Paśpiešlivy sud skončany. Sudździa Ała Bułaš abvieściła prysud Daškieviču – 1 hod i 6 miesiacaŭ papraŭčaj kalonii ahulnaha režymu. Dziaržaŭny abvinavaŭca prakuror Alaksandar Baroŭski z Kastryčnickaj prakuratury Miensku patrabavaŭ 2 hady, sudździa skaściła paŭhodu.
Da ustupleńnia prysudu ŭ siłu Źmicier budzie znachodzicca ŭ źniavoleńni. Termin budzie adličvacca z dnia aryštu – 15 vieraśnia. 1 dzień u SIZA roŭny adnamu dniu źniavoleńnia. Dokazam viny pasłužyli videa- aŭdyjomateryjały.
Našy karespandenty prysutničali na vyniasieńni prysudu. Źmicier uśmichaŭsia, vyhladaŭ spakojna. Paśla prysudu nie straciŭ raŭnavahi.
Jahonymi apošnimi słovami było: «Heta pieramoha, i my ŭsio adno pieramožam!»
Na vyniasieńnie prysudu zapuścili taksama Źmitrovaha baćku i zamiežnych dyplamataŭ.
Na vulicy la sudu praciahvajecca akcyja pratestu. Kala sta čałaviek, siarod jakich Alaksandar Milinkievič, Vincuk Viačorka, Anatol Labiedźka, Ała Makoŭskaja, Aleś Bialacki, utvaryli žyvy łancuh. Ludzi skandujuć «Hańba!» i «Svabodu!». Da ich padciahvajucca ahienty ŭ cyvilnym.
Fota Julii Daraškievič
Fota Julii Daraškievič
* * *
17.10
Paśla vyraku baćku Źmitra navat nie puścili da syna, kab skazać kolki słovaŭ – adrazu vycieśnili. Viačasłaŭ Daškievič tolki paśpieŭ uskliknuć: «Ja taboj hanarusia, synie!»
Pavodle niekatorych źviestak, na zaŭtra baćka maje dazvoł na sustreču z synam.
Advakat kaža, što ciapier rychtujecca abskardžańnie.
* * *
16.50
Moładź, pakłaŭšy kvietki na prystupki budynku sudu, razam z astatnimi arhanizavana rušyła ŭ bok praspektu Dziaržynskaha. Ź milicejskich racyjaŭ było čuvać: «Akuratna ich supravadžać». Vyjechali aŭtazak i mikraaŭtobus.
Z razmovy sa Źmitrovym baćkam: «Ja ŭžo kazaŭ «NN», što Źmitru daduć pa poŭnaj. Škaduju, što hetyja słovy dajšli da Boha. Nadziejaŭ na spraviadlivaje rašeńnie nie było. Vielmi dziakuju mužnaści junakoŭ i dziaŭčat – dziakujučy im termin skaścili na paŭhodu. Budziem malicca za Źmitra i kab takoha bolš nie adbyvałasia».
* * *
16.40
Aleś Bialacki: «Sud nia moh być u inšym farmacie, jon musiŭ być začynieny. Samim uładam zrazumieła, što takija spravy złomanaha šeleha nia vartyja. Nakont sudu ŭ mianie nie było iluzijaŭ. Tym ža, chto zmahajecca za svabodu, varta čakać takich prysudaŭ, bo svaboda lohka nie dajecca».
Aleh Korban (maładafrontaviec, jaki prachodziŭ u spravie): «Hety prysud nijak nie paŭpłyvaje na dziejnaść MF i ničoha nia źmienić... Sam vyrak nijak nie aceńvaju ŭ paraŭnańni z tym, jak my achviarujem saboj i zmahajemsia».
* * *
16.30
Advakat Źmitra Alaksandar Halijeŭ kamentuje sud i vyrak:
– Hety prysud žudasny. Taki scenar byŭ adpracavany pavodle spravy partneraŭcaŭ. Ja zyču, kab hetki scenar ni z kim nie paŭtaryŭsia, bo pavodle ździejśnienaha jon zanadta žorstki.
Pra Źmitra jon kaža, što jaho jak viernika hety prysud nie złamiŭ.
Kamentuje Alaksandar Milinkievič:
– Hetym prysudam ułada cynična demanstruje svaju siłu i nachabstva i pakazvaje, što jana nie vykonvaje i nie źbirajecca vykonvać patrabavańniaŭ kanstytucyi i zakonu... Ja zastajusia staršyniom kamitetu ŭ abaronu Źmitra Daškieviča, heta vialiki honar. Našyja nastupnyja dziejańni dziela dapamohi – zvarot u eŭrapiejskija instytucyi.
