U piatnicu, 17 listapada, sa Škłoŭskaj kalonii byŭ niečakana vyzvaleny Mikoła Astrejka. Jon byŭ aryštavany sioleta ŭ lutym, u žniŭni sud Centralnaha rajonu Miensku prysudziŭ jaho da dvuch hadoŭ źniavoleńnia. Astrejka byŭ pakarany pa artykule «Dziejnaść ad imia niezarehistravanaj arhanizacyi». U paniadziełak adno z svaich pieršych interviju paśla vyzvaleńnia Mikoła daŭ «Našaj Nivie». Jon adrazu papiaredziŭ, što pakul nia vielmi aryjentujecca ŭ palityčnych padziejach u krainie, tamu paprasiŭ zadavać tolki asabistyja pytańni.
«Naša Niva»: Mikoła, jak Vy pieranieśli hetyja dzieviać miesiacaŭ źniavoleńnia?
Mikoła Astrejka: Nielha skazać, što mnie było lohka. Naturalna, što było vielmi i vielmi ciažka. Heta tyčyłasia absalutna ŭsiaho. Spadziajusia, turma nie adbiłasia značna na maim zdaroŭi, ale ŭsio adno bližejšym časam miarkuju źviarnucca da lekaraŭ, pa medahlad. U mianie chraničnaja chvaroba serca. A taksama, jak va ŭsich zekaŭ, u mianie balać zuby, tamu nieabchodna iści da stamatolaha.
«NN»: Što dla Vas było najciažejšym za hety termin?
MA: Toje, što ja byŭ daloka ad svajoj siamji – baćkoŭ, žonki, dački. Mnie vielmi nie chapała ich usich. Ciapier pastarajusia kampensavać dla ŭsich tuju maju adsutnaść.
«NN»: Ci viedali Vy zahadzia pra vyzvaleńnie?
MA: Nie, absalutna ničoha nia viedaŭ. Daviedaŭsia tolki ŭ toj momant, kali 17 listapada ŭ kameru pryjšoŭ dziažurny i skazaŭ, kab ja rychtavaŭsia da vyzvaleńnia. Da kanca pavieryŭ u toje, što heta praŭda, tolki paśla taho, jak akazaŭsia za bramaj kalonii. Ja byŭ vielmi ščaślivy ad takoj niečakanaści.
«NN»: Kali pra vyzvaleńnie daviedalisia vašyja rodnyja?
MA: Tolki tady, kali ŭ piatnicu viečaram ja źjaviŭsia ŭ mienskaj kvatery. Dla ŭsich heta byŭ pryjemny šok. Dumaju, nia tolki dla mianie, ale i dla ŭsich svajakoŭ i rodnych. Taki voś pryjemny siurpryz ja im padaravaŭ.
«NN»: Mikoła, vy tolki zaraz pabačyli svaju dačku?
MA: Tak. Mnie vielmi pryjemna ad hetaha, što ja ŭrešcie pabačyŭ svaju Lizu.
«NN»: Čym ciapier miarkujecie zaniacca?
MA: Ja jašče nie da kanca volny čałaviek. Budu pracavać na papraŭčych pracach i 15% zarobku adličać dziaržavie. U paniadziełak zranku byŭ u RAUS Pieršamajskaha rajonu Miensku, staŭ na ŭlik. Dumaju, što bližejšymi dniami znajdu dla siabie niejkuju pracu. Hałoŭnaje – što ja budu žyć razam ź siamjoj.
Taksama chacieŭ by padziakavać «Našaj Nivie» za maralnuju padtrymku, jakuju hazeta akazvała na praciahu ŭsiaho majho źniavoleńnia.
?
Aleś Bialacki pra vyzvaleńnie Astrejki: Heta nie syhnał
“Naša Niva” źviarnułasia da pravaabaroncy Alesia Bialackaha, sioletniaha naminanta na atrymańnie Nobeleŭskaj premii mira, z pytańniem: ci nia źviazvaje jon vyzvaleńnie Mikoły Astrejki z novaj stratehijaj Eŭraźviazu datyčna Biełarusi?
“Kali takaja suviaź jość, to jana vielmi apasrodkavanaja. Eŭraźviaz vyłučyŭ ceły šerah rekamendacyjaŭ, jakija pavinny vykanać biełaruskija ŭłady, kab raźličvać na vydzialeńnie mahčymaj dapamohu, vyzvaleńnie palitviaźniaŭ jość tolki adnym z punktaŭ hetaj stratehii. Pa ščyraści mnie mała vierycca ŭ suviaź miž hetymi padziejami. Chacia, u pryncypie, heta i mahło być peŭnym syhnałam dla Zachadu, što biełaruskija ŭłady hatovyja da dyjalohu. Jak by toje ni było, ale pra sutnaść rečaŭ my daviedajemsia ŭžo bližejšym časam. Moj skiepsis najpierš datyčyć taho, što pierad vyzvaleńniem Skrabca i Astrejki ŭ turmu kinuli Daškieviča. Biełaruskaja ŭłada nia jość paśladoŭnaj u svaich učynkach. Ja nia vieru ŭ palapšeńnie ci paharšeńnie adnosinaŭ, kropkavyja metady Eŭraźviazu. Najchutčej Eŭraźviaz i aficyjny Miensk buduć zachoŭvać raniejšy status-kvo”.
Zapisaŭ Źmicier Pankaviec
Fota Julii Daraškievič
