13 śniežnia
Haradzienski žurnalist aryštavany na 7 dzion
Supracoŭnik žurnału «Magazyn Polski» Alaksiej Salej byŭ asudžany sudom Leninskaha rajonu Horadni na 7 dzion aryštu. Jaho zatrymali ŭviečary 12 śniežnia i źvinavacili ŭ parušeńni art.156 (drobnaje chulihanstva) i 166 (niepadparadkavańnie patrabavańniam supracoŭnikaŭ milicyi) KaAP. U sudzie supracoŭniki milicyi śviedčyli, što žurnalist nibyta «niecenzurna vykazvaŭsia». Śviedkaŭ z boku padsudnaha, jakija prysutničali padčas zatrymańnia žurnalista, u zalu sudu nie puścili.
Kiraŭnik viciebskaj arhanizacyi BNF nie prajšoŭ rehistracyi
Kiraŭnika viciebskaj haradzkoj arhanizacyi BNF Uładzisłava Tokarava nie zarehistravali ŭ jakaści kandydata ŭ deputaty ŭ suviazi ź nibyta vialikaj kolkaściu niesapraŭdnych podpisaŭ na jahonuju karyść. Pavodle staršyni kamisii, ludzi, jakija padtrymali Ŭładzisłava Tokarava, admovilisia ad podpisaŭ. Na patrabavańnie spadara Tokarava pakazać jamu akty admovy ad podpisaŭ jamu adkazali, što nie abaviazanyja takija dakumenty pakazvać.
Skasavali prysud byłomu sudździ
Kalehija ŭ kryminalnych spravach Homielskaha abłasnoha sudu skasavała prysud Śvietłahorskaha rajonnaha sudu ab pakarańni byłoha sudździ Siarhieja Jaraševiča za abrazu sudździaŭ z Rahačova. 4 listapada sudździa Śvietłahorskaha rajonnaha sudu Natalla Biełajčuk asudziła S.Jaraševiča na dva hady papraŭčych pracaŭ z utrymańniem na karyść dziaržavy 20% zarobku pavodle prysudu.
Padstavaj dla kryminalnaha pieraśledu Jaraševiča staŭ jahony zapis u knizie zaŭvah i prapanovaŭ Rahačoŭskaha sudu. Jon paraŭnaŭ tamtejšych sudździaŭ U.Sałamiejčuka i M.Rubisava z sudździami 1937 h.
Kryminalnuju spravu suprać S.Jaraševiča ab abrazie rahačoŭskich sudździaŭ, raspačatuju abłasnoj prakuraturaj, budzie iznoŭ razhladać sud Savieckaha rajonu Homielu.
14 śniežnia
U aktyvista Sajuzu palakaŭ apisali majomaść
Supracoŭniki KDB apisali majomaść haradzienskaha aktyvista Sajuzu palakaŭ u Biełarusi Andžeja Lisoŭskaha. Ciapier los majomaści vyrašyć sud. Varta nahadać, što Lisoŭskaha abvinavačvajuć u pieravozcy narkotykaŭ. Zabaronienyja rečyvy nibyta znajšli ŭ jahonaj mašynie prykancy kastryčnika, kali jon ź niepryznanaj staršynioj SPB Anžalikaj Borys viartaŭsia ź Vilni ŭ Biełaruś.
Drančuka mohuć vyzvalić daterminova
Naziralnaja kamisija pry Frunzenskim rajvykankamie Miensku pryniała rašeńnie ab umoŭna‑daterminovym vyzvaleńni aktyvista kampanii pa nazirańni za vybarami «Partnerstva» Cimocha Drančuka. Data vychadu na volu Drančuka vyznačycca 22 śniežnia, kali spravu ab umoŭna‑daterminovym vyzvaleńni hramadzkaha aktyvista razhledzić sud Frunzenskaha rajonu Miensku.
Mikołu Statkieviča prasłuchoŭvajuć
Lider BSDP (Narodnaja Hramada) Mikoła Statkievič paviedamiŭ, što supracoŭniki puchavickaha rajonnaha KDB ustalavali na jahonym pracoŭnym miescy prystasavańnie dla prasłuchoŭvańnia.
M.Statkievič adbyvaje ŭ vioscy Błoń Puchavickaha rajonu Mienskaj vobłaści pakarańnie ŭ vyhladzie abmiežavańnia voli za arhanizacyju masavych akcyj pratestu suprać falsyfikacyi vynikaŭ parlamenckich vybaraŭ i referendumu 2004 h.
Eŭrapiejskija hazety patrabujuć vyzvalić Kazulina
U polskaj «Gazecie Wyborczej», słavackaj «SME», českaj «Lidove Noviny» dy litoŭskaj «Lietuvos Rytas» byli nadrukavanyja adkrytyja listy da svaich uradaŭ z zaklikam zapatrabavać ad biełaruskich uładaŭ nieadkładnaha vyzvaleńnia palitviaźnia Alaksandra Kazulina.
