu było adłučeńnie padačaŭ hazu ŭ respubliku. I voś novaja zajava, jakaja śviedčyć ab tym, što rasiejskaje kiraŭnictva nia vielmi zacikaŭlenaje ŭ «sajuznaj dziaržavie», – skazaŭ Čarhiniec.
Jak jon uvažaje, «prablemy z pastaŭkami na rasiejski rynak biełaruskich tavaraŭ, farmavańniem cany na rasiejski haz, mažlivaje abmiežavańnie pastavak nafty znachodziacca ŭ rečyščy faktyčna raźviazanaj na siońnia handlovaj vajny Rasiei proci Biełarusi».
«Takija dziei dalokija ad sajuźnickich i siabroŭskich uzajeminaŭ», – adznačyŭ parlamentar.
«Kali nam trymacca takoj samaj pazycyi, jakuju demanstruje siońnia Rasieja, dyk, moža, Biełarusi śled było b razhledzieć pytańnie pra dalejšaje znachodžańnie rasiejskich vajskovych abjektaŭ na svajoj terytoryi», – dadaŭ biełaruski parlamentar.
U toj samy čas jon zaklikaje ŭsprymać hetyja zajavy «spakojna, pakidać miesca dla maneŭru i nie zahaniać adno adnaho ŭ kut».
«Ale, ź inšaha boku, pazycyja rasiejskaha kiraŭnictva panudžaje Biełaruś vyrachoŭvać roznyja varyjanty ŭ pytańniach zachavańnia svajho suverenitetu i ekanamičnaj biaśpieki», – skazaŭ Čarhiniec.
