U Horadni na šostyja sutki spyniłasia post-haładoŭka probašča i viernic parafii Najśviaciejšaj Panny Maryi Vastrabramskaj, Maci miłasernaści. Paśla taho jak haładoŭnikaŭ padtrymaŭ biskup Kaškievič, staršynia abłvykankamu śpiešna padpisaŭ dazvoł, ź jakim marudziŭ dziesiać hadoŭ.
Akcyja pratestu pačałasia 1 śniežnia, kali haładoŭku abvieścili ajciec Alaksandar Šemiet i 12 parafijanak. Ad poŭnačy 1 śniežnia jany damovilisia ad užyvańnia ježy. Haładoŭka prachodziła ŭ draŭlanaj kaplicy, dzie štodnia źbirajucca na nabaženstvy vierniki. Haładoŭniki damahalisia, kab haradzkija ŭłady dali piśmovy dazvoł na pabudovu chramu, jakoha parafijanie nia mohuć atrymać dziesiać hadoŭ. Najstarejšaja ŭdzielnica haładoŭki mieła 79 hadoŭ.
Ajciec Šemiet kaža: «Pieršapačatkova dumaŭ, što hetuju akcyju padtrymajuć tolki čaćviora parafijanak, ale paśla ranišniaj imšy ŭbačyŭ, što viernic zastałosia našmat bolej. Ja zapytaŭsia, ci zastalisia jany pamalicca, ci ź jakoj inšaj patreby. Adkazali, što taksama buduć paścicca. Kazaŭ, što starejšyja ludzi niachaj pratrymajucca try dni, inšyja piać, ja, jak maładziejšy, budu haładać bolej, kolki Boh dazvolić».
Spačatku havaryłasia pra toje, što vierniki buduć znachodzicca ŭ kaplicy tolki dniom, a na noč viartacca dadomu, ale haładoŭnicy pryniali rašeńnie zastavacca ŭvieś čas unutry zbudavańnia. Koŭdry i paduški ŭdzielnic post-haładoŭki byli raźmieščanyja prosta vakoł ałtara.
«U piatnicu ranicaj prychodziŭ da nas niejki «hebist», štodnia la kaplicy dziažuryć niejkaja mašyna, – havoryć Alaksandar Šemiet. – Prychodziła žurnalistka ź miascovaj hazety «Perspektyva», pytałasia, našto ja daju źviestki pra haładoŭku apazycyjnym vydańniem. Adkazvaju, što dla mianie niama roźnicy miž dziaržaŭnymi i niedziaržaŭnymi, a adkazvaju tym, chto vykazvaje cikavaść da našaha pratestu. Ja nie rablu z haładoŭki palityčnuju akcyju, i žurnalisty, dziakuj im za heta, usio razumiejuć».
Ciaham vychodnych kiepska zrabiłasia dźvium viernicam. Unačy na paniadziełak hipertaničny kryz zdaryŭsia z 68-hadovaj Tarezaj Miłašeŭskaj, jaje zabrała dadomu dačka, jakaja žyvie kala kaplicy. Spadarynia Miłašeŭskaja była vymušanaja pierapynić svaju haładoŭku. Chutkaja dapamoha taksama pryjaždžała da 71-hadovaj Ireny Hiluk, ale apošniaja zastałasia z udzielnikami postu.
U niadzielu haładoŭnikaŭ naviedaŭ biskup haradzienskaj jeparchii Alaksandar Kaškievič razam ź inšymi śviatarami z Horadni, Lidy dy inšych miestaŭ. Biskup Kaškievič vystupiŭ ź nievialičkaj pramovaj pierad imšoj, dzie adznačyŭ, što jon razam ź viernikami ŭ ichnim zmahańni za spraviadlivaść.
Ajciec Šemiet kaža, što nie čakaŭ vizytu takoha vysokaha hościa. «Dla mianie heta była nadzvyčaj pryjemnaja niečakanaść, – kaža śviatar. – Biskup błasłaviŭ nas u našaj spravie, a paśla pryvatna zapytaŭsia, čamu ja nie pryjšoŭ napiaredadni postu-haładoŭki ŭ kuryju, kali mianie vyklikali. Adkazaŭ ščyra, što zabajaŭsia, zabajaŭsia taho, što akcyja nia budzie padtrymanaja».
