U 17 z 28 škołaŭ Navahradčyny i amal paŭsiul na Słonimščynie dzieciam prapanujuć fakultatyŭ pad nazovam «Asnovy pravasłaŭnaj maralnaści». Hety kurs rekamendavany Nacyjanalnym instytutam adukacyi.
Papaŭnieńnie ŭ školnaj prahramie adbyłasia ŭ ramkach ažyćciaŭleńnia «Damovy ab supracoŭnictvie pamiž Respublikaj Biełaruś i Biełaruskaj pravasłaŭnaj carkvoj» u Haradzienskaj vobłaści. Adpaviedny dakument byŭ raspracavany letaś. Jaho padpisali staršynia Haradzienskaha abłvykankamu Ŭładzimier Saŭčanka i japiskapy Haradzienski i Vaŭkavyski Arciemij i Navahradzki i Lidzki Huryj. U chutkim časie taki ž fakultatyŭ pačnuć vyvučać u škołach Mienščyny. Staršynia Mienskaha abłvykankamu padpisaŭ ź Fiłaretam adpaviednuju damovu ab supracoŭnictvie.
Pavodle źviestak Navahradzkaha rajonnaha adździełu adukacyi, akramia zaniatkaŭ školnikam prapanujucca ekskursii ŭ Turaŭ, Połacak, Žyrovičy dy inšyja biełaruskija harady, bahatyja pravasłaŭnaj spadčynaj. Sam fakultatyŭ źjaŭlajecca abaviazkovym dla naviedvańnia. Jak i pradmiet «Vialikaja ajčynnaja vajna». Školnaja administracyja vyznačaje, ci budzie nastaŭnik vykładać tolki «VAV», ci pravasłaŭny fakultatyŭ taksama.
Nastaŭnica historyi Kaścianievickaj škoły ŭ Słonimskim rajonie Kaciaryna Miežaviec budzie vykładać abodva pradmiety. «Na maich zaniatkach vučni nie sumujuć, bo razam my raźbirajem vielmi žyćciovyja sytuacyi» – kaža Kaciaryna. Jana pierapracavała atrymanuju ŭ metadyčnym kabinecie prahramu, pierakłała jaje na biełaruskuju movu. «Pieršapačatkovaja prahrama była raspracavanaja ŭ Žyrovičach i bolš pasavała duchoŭnaj seminaryi» – tłumačyć nastaŭnica. Novy fakultatyŭ u čymści nahadvaje kurs «Čałaviek i hramadztva», pryśviečany marali. Jon zakranaje temy ŭzajemaadnosinaŭ čałavieka i pryrody, ludziej miž saboj. Dzieciam raskazvajuć pra žyćcio jak vialikuju kaštoŭnaść, dar Božy, pra asabistuju adkaznaść za jaho. «Ja tłumaču dzieciam niebiaśpieku škodnych zvyčak i amaralnych pavodzinaŭ», – kaža sp. Miežaviec. Fakultatyŭ vyvučajuć u starejšych klasach i takaja infarmacyja tut vielmi darečy, miarkuje kaścianievickaja nastaŭnica. Jana ličyć taksama, što ŭ novym pradmecie niama prapahandy pravasłaŭja, niahledziačy na nazvu. «Miarkujcie pa nazvach temaŭ – «Chryścijanskaja maral -- asnova čałaviečych uzajemaadnosinaŭ», «Chryścijanskaje razumieńnie siamji i šlubu», «Adroźnieńni chryścijanskich i pahanskich śviataŭ» i h.d.» – kaža Kaciaryna. Jana ŭpeŭnienaja, što ŭsio zaležyć ad pazycyi nastaŭnika. Joj, jak vierujučaj, pradmiet vielmi važny i aktualny. Pa słovach nastaŭnicy, dzieci poŭnyja zababonaŭ, nibyta j nie XXI stahodździe na dvary.
Hałoŭny redaktar hazety «Haradzienskija jeparchijalnyja naviny» Alaksandar Šurski raspavioŭ pra plany Haradzienskaj japarchii. Admysłovaja carkoŭnaja kamisija maje raspracavać navučalnuju prahramu dla škołaŭ i prapanavać jaje haradzkomu adździełu adukacyi. «Haradzienskaja japarchija musić uličyć peŭnyja składanaści, što ŭźnikli ŭ Navahradku dy Słonimie z navučalnaj prahramaj», – kaža A. Šurski. Jon kaža, što budučaja prahrama budzie bolš dapasavanaja da śvieckaj navučalnaj ustanovy. I dadaje, što ŭ Haradzienskaj japarchii sprava z pravasłaŭnaj adukacyjaj u škołach znachodzicca pakul u stanie raspracoŭki. Pijanerstva Navahradčyny i Słonimščyny ŭ hetaj spravie jon źviazvaje z aktyŭnaściu miascovaha carkoŭnaha kiraŭnictva. Adkazvajučy na pytańnie pra movu navučańnia sp. Šurski zaznačyŭ, što ŭsio budzie zaležać ad pazycyi dy inicyjatyvy tych, chto budzie vykładać jaho dzieciam. Carkva ž, najchutčej, raspracuje prahramu pa-rasiejsku.
Fota photo.bymedia.net