15 śniežnia
U Harodni admovili ŭ rehistracyi 13 siabram AHP
U Horadni ad AHP zarehistravanyja tolki dva čałavieki — kiraŭnik Haradzienskaj abłasnoj arhanizacyi AHP Jury Istomin i staršynia Haradzienskaj haradzkoj arhanizacyi AHP Źmicier Słucki. Jany zarehistravanyja kandydatami ŭ deputaty Haradzienskaha abłasnoha savietu deputataŭ i Haradzienskaha haradzkoha savietu deputataŭ.
Astatnim 13 siabram AHP admovili ŭ rehistracyi. Nahoda — nibyta pamyłki ŭ padatkovych deklaracyjach i inšyja pryčepki.
140 studentaŭ BDPU vykazalisia ŭ padtrymku zvolnienaha vykładčyka
Bolš za 140 podpisaŭ studentaŭ druhoha kursu histaryčnaha fakultetu ŭ padtrymku Juryja Bačyščy, vykładčyka katedry słavianskaj historyi BDPU, byli pieradadzienyja ŭ sud i prykładzienyja da spravy ab adnaŭleńni vykładčyka na pracy. Jon byŭ zvolnieny paśla prezydenckaj kampanii tolki za toje, što mieŭ śmiełaść być naziralnikam na adnym z vybarčych učastkaŭ.
Daškievič zastaniecca ŭ źniavoleńni
Mienski haradzki sud pakinuŭ biaź źmienaŭ rašeńnie sudu Kastryčnickaha rajonu Miensku, zhodna ź jakim lider niezarehistravanaha «Maładoha frontu» Źmicier Daškievič asudžany na paŭtara hodu źniavoleńnia. Źmitra aryštavali sioleta 15 vieraśnia. 1 listapada sud pakaraŭ jaho za ŭdzieł u niezarehistravanaj arhanizacyi. Pakarańnie Z.Daškievič adbyvaje ŭ Škłoŭskaj papraŭčaj kalonii.
U Homieli niezaležnych kandydataŭ nie rehistrujuć
Homielskaja haradzkaja vybarčaja kamisija zarehistravała kandydatami ŭ deputaty tolki piać z dvaccaci demakratyčnych aktyvistaŭ, jakija vysoŭvalisia kandydatami ŭ deputaty haradzkoha savietu. Siarod ich — dva siabry AHP, pa adnym — ad partyi BNF, KCHP‑BNF i PKB.
Astatnich demakratyčnych pradstaŭnikoŭ adsiejali na padstavie nibyta niapeŭnych źviestak u deklaracyjach i ankietach, a taksama vyjaŭlenaj značnaj kolkaści niesapraŭdnych podpisaŭ vybarščykaŭ.
16 śniežnia
Śvietłahorsk salidarny z palitviaźniami
U noč na 16 śniežnia aktyvisty śvietłahorskaje supołki niezarehistravanaha «Maładoha frontu» praviali akcyju salidarnaści sa źnikłymi j palitźniavolenymi. U šmatludnych miescach horadu źjavilisia plakaty z nadpisami «Dzie Zacharanka?», «Dzie Zavadzki?», «Dzie Hančar?», «Svabodu Daškieviču!», «Svabodu Kazulinu!», «Svabodu Fińkieviču!» Z ranicy śvietłahorcy ŭbačyli na aŭtobusnych prypynkach, doškach abjavaŭ partrety źniavolenych i tych, chto zaraz adbyvaje pakarańnie pa palityčnych matyvach.
Salidarnaść z palitviaźniami ŭ Baranavičach
A 20‑j hadzinie baranavickaja moładź zapaliła śviečki ŭ haradzkim parku na znak salidarnaści z asudžanym lideram «Maładoha Frontu» Źmitrom Daškievičam .
Vinšavańni palitviaźniam
Uviečary na pošcie Centralnaha čyhunačnaha vakzału Miensku adbyłasia akcyja salidarnaści z palityčnymi viaźniami Biełarusi. Aktyvisty niezarehistravanaha «Maładoha Frontu» i siabry inšych arhanizacyjaŭ razam pavinšavali ludziej, što znachodziacca ŭ niavoli za svaju palityčnuju pazycyju.
Pry kancy akcyi pierad hałoŭnym uvachodam u čyhunačny vakzał byŭ utvorany łancuh salidarnaści: maładyja ludzi trymali śviečki i partrety palitviaźniaŭ.
17 śniežnia
Salidarnaść u Polščy
U dzieviaci haradoch Polščy prajšli akcyi salidarnaści ź Biełarusiaj. Akcyi prajšli ŭ Krakavie, Lublinie, Sopacie, Poznani, Ŭrocłavie, Łodzi, Biełastoku, Pułtusku i Varšavie. Ich zładzili biełaruskija studenty, što vučacca na stypendyjach imia Kastusia Kalinoŭskaha.
U Baranavičach zatrymlivajuć moładź
Unačy ŭ Baranavičach byli zatrymanyja moładzievyja aktyvisty Artur Sasim, Alaksandar Astroŭski i Jarasłaŭ Hryščenia. Na chłopcaŭ byli składzienyja pratakoły za «raspaŭsiud drukavanych materyjałaŭ biez vychodnych źviestak».