U poście-haładoŭcy nia ŭdzielničaŭ nivodny mužčyna. «Jany ŭsie bajacca, – kaža ajciec Šemiet. – Paśla, kaniečnie, im budzie soramna pierad hetymi śviatymi žančynami, što haładali nie jany, ale ciapier achvotnych dałučycca da nas mužčynaŭ niama».
Taksama byli vizyty ad pradstaŭnikoŭ Sajuzu palakaŭ, što ŭznačalvaje Anžalika Borys, pryjaždžaŭ polski konsuł. Ź Miensku ŭ Horadniu zavitali Ŭładzimier Mackievič i Dzianis Hil, jaki brali ŭdzieł u post-haładoŭcy viernikaŭ carkvy «Novaje žyćcio». Uładzimier Mackievič kaža: «U haradziencaŭ bolš ścipłyja i askietyčnyja ŭmovy, čym byli ŭ nas. Nas vielmi ciopła pryniali, my raskazali pra ŭłasnuju haładoŭku. hetyja babulki pakinuli na nas vielmi mocnaje ŭražańnie, škada tolki, što siarod udzielnikaŭ niama moładzi i mužčynaŭ. Vidać, hetyja babulki bolš mocnyja ŭ svajoj viery».
U aŭtorak kaplicu naviedaŭ pradstaŭnik rady pa spravach relihijaŭ i nacyjanalnaściaŭ Haradzienskaha abłvykankamu Ihar Papoŭ. «Jon prynios dakument, jaki dazvalaŭ nam budaŭnictva kaściołu, ale my admovilisia jaho pryniać, bo jon byŭ napisany na imia śvieckaha čałavieka. Ja skazaŭ, što list musiać być nakiravany asabista biskupu, – kaža a.Alaksandar. – U sieradu 6 śniežnia da nas u kaplicu pryjechaŭ biskup Kaškievič, jaki pryvioz aficyjny dakument pad podpisam staršyni Haradzienskaha abłvykankamu Ŭładzimiera Saŭčanki, jaki dazvalaje nam budoŭlu. Trymać dalej haładoŭku nia maje sensu, my damahlisia svajho. Biskup Kaškievič padziačyŭ žančynam, što ŭdzielničali ŭ prateście, za ichniju vieru. Ciapier žančyny płačuć i molacca, jany vielmi zadavolenyja, što haładali nie darma».
Heta ŭžo čaćvierty vypadak, kali haładoŭka pratestu dała plon. Raniej pośpiechu dabilisia mienskija pratestanty, viciebskija i bieraściejskija pradprymalniki. Praŭda, u budučyni haładoŭnikaŭ zvyčajna čakali novyja napadki i padkreślenaja ŭvaha orhanaŭ ułady.
Užo najbližejšym časam ajciec Alaksandar Šemiet źbirajecca raspačać budaŭnictva chramu.
❏
Ajciec Alaksandar Šemiet
Naradziŭsia 9 krasavika 1961 u vioscy Lusina (Hancavicki rajon). Tam ža skončyŭ škołu. Paśla vučyŭsia na kuchara ŭ Baranavičach. Pracavaŭ u sanatoryi «Narač». U 1982 h. pastupaje ŭ Ryskuju duchoŭnuju seminaryju, skančaje jaje ŭ 1987 h.. U hetym ža hodzie pracuje vikaryjem u Ryzie i Daŭhapiłsie. Z 1988 śviatarstvuje ŭ Biełarusi, u vioskach Adamavičy i Silivanaŭcy (Haradzienski rajon). U 1992-1994 vučyŭsia ŭ Papskim universytecie ŭ Rymie. Z 1994 pa 1996 praciahvaje pracu ŭ Silivanaŭcach. Ad 1998 ajciec Šemiet uznačaliŭ parafiju Najśviaciejšaj Panny Maryi Vastrabramskaj – Maci miłasernaści, dzie i śviatarstvuje da siońnia.
Hladzi jašče:
Haładoŭka katalikoŭ u Horadni. Fotarepartaž Andreja Lankieviča
