19 śniežnia aryštavany Kastuś Łukašoŭ, brat palityka Viačasłava Siŭčyka. Jon znachodzicca na «Vaładarcy» i jamu inkryminujuć 364 artykuł Kryminalnaha statutu. Artykuł praduhledžaje da piaci hadoŭ pazbaŭleńnia voli.
29 sakavika arhanizatar namiotavaha miastečka Viačasłaŭ Siŭčyk vyjechaŭ na mašynie z 3-j kliničnaj bolnicy, dzie znachodziŭsia paśla aryštu j źbićcia nieviadomymi supracoŭnikami specsłužbaŭ. Za aŭtamabilem na vačoch śviedkaŭ doŭha bieh adzin nieviadomy. Pavodle abvinavačańnia – heta byŭ milicyjant, a kiroŭca Kastuś Łukašoŭ takim čynam «supraciŭlaŭsia milicyi».
«Heta palityčnaja sprava, – kaža maci Kastusia Halina Siŭčyk, ledźvie strymlivajučy ślozy, – mała im Viačasłava, ciapier i za Kastusia ŭzialisia».
Kastuś Łukašoŭ – syn hieachimika Valancina Łukašova, i sam hieachimik. Jon plonna zajmaŭsia navukaj, ale ŭ 2004 hodzie ad supolnaści «Maładaja Biełaruś» (tudy ŭvachodzili j Sieviaryniec, i Daškievič) balatavaŭsia ŭ parlament i prajšoŭ usie prystupki vybarčaj kałatniečy. Paśla vybaraŭ Łukašoŭ iznoŭ viarnuŭsia da navukovaje dziejnaści.
«Aryšt Kastusia – heta sproba zapałochać hramadztva», – havoryć Viačasłaŭ Siŭčyk, i heta nie pustyja słovy. Aryšt idealna ŭpisvajecca ŭ kampaniju cisku nakonadni miascovych vybaraŭ: to ŭ Baranavičach aktyvistu apazycyi padkinuć patrony, to kandydatku z Haradzienščyny zvolniać z pracy.
Ale ŭ henym vypadku adrasat zapałochvańnia nie zusim zvyčajny. Pad prycełam – palityčnaja internet-supolnaść, stałym udzielnikam jakoj byŭ Kastuś. Na forumach tut.by/ kryštalizavałasia ideja vyłučyć svajho kandydata ŭ Mienharvykankam. Kandydat byŭ vyłučany – i zarehistravany, dziakujučy, u značnaj stupieni, apantanaj pracy samich farumčanaŭ. Ciapier užo i ŭ realnym žyćci.
Kastuś staŭsia daradcam kandydata. Jak abychodzić kvatery, jakija papiery zapaŭniać, što kazać u sprečkach – dośvied minułaj kampanii byŭ hruntoŭna padsumavany i ŭzbahaciŭsia novymi raspracoŭkami.
«Kastuś vystupaŭ za źmieny – z vykarystańniem isnych zakonaŭ, jon praanalizavaŭ, jak i što treba rabić», – kaža farumčanka Volha. «Systema systemaj, – havaryŭ Kastuś, – ale na miescach pracujuć žyvyja ludzi».
«Chacia b niešta zrabić na lakalnym uzroŭni», – dadaje kandydat. Jon naŭmysna balatujecca nie ad partyj i nie afišuje svajho internet-pachodžańnia.
Pieršaje abvinavačańnie – najezd na milicyjanta – było zamienienaje na "niepadparadkavańnie supracoŭnikam milicyi", što praduhledžvaje bolšy termin źniavoleńnia.
«Ale my ŭsio roŭna budziem pracavać», – havoryć Volha. Farumčanie ŭžo naviedali maci Kastusia Halinu Siŭčyk i źbirajucca dapamahać Kastusiu.
«Jaho abvinavačvajuć, što chavaŭsia ad śledztva, – aburajecca Halina Siŭčyk, – Kastuś chadziŭ na pracu, my anijakich pazovaŭ nie atrymali!» «Jak jon moh chavacca, – udakładniaje Volha, – kali davaŭ interviju navat “Sovietskoj Biełoruśsii”?!»
Kryminalnaja sprava «supała» z 65-hodździem Haliny Siŭčyk. Raniej jana pieražyvała za adnaho syna, ciapier u jaje dvajny bol.
