U 2007 h. spaŭniajecca 150 hadoŭ z času ekspedycyi hrafa Kanstancina Tyškieviča pa Vialli. Padčas jaje Tyškievič upieršyniu naviedaŭ, abmieryŭ i apisaŭ vytoki j pieršyja 77 kilametraŭ raki. Hrupa entuzijastaŭ vyrašyła nastupnym letam paŭtaryć padarožža hrafa Tyškieviča. Udzielniki ekspedycyi prahnuć dałučeńnia da vypravy vodnych turystaŭ.
U 1857 hodzie ŭpieršyniu kompleksna, z pahladu hieahrafii, historyi, etnahrafii, byli vyvučanaja Vialejščyna j Vilenščyna. Vyniki ekspedycyi vyjšli knihaj «Vialla i jaje bierahi» (1871 h., paśla śmierci aŭtara). Kniha hrafa Tyškieviča – adzinaja manahrafija ŭ Eŭropie, u jakoj etničny rehijon daśledavany šlacham padarožža pa race.
Praz 150 hadoŭ ad Kamieny da Koŭna vybirajucca pradstaŭniki roznych hramadzkich arhanizacyj.
U Vilenskaj ratušy adbyŭsia ŭračysty abrad upaŭnavažańnia budučaje ekspedycyi. Pradstaŭniki piaci hramadzkich arhanizacyjaŭ padpisali damovu ab partnerstvie.
Inicyjatary idei, prapłyŭšy pa Vialli ŭ pamiać hrafa Tyškieviča, chočuć nahadać hramadztvu Litvy i Biełarusi ab jaho navukovych zasłuhach i źviarnuć uvahu hramadztva na značeńnie Vialli dla abodvuch narodaŭ. Vialla łučyła ludziej roznych nacyjaŭ, jakija žyvuć abapał raki.
Zadumana paŭtaryć ekspedycyju Tyškieviča i, karystajučysia sučasnymi technalohijami, zafiksavać źmieny na bierahach Vialli, što adbylisia za 150 hadoŭ.
Udzielniki ekspedycyi prahnuć dałučeńnia da vypravy vodnych turystaŭ z abiedźviuch dziaržaŭ.
Kinadakumentalist Vitaŭtas Damaševičus maje stvoryć videaapovied pra eŭrarehijon Vialli, jaki budzie pakazany pa eŭrapiejskich telekanałach. Taksama ŭ 2007 h. vyniki ekspedycyi buduć abahulenyja ŭ asobnym vydańni.
Hraf Tyškievič svajo padarožža pačaŭ 5 červienia 1857 h. Roŭna praz 150 hadoŭ jano znoŭ pačniecca ad vioski Kamiena, ad lehiendarnaha kamienia, dzie pačynajecca Vialejskaje vadaschovišča.
Šlach da biełaruska-litoŭskaj miažy ekspedycyja prapłyvie za dva tydni z načlehami ŭ Naračy, Smurhoniach, Danišavie, Žodziškach. Dziaržaŭnuju miažu pierapłyvuć 18 červienia.
U Bujvidach da ekspedycyi dałučycca płyt «Blukšys» z kamandaj. Prapłyvajučy Litvoju, udzielniki ekspedycyi źbirajucca ŭšanavać mitalahičnyja miaściny Santaku, Revu, Pašulniški.
Kupalle, jak i 150 hadoŭ tamu, budzie adśviatkavana ŭ Vilni, nasuprać parku Źviaryniec. Načlehi ŭ Litvie zaplanavanyja ŭ Sudervie, Dukštach, Kiernavie, Rukli. A skončycca ekspedycyja 1 lipienia ŭ Koŭnie.
