Prynarodna źvinavaciŭšy kiraŭnika dziaržavy ŭ raspačynańni vajny z pratestantami, kolišni namieśnik kiraŭnika Administracyi prezydenta Ivan Paškievič źjechaŭ na pastajannaje miesca žycharstva ŭ ZŠA.
Ivan Paškievič byŭ adnym z tych ludziej, jakija dapamahli ŭ 1996 h. učynić kanstytucyjny pieravarot praz pryniaćcio novaj redakcyi Asnoŭnaha zakonu. U 2000 h. jon niečakana syšoŭ sa svajoj pasady i pierajšoŭ, jak było napisana va ŭkazie, padpisanym Łukašenkam, «na novuju pracu». I.Paškievič byŭ «pryznačany» deputatam Pałaty pradstaŭnikoŭ, dzie pačaŭ vykazvać niazhodu z palitykaj uładaŭ najpierš u relihijnych spravach.
Paśla skančeńnia deputackich paŭnamoctvaŭ pratestant I.Paškievič staŭ daradcam staršyni Sajuzu evanhielskich chryścijanaŭ-baptystaŭ u Biełarusi. Na znak pratestu suprać pavodzinaŭ uładaŭ u dačynieńni da pratestanckaj carkvy «Novaje žyćcio» miesiac tamu eks-namieśnik staršyni administracyi vystupiŭ z rezkim listom na adras svajho kolišniaha šefa. «Łukašenka raspačaŭ nieprychavanuju vajnu suprać pratestanckaj carkvy ŭ Biełarusi. Aryšty prapaviednikaŭ i pastyraŭ, niepamysnyja štrafy ŭ dačynieńni carkoŭnych słužkaŭ, zakryćcio malitoŭnych damoŭ, admova rehistravać novyja cerkvy – voś nabor vajskovych srodkaŭ «pravasłaŭnaha ateista» ŭ dačynieńni da evanhielskich chryścijanaŭ. Za svaju 12-hadovuju prezydenckuju dziejnaść nivodnaja evanhielskaja carkva, u tym liku i katalickaja, nie atrymała ŭ Miensku nivodnaj pustki i dazvołu na budoŭlu carkvy», – viałosia ŭ liście.
Vidavočna, bolš, čym na hetu zajavu, siłaŭ na baraćbu z režymam Łukašenki ŭ Paškieviča nie chapiła. I jon źjechaŭ na pastajannaje miesca žycharstva ŭ ZŠA.
Ivan Paškievič naradziŭsia 11 traŭnia 1955 h. u Bieražnoje Stolinskaha rajonu Bieraściejskaj vobłaści. Skončyŭ Maskoŭski dziaržaŭny ŭniversytet (žurnalistyka), Humanitarna-ekanamičny instytut (juryst).
Pracavaŭ instruktaram CK ŁKSMB, dyrektaram vydaviectva hazetna-vydavieckaj firmy «Biełaja Ruś», pamočnikam namieśnika staršyni Dziaržahrapromu BSSR, dyrektaram Nacyjanalnaha fioijału teleradyjokampanii «Mir» u Respublicy Biełaruś, namieśnikam kiraŭnika Administracyi prezydenta.
Abiraŭsia deputatam Viarchoŭnaha Savietu 13-ha sklikańnia (1996), Pałaty prdastaŭnikoŭ pieršaha sklikańnia, naležyŭ da deputackaj hrupy «Respublika».
Žanaty, maje dźviuch dačok.
fota z sajtu house.gov.by
