Na sustrečy z Łukašenkam u Kramli paśla rytualnych pasažaŭ dla presy Pucin, miarkujučy pa ŭsim, raspačaŭ žorstki presinh.
Napačatku siońniašnich pieramovaŭ Łukašenka vykazaŭ zakłapočanaść druharadnymi pytańniami kštałtu sajuznaha biudžetu na 2007 hod dy čarhovaha samitu SND. Haspadar sustrečy taksama pramoviŭ niešta tryvijalnaje pra rost uzajemnaha tavarazvarotu.
Heta nahadvała dyjaloh dziela advodu vačej. Pamiatajecie, jak u Hohala: a ty, kum, čym boty mažaš — dziohciem ci zdoram?
A voś potym, musić, pačałosia...
Maskoŭskaja presa zavastraje ŭvahu na tym, što sustreča adbyvajecca na inicyjatyvu Pucina. Padtekst taki: biełaruskaha "baćku", maŭlaŭ, vyklikali na dyvan.
Pastfaktum presavaj kanferencyi nie miarkujecca, tak što varta aryjentavacca na ŭskosnyja krynicy.
Voś śviežaja natatka na sajcie "RIA Novosti". Hetaja ahiencyja jość ruparam rasiejskaj kiroŭnaj elity. Z zajavaŭ ananimnaj krynicy ŭ Kramli vynikaje, što Pucin dapiakaje naftavym arhumentam. Maŭlaŭ, ci nia čas padzialicca zvyšprybytkami ad pierapracoŭki rasiejskaha "čornaha zołata"?
Havorka idzie, sa słoŭ ekspertaŭ, pra los miljardaŭ dalaraŭ.
Zvyš taho, biełaruskaha kiraŭnika zaścierahajuć ad "palityzacyi" hazavaha pytańnia (zakranuli zajavy na presavaj kanferencyi 29 vieraśnia dy paźniejšyja vypady!). A taksama, miarkujučy pa tumannaj frazie pra nieabchodnaść pahłybleńnia valutnaj intehracyi, zmušajuć da pierachodu na rasiejski rubiel.
Biełaruski ekspert Leanid Zaika naŭprost kaža, što košt hazu budzie zaležać ad taho, ci zhodzicca Łukašenka pryniać valutu čužoj dziaržavy.
Heta vielmi nahadvaje sproby zahnać u kut. Ale zahnany ŭ kut zazvyčaj adbivajecca z patrojnym impetam.
Adno zrazumieła: jak ad samaha pačatku pradrakali pryncypovyja krytyki "bratniaj intehracyi", nastaŭ momant, kali jana vyłazić bokam usim biełarusam. Bo rubam paŭstaje pytańnie našaj niezaležnaści.
Jaki b ni byŭ vynik siońniašnich pieramoŭ, płacić za jaje daviadziecca doraha.
P.S. Na sajcie prezidenta Rasiei pavodle vynikaŭ sustrečy źjavilisia try radki ahulnych słovaŭ.
P.P.S. Mała što dadała i vynikovaja natatka BIEŁTA.
Kankretyka chiba ŭ tym, što hutarka z voka na voka doŭžyłasia try z pałovaj hadziny. Pra jaje schavany za radkami aficyjozu dramatyzm, mahčyma varty piara Šekśpira, možna tolki zdahadvacca.
Fota pres-słužby Prezydenta Rasiei