* * *
16.23
Akcyja pratestu naličvaje bolej za 100 čałaviek. Kala budynku kancentrujucca ludzi ŭ cyvilnym. Padahnali MAZ zialonaha koleru. U dvoryku staić zaviedzieny aŭtazak z pryadčynienymi varotami.
U łancuhu stajać jak maładyja, tak i stałyja ludzi. Jość navat dzieci.
* * *
16.05
Paśpiešlivy sud skončany. Sudździa Ała Bułaš abvieściła prysud Daškieviču – 1 hod i 6 miesiacaŭ papraŭčaj kalonii ahulnaha režymu. Dziaržaŭny abvinavaŭca prakuror Alaksandar Baroŭski z Kastryčnickaj prakuratury Miensku patrabavaŭ 2 hady, sudździa skaściła paŭhodu.
* * *
15.57
U zalu sudu zapuścili baćku Źmitra, piacioch žurnalistaŭ (siarod ich fatohraf «NN» Julija Daraškievič) i pradstaŭnikoŭ pasolstva ZŠA.
Da budynku padychodzić Alaksandar Milinkievič.
U sud zapuskajuć nastupnuju partyju žurnalistaŭ (jašče 3 čałavieki).
Mnoha ludu nie zapuskajuć. Zvyčajnaja adhavorka – małaja zala.
* * *
15.30
Kala domu pravasudździa źbirajecca hrupa padtrymki. Zaraz ich likam kala 10.
Pryjechała ambasadarka ZŠA. Źjaviŭsia taksama Alaksandar Šałajka.
Žurnalistaŭ pakul niebahata, siarod ich zdymačnaja hrupa «RienTV».
Dastatkova vysokaja kancentracyja milicyjantaŭ u cyvilnym — na prypynkach i la ŭvachodu ŭ sud. Siarod ich — kamandzir mienskaha amonu pałkoŭnik Padabied.
* * *
11.37
Pavodle papiaredniaj infarmacyi, siońnia, 1 listapada, a 16-j hadzinie budzie vyniesieny prysud Źmitru Daškieviču.
Siabry źbirajucca pryjści padtrymać jaho da budynku Doma pravasudździa.
* * *
31 kastryčnika
16.35
Vyjšaŭ pieršy śviedka, apytany ŭ spravie Źmitra Daškieviča.
Jon nia maje prava vydavać detalaŭ pracesu. Kaža, što Źmicier vyhladaje dobra, uśmichajecca. Druhi śviedka, Źmicier Chviedaruk, patrabuje pierakładnika, ad druhoj hadziny jon znachodzicca ŭ pamiaškańni sudu.
Hrupa padtrymki likam u niekalki dziasiatkaŭ čałaviek praciahvaje znachodzicca kala budynka sudu. Maładyja ludzi trymajuć u rukach zapalenyja śviečki.
* * *
14.20
Maładafrontaŭcaŭ, zamknutych u budynku sudu, adpuścili. Adnamu ź ich siońnia być śviedkam na sudzie.
Moładź tym časam nie razychodzicca, praciahvaje akcyju pavodle taho ž scenaru.
Ni pra jakija ekscesy nie paviedamlajecca. Milicyja pavodzić siabie pasiŭna, na akcyju nijak nie reahuje.
* * *
12.05
Udakładniajecca infarmacyja pra salihorskich maładafrontaŭcaŭ: ich było čatyry čałavieki; kali ich sprabavali zapichnuć u mašynu, dyk chłopcy zdoleli ŭciačy – potym sami patelefanavali svaim siabrom, kab pra siabie paviedamić.
* * *
11.58
Maładafrontaŭcy hutaryli z advakatam Źmitra Alaksandram Halijevym pytali jaho, jak pačuvajecca Źmicier. Toj kaža, što Źmicier trymajecca dobra, na pasiedžańni prychodzić ź Biblijaj, robić u joj paznaki. Nastroj u jaho dobry, ni na što nia skardzicca, adnak, kaža, trochi balić jamu śpina.
Pra padtrymku jon viedaje, mieŭ učora mažlivaść nazirać akcyju.
* * *
11.48
Niekalki čałaviek prasili achovu puścić ich pahrecca ŭ budynku sudu. Ich adviali, adnak tam i zamknuli – paśla vyjšaŭ milicyjant z zabranym partretam. Adzin z tych zamknutych śviedka, jaho, vidać, i pratrymajuć da dźviuch hadzin.
