Pałova Ŭkrainy siońnia zadajecca pytańniem: što takoje fafudźja? Hetaja źjava litaralna za niekalki miesiacaŭ zachapiła ŭkrainskaje hramadztva.
"Dobry dzień, ja z Chiersonskaj vobłaści, rasiejec pa nacyjanalnaści. Majoj dačce ŭ škole zabaranili nasić taki atrybut rasiejskaj kultury, jak fafudźja. Arhumentavaŭšy heta tym, što dziaržaŭnaja mova – ukrainskaja. Chaču zapytać, Piotar Mikałajevič: DOKOLE?" Na takoje pytańnie byŭ vymušany adkazvać u internet-čacie lider ukrainskich kamunistaŭ Piatro Simanienka. Z taho momantu ŭkrainski internet zachaplajecca hulnioj u «fafudźju», pa papularnaści paraŭnalnaj chiba ź niadaŭnim zachapleńniem «padonkaŭskaj movaj» i «miadźviedam» u rasiejskamoŭnym Siecivie.
Supołka «Fafudźja», što ŭźnikła na «Žyvym žurnale» ŭ svaich tekstach i dyjalohach madeluje nibyta idealny imperski j čarnasocienny «iścinnaruski» j «iścinnapravasłaŭny» śviet , dzie ŭkrainskaja mova – usiaho tolki dyjalekt rasiejskaj (dyj anhielskaja tolki «tak skazać jazyk»), a zhadka pra niezaležnaść ad Rasiei abaviazkova supravadžajecca vyrazam «čur mianie». Klučavyja paniatki «fafudzizmu» – sama «fafudźja», «dokole?!»(zaklik-pratest suprać pryciaśnieńniaŭ z boku «juščanka-masonskaje» ŭłady), «biardyš» (iścinnaruskaja zbroja) i h.d.
«Fafudźja» hulaje na šavinistyčnych dy kalanijalnych stereatypach.. Tak, «fafudzisty» ŭvieś čas prabačajucca za vykarystańnie «žydabanderaŭskaj klavijatury» (dla hetaha isnuje skaračeńnie I.Ź.I.Ž.B.K. – «iźvinitie za ispolzovanije židobandierovskoj kłaviatury»), albo za toje, što vymušanyja pisać sms-ki «nataŭskimi litarami». Rasiejskamoŭnyja ž teksty tam pišucca z admysłova vydzielenymi «jaciami» i «jerami»: «Jeśli doviedietsia vam', bratija i siestry moi, posieŝať čužbinu bohomierzskuju (IZT), to znajtie, čto jesť tam' tolko odna kanoničieskaja i bohouhodnaja sieť otielej hostinic' – eto Rit'c'-Karł'ton'. Daby natovcy nie raskusili istinno russkich ludiej (IZT), siejaŝich jedinstvienno viernoje pravosłavije (IZT) sriedi supostatov nierazumnych' (IZT) na čužbinie, posłanije o kanoničieskoj sieti otielej hostinic' prišło k nam' v pieśnie na nieponiatnom' anhlijskom, tak skazať, jazykie (IZMT)». (IZT. – prabačcie za taŭtalohiju).
Jość va Ŭkrainie i amatary tradycyjnaha «voka za voka». Udzielniki ukrainskaj «livejournal» supołki «Rasieja, jakaja šakuje» zajaŭlajuć, što ŭ adkaz na antyŭkrainski pijar u rasiejskich ŚMI jany adbivajucca svaim udaram. Na «community» adrazu papiaredžvajuć, što nie raspalvajuć mižnacyjanalnaj varažniečy, bo «jana ŭžo daŭno raspalenaja» i žorstka vykryvajuć rasiejskija niedachopy. Svaimi padychodami hetaja staronka nahadvaje «Biełaruskuju žabu». Tolki što Biełaruskaja žaba zasiarodžanaja na ŭnutrypalityčnych prablemach krainy.
Vo tak uvasablajecca Kupałaŭ zaklik «ludźmi zvacca» na sučasnaj postsavieckaj prastory. Ukrainskaje internet-pakaleńnie, jakoje vyrasła za niezaležnaściu va ŭmovach pavahi da nacyjanalnych kaštoŭnaściaŭ, nie razumieje, čamu musić mirycca z šavinizmam i śćvierdžańniem rasiejskaje vyšejšaści. Jamu nie padabajucca pieśni Hazmanava. Tolki «fafudzisty», zamiest taho, kab palemizavać na internet-forumach, pačali ich vyśmiejvać. Dzieci, jak zaŭždy, razumniejšyja za baćkoŭ.
Źmicier Pankaviec
Fafudźja
bizantyjskaja kaštoŭnaja tkanina, ź jakoj rabiłasia vopratka bazyleŭsaŭ, a taksama vopratka z takoj tkaniny. Paźniej modu na fafudźju pieraniali uschodniesłavianskija kniazi. Pavodle letapisaŭ, kiesar Leŭ u 912 zrabiŭ Alehavym pasłam dary «zołatam i pavałokami, i fafudźjami». Ad CHII st. zamiest fafudźji stali nasić aksamity.
U Internecie pra fafudźju čytajcie
