U čaćvier uviečary ŭ zali Mienskaha mižnarodnaha adukacyjnaha centru imia Johanesa Raŭ adkryŭsia ICH “Mienski forum” – najbujniejšaja niamiecka-biełaruskaja sustreča dyplamataŭ, palitykaŭ, biznesoŭcaŭ i hramadzkich dziejačoŭ. Tema siońniašniaha forumu sfarmulavanaja jak “Biełaruś – susiedztva i tranzyt u Eŭropie: zamiežnaja palityka, ekanomika, hramadztva”. Arhanizavali forum pasolstva Niamieččyny, Niamiecka-biełaruskaje tavarystva i niamiecki Fond “Navuka j palityka”. Staršyniom arhkamitetu forumu -- viadomy biełarusist prafesar Rajner Lindner.
Z kožnym hodam forum robicca ŭsio bolš pradstaŭničym. Sioletni nia staŭ vyniatkam. Ź niamieckaha boku pryjechali były ministar abarony Folkier Rue, kiraŭnica parlamenckaj hrupy “Niamieččyna-Biełaruś” Uta Capf. Adnak najbolšym siurpryzam stała prysutnaść Uładzimiera Kanaplova, staršyni pałaty pradstaŭnikoŭ i blizkaha siabra A.Łukašenki. Što j paraŭnoŭvać ź minułym hodam, kali biełaruski bok abmiažoŭvaŭ prysutnaść uzroŭniem namieśnika ministra zamiežnych spravaŭ. Usie adčytali heta jak syhnał.
Pieršym słova trymaŭ praf.Lindner. Padziakavaŭšy ŭsim, chto udzielničaŭ u padrychtoŭcy forumu, jon vykazaŭ žyl, što nia mohuć prysutničać u zali ŭdzielniki minułych forumaŭ – źniavolenyja Alaksandar Kazulin, Mikoła Statkievič, Źmicier Daškievič, a taksama eŭraparlamentary, jakim admoŭlena ŭ vizach.
Kanaploŭ vychodzić na trybunu dla vitańnia. “U dyjalohu ź Biełaruśsiu Eŭrasajuz nie zaŭždy adekvatna ŭsprymaje arhumenty biełaruskaha boku i pieraduziata interpretuje sytuacyju ŭ našaj krainie, -- kaža jon. – Čas vyrašać, ci varta praciahvać nieefektyŭnuju palityku dvajnych standartaŭ. Razmova ź Biełaruśsiu na movie sankcyjaŭ i vizavych abiežavańniaŭ — heta prosta śmiešna, — zajaviŭ śpikier. -- Imknieńnie j žadańnie našych partneraŭ lepiej zrazumieć palityčnyja i ekanamičnyja pracesy ŭ Biełarusi zaŭsiody znojdzie vodhuk”. Jon papiaredžvaje: budaŭnictva novaj Eŭropy bieź Biełarusi jak minimum budzie niezavieršanym.
U cełym pramova była vytrymana ŭ zvykłym duchu. Vašamu forumu nie staje kankretyki, zajaviŭ jon, tamu jon i nie vykarystoŭvaje svajho patencyjału.
Z słovam u adkaz, dosyć kamplimentarnym, vystupiła sacyjał-demakratka Uta Capf.
Paśla hetaha ŭstupny dakład zrabiŭ hieneralny sakratar Chryścijanska-demakratyčnaha sajuzu Niamieččyny Ronald Pafala. U im jon raspaviadaŭ pra asnavatvornyja pryncypy zamiežnaj palityki Niamieččyny. Jon kaža: nia moža być papravy adnosinaŭ Biełarusi ź Niamieččynaj, pakul u Biełarusi parušajucca asnoŭnyja pravy j svabody. Jon zajaŭlaje tym nia mienš, što ŭ Berlinie buduć uvažliva sačyć za raźvićciom sytuacyi z enerhapastaŭkami ŭ Biełaruś. Jon raspaviadaje pra svaju sustreču z Alaksandram Milinkievičam i žonkaj Alaksandra Kazulina, ab premii Sacharava, prysudžanaj Eŭraparlamentam lideru biełaruskich demakrataŭ, ab asabistym vitańni Milinkieviču, jakoje jon pryvioz ad Anhieły Merkiel. Proźvišča Milinkieviča hučyć u jahonaj pramovie vosiem razoŭ. Urešcie Pafala pakazvaje kavałak Berlinskaha muru: chaj heta nahadaje ŭsim, chto dumaje, što svabodu možna abmiažoŭvać viečna, pra vialikuju siłu jaje.
Zala doŭha plaskaje, na trybunu vylataje śpikier Kanaploŭ. My prasłuchali vystup sapraŭdnaha hieneralnaha sakratara, kaža jon. Sapraŭdnaha čornaha jastraba. Ja raźličvaŭ na kanstruktyvizm. Voś jak u Uty Capf. A tut buduć nas vučyć. I chto? Paśla taho što vy zrabili ŭ Juhasłavii, dzie prymianiali jadziernyja rakiety z uranavymi bajehałoŭkami, paśla taho, u što vy pieratvaryli Irak i Aŭhanistan, vy jašče majecie nas vučyć? Nia treba nas vučyć, u nas biaśpiečna i paradak. U nas mašyny nie harać pa načach dziasiatkami tysiačaŭ, jak u Francyi i Hiermanii, i niama 20-adsotkavaha biespracoŭja. Darečy, my možam pamahčy z vyrašeńniem vašych ekanamičnych prablemaŭ, -- prapanavaŭ biełaruski śpikier (śmiech u zali) i, pažadaŭšy forumu kanstruktyŭnaje pracy i paprasiŭšy prabačeńnia za zaniataść, pakinuŭ zalu, ledź raźminuŭšysia ŭ dźviarach z masiŭnym Kalakinym.
Na pryjom, arhanizavany ŭ restaranie “Vestfalija” ad imia pasła Okie Petersana, kiraŭnika misii ABSE ŭ Biełarusi, udzielniki forumu išli pad uražańniem ad pikiroŭki. Pravaabaroncy cisnuli ruki arhanizataram forumu, dziakujučy za maksymalnyja formy salidarnaści z palitviaźniami. Niamieckija palitolahi ŭstryvožana raspytvali biełaruskich pikiejnych žyletaŭ: ci słušna zrabiŭ Pafala, vybraŭšy taki dydaktyčny ton?
U adroźnieńnie ad kanca 90-ch, eŭrapiejcy admaŭlajucca vieści dyjaloh ź Mienskam pa formule: sastupki ŭ abmien na abiacanki. Jak pakazaŭ demarš Kanaplova, heta vyrazna nervuje aficyjny Miensk, nia zvykły ni da dyskusii, ni da sastupak.
"Mienski forum" praciahnie pracu ŭ sekcyjach palityki, ekanomiki i moładzievych kantaktaŭ u piatnicu i skončycca plenarnym pasiedžańniem u subotu.
