Bankir na ŭsie palityčnyja kalizii hladzić sa svajoj zvanicy. Siońnia daviałosia hutaryć sa Stanisłavam Bahdankievičam. Były kiraŭnik Nacbanku ličyć: Rasieja naładziła naftahazavy šantaž z metaj damahčysia ŭviadzieńnia adzinaha rubla. Va usiakim razie, heta adna z samych žadanych metaŭ.
"Ułady siońnia cytujuć mianie biez spasyłki", — žartuje prafesar Bahdankievič.
A havorka voś pra što. U 2003 hodzie, kali Maskva ŭpieršyniu rubam pastaviła pytańnie adzinaj valuty, Alaksandar Łukašenka raptam zhadaŭ pra intelekt svaich palityčnych apanentaŭ.
Na adnoj naradzie prahučała: jość ža i ŭ apazicyi, maŭlaŭ, para-trojka razumnych hałovaŭ. Vaźmicie taho samaha Bahdankieviča...
Były staršynia ŭpravy Nacbanku kaža, što "heta byŭ chitry chod. Aficyjny kiraŭnik zahadzia viedaŭ majo skieptyčnaje staŭleńnie da pierachodu na rasiejski rubiel... Dni za try da toj narady mianie razam z šeraham niezaležnych ekspertaŭ užo zaprašali na dyskusiju da Prakapoviča".
Tak što ŭłada, kali prypiače, umieje skarystacca i apalnymi mazhami. Tady pakazali Pucinu: hladzi, što da adzinaj valuty, dyk u nas poŭnaje supadzieńnie dumak ułady i apazycyi! Tamu adkładziem toj prajekt da lepšych časoŭ (a miž tym užo ŭsie terminy byli raśpisanyja: ź 1 lipienia puskajem u abaračeńnie bieznajaŭny rasiejski rubiel i h.d.).
Mienavita tady Bahdankievič u liku inšaha padkinuŭ i dyplamatyčnuju tezu, zručnuju dla pieramovaŭ z Rasiejaj. Maŭlaŭ, adzinaja valuta musić być chiba viancom usiaho pracesu. Nielha budavać dom z dachu.
Na praktycy heta aznačała, što pytańnie adkładajecca na śviatoje nikoli. Bo ŭžo tady było vidavočna: ułahodzić, harmanizavać uvieś kompleks dačynieńniaŭ u miežach butaforskaj "sajuznaj dziaržavy" baki nia zmohuć apryjory, bo kožny ciahnie koŭdru na siabie.
Potym afaryzm pra "vianiec" raz-poraz pačali ŭžyvać biełaruskija načalniki, kali Maskva čarhovy raz pryciskała ŭ pytańni abjadnańnia hrašovych systemaŭ.
Žurnalisty niejak spytalisia ŭ Bahdankieviča: a ci razumiejecie vy, što tym razam stali tolki kartaj u palityčnaj hulni?
Sapraŭdy, kamuści z apazycyjanieraŭ zručniej fihuravać u biełych palčatkach. Nijakich kampramisaŭ z režymam!
Bahdankievič ža adkazaŭ: "Kali choć trochi paspryjaŭ tady biełaruskamu suvierenitetu, dyk heta ŭžo apraŭdana. Režym rana ci pozna źmienicca. A niezaležnaść budzie nazaŭsiody".
Darečy, całkam imavierna, što i pa siońnia ŭ schoviščy lažać hrošy z "Pahoniaj", jakija staršynia ŭpravy Nacbanku Bahdankievič zamoviŭ u Niamieččynie za časami Kiebiča. Mierkavałasia, što narmalovaja valuta prydzie na źmienu "zajčykam", kali ŭtajmujecca inflacyja.
Ale tut pačałasia prezydenckaja era, i ŭ liku inšaha skasavali symboliku.
A za tyja miachi kupiuraŭ z "Pahoniaju" niemcam zapłacili pad 20 miljonaŭ dalaraŭ. Škada niščyć!
"Mnie zaraz, naturalna, nie dakładajuć, ale nia vyklučana, što tyja hrašovyja blanki i dasiul lažać u schoviščy. Čakajuć svajho času!" — śmiajecca Bahdankievič.