Pakul nijakich aktyŭnych dziejańniaŭ moładź nia robić – hrejucca ŭsioj kampanijaj kavaj. Kolkaść ich krychu skaraciłasia – niedzie da 30 čałaviek.
* * *
11.10
Amal usia presa syšła da 14 hadzin.
Adzin maładafrontaviec, jaki maje pozvu na sud, zdoleŭ prabracca da dźviarej zali sudu. Ale dalej jaho nie puścili. Jon kaža, što adtul vielmi dobra čutno, što adbyvajecca na dvary: lozunhi i śvistki. Značycca, kaža, dobra ŭsio čuvać i ŭ samoj zali sudu.
Moładź źbirajecca stajać da 14-j hadziny. Usiaho tut zaraz zastajećcie niedzie 50 čałaviek.
Z Małoha Sitna z pošty telefanavaŭ Pavał Sieviaryniec. Pieradavaŭ vitańni, zyčyŭ vytrymki i dzialiŭsia idejami, jak pavodzić siabie na sudzie.
* * *
11.00
Maładafrontaŭcy ŭdakładniajuć źviestki pra ichnyja pozvy: na ich niama podpisaŭ adkaznych asob i piačatak (adsutničajuć nieabchodnyja rekvizyty). U źviazku z hetym moładź vykazvaje versiju, što toj bok chacieŭ spravakavać padrobku, bo hetki dakument i praŭda lohka padrabić, a potym ź im prabicca na sud u jakaści śviedki.
Nichto nie razychodzicca – ni moładź, ni žurnalisty. Ludzi hrejucca kavaj dy harbataj.
Milicyi dyk i saŭsim nie vidno.
* * *
Baćka Daškieviča
Fota Julii Daraškievič
10.50
Advakat Alaksandar Halijeŭ praz SMS'ku paviedamlaje, što da dźviuch hadzinaŭ u sudzie abvieščany pierapynak.
Nahadajem, što maładafrontaŭcy atrymali pozvy na 14.00.
Moładź, adnak, siońnia dobra padrychtavałasia i sychodzić nie źbirajecca. Jany majuć z saboju termasy z harbataj, kavaj dy kanapki.
* * *
10.38–10.45
Akcyja pryciahvaje ŭvahu ludziej u budynku sudu, šmat chto naziraje jaje z voknaŭ.
Pačynajuć navat reahavać kiroŭcy. Chto spyniajecca dy naziraje, a chto vitalna syhnalić.
Da maładafrontaŭcaŭ, jak i ŭčora, dałučajucca stałyja ludzi, chodziać sa śvistkami. Akcyja ŭsialak kambinujecca: ludzi chodziać to kołam, to łancuhom, skandujučy «Svabodu!» albo śviščučy ŭ śvistki.
Usiaho ŭžo naličana niedzie siem dziasiatkaŭ čałaviek ź plakatami.
* * *
Ź cikavaha:
Pierad pačatkam sudu adzin z žurnalistaŭ pasprabavaŭ prajści ŭ budynak sudu, kab pahrecca. Dyk adna supracoŭnica jamu i kaža: «Ja b vas uvohule pavyhaniała na dvor i paablivała b chałodnaj vadoj!»
Da słova: la sudu ranicaj bačyli pažarnuju mašynu z vadamiotam.
* * *
10.25
Kala sudu na Siamaški, 33, sabrałasia blizka paŭsotni čałaviek. Pačałasia akcyja: maładafrontaŭcy pašychtavalisia pierad voknami domu pravasudździa ŭ formie litaraŭ «MF», skandujučy «Daškieviču svabodu!». Jany trymajuć plakaty Źmitra ŭ rukoch i śviščuć u śvistki.
Milicyja pokul nie aktyŭnaja. Dziažuryć čałaviek u cyvilnym i aperatar z kameraj.
Z dyplamataŭ zaŭvažnyja pradstaŭnik ambasady ZŠA, dyplamat z Švedzkaha kansulatu, pradstaŭniki ABSE.
Maładafrontaŭcy, jakija atrymali pozvy ŭ sud na 14.00, kažuć, što tyja aformlenyja nienaležnym čynam: jość tolki podpis sudździ, ale niama piačatki.
Pavodle ŭčorašnich źviestak, u pamiaškańni sudu była vialikaja kolkaść amapu. Nie vyklučana, što tak budzie i siońnia.
Fota Andreja Lankieviča, NN
