Plemia indziejcaŭ mapuču, jakoje žyvie ŭ Čyli, padaje ŭ sud na «Majkrasoft» za vypusk versii «Ŭindaŭs» na ich rodnaj movie – mapuzuhun. U plemi ličać, što Majkrasoft parušyła ich kulturnuju i hramadzkuju spadčynu, kali pierakłała svajo prahramnaje zabieśpiačeńnie, nie paraiŭšysia z nośbitami movy.
Na hetaj movie havoryć prykładna 400 tysiač čałaviek, pieravažna na poŭdni Čyli. Na prezentacyi ŭ horadzie Los Soses pradstaŭnik Majkrasoftu skazaŭ, što kampanija choča dapamahčy mapuču ŭvajści ŭ ličbavaje stahodździe i «adčynić akno dla śvietu da svajoj kulturnaj spadčyny». Ale ŭ plemi ličać, što Majkrasoft zrabiła ŭsio naadvarot – parušyła ich kulturnuju i hramadzkuju spadčynu, kali pierakłała svajo prahramnaje zabieśpiačeńnie, nie paraiŭšysia z nośbitami movy. Jany navat dasłali Biłu Hiejcu list, u jakim abvinavacili Majkrasoft u «intelektualnym piractvie». Chaŭruśnikami piractva pradstaŭniki plemia mapuču nazvali čylijskaje ministerstva adukacyi.
Mova mapuču – nia pieršaja karennaja amerykanskaja mova, na jakuju byli pierakładzienyja prahramy Majkrasoft. Ŭindaŭs užo vypuskajecca na movach machaŭk, kiečua j inuickaj. Dahetul nivodnaje plemia nie piarečyła suprać «uvachodu ŭ ličbavy viek».
Mapuču, jakim raniej davodziłasia baranić niezaležnaść i ad inkaŭ, i ad hišpanskich kalanizataraŭ, nie źbirajucca zdavacca, i čakajuć vyniku sudovaha pazovu. Sudździa z paŭdniovaha horadu Ciomuka, u sud jakoha była padadzienaja pozva, vyrašyŭ, što takija pytańni nieabchodna razhladać u stalicy. Nieŭzabavie čakajecca pastanova sudu ŭ Santjaha, dzie pazoŭ budzie abo adchileny, abo pryniaty.
«Kali rašeńnie budzie suprać nas, my źvierniemsia ŭ viarchoŭny sud, a ŭ vypadku niaŭdačy – u sud pa pravach čałavieka», – skazaŭ Łaŭtara Łonkan, aktyvist mapuču i kaardynatar arhanizacyi abarony etničnych hrupaŭ u Čyli. Jon taksama ŭvažaje, što ŭrad Čyli, jaki padtrymaŭ prajekt Majkrasoftu, musić zrabić mapuzuhun dziaržaŭnaj movaj pobač z hišpanskaj, paviedamiŭ Reuters.
