Siarod hlabalnych temaŭ nieŭprykmiet dla mnohich pramilhnuŭ ścipły kamentar presavaha sakratara MZS, čamu na čarhovy Mienski forum nie puścili niekalkich deputataŭ bundestahu dy niamieckich žurnalistaŭ.
Vyśviatlajecca, što heta "symetryčny zachad". Tak aficyjny Miensk adkazaŭ na paślavybarčyja sankcyi Eŭraźviazu. Čakali ŭ zasadzie až paŭhodu!
Abyvatalu tłumačać: jany ž taksama zabaranili ŭjezd šerahu našych parlamentaroŭ dy pradstaŭnikoŭ medyjaŭ. Nibyta ŭsio spraviadliva: voka za voka!
Nia zhadvajecca pra adzin tolki momant. Eŭropa ŭklučyła ŭ čorny śpis tych, chto, na jaje dumku, mieŭ dačynieńnie da antydemakratyčnych štukarstvaŭ padčas apošniaj elektaralnaj kampanii. Śpis, nahadaju, persanalny, publičny i adkryvajecca proźviščam aficyjnaha tryumfatara henych vybaraŭ. Z žurnalistaŭ ža tam, naprykład, sp.Zimoŭski.
Darečy, heny kanduit kolki času tamu papoŭniŭsia čatyrma asobami, datyčnymi da vyniasieńnia prysudu Kazulinu dy aktyvistam "Partnerstva". Možna kryŭdzicca, ale ciažka spračacca, što Eŭraźviaz dziejničaje "čysta kankretna".
Nu a niebarakaŭ z bundestahu, treba dumać, ahłušyli vizavym adłupam jak abuchom pa hałavie. Bo jany ni ŭ jakich publičnych čornych śpisach nie fihuravali.
Zrešty, kali napružyć pamiać, to možna zhadać, što 8 červienia presavy sakratar MZS Papoŭ sapraŭdy zhadvaŭ pra niejki patajemny "śpis u adkaz". Pryčym padkreśliŭ: tudy trapili "najbolš adyjoznyja palityčnyja dziejačy i asoby, jakija systematyčna zarekamendavali siabie jak pieraduziatyja adnosna našaj krainy, stvarajuć zaviedama skažonaje ŭjaŭleńnie pra palityčnuju i ekanamičnuju sytuacyju ŭ Biełarusi" (asobna adznačym cyceronaŭski styl!).
Jak bačym, naša ŭłada jašče raz daviała, što ničoha nie zabyvaje i nie daruje. Voka za voka!
Zvyš usiaho — krasamoŭny štrych da papularnaj temy, što biełaruskaje kiraŭnictva nibyta choča zaraz trochi pazalacacca da Zachadu. Ničoha sabie zalacanački...
P.S. Zaadno ź niemcami pad razdaču trapiła i hrupa pradstaŭnikoŭ Eŭraparlamentu. U pryvatnaści, vizy na 9-y Mienski forum nie atrymaŭ maltyjski deputat sp.Muskat.
Tut lohika zusim fenamenalnaja: a jakoj, maŭlaŭ, trascy treba maltyjcu na forumie, što maje "biełaruska-hiermanski farmat"? I heta pry tym, što sp.Muskat — namieśnik kiraŭnika delehacyi Eŭraparlamentu ŭ pytańni suviaziaŭ ź Biełaruśsiu (sic!).
Niebaraka Muskat! Z takoj lohikaj zaŭtra nia puściać jakoha-niebud́ biaskryŭdnaha hera Partvejna ci mśjo Alihate:)
