Siońnia vyśvietliłasia: na "błakitnaje paliva" pa $75 Miensk taksama nia zhodny. Ci začynić Maskva zasaŭku?
Presavy sakratar "Hazpromu" Kupryjanaŭ abvieściŭ, što siońniašnija pieramovy ź biełaruskim bokam pravalilisia. Chacia, maŭlaŭ, Miensku prapanoŭvalisia najkamfortniejšyja ŭmovy.
Havorka idzie pra haz pa $105 i płaŭny pierachod na rynkavyja dačynieńni ciaham čatyroch hadoŭ (!). Pry adnoj "maleńkaj" umovie: addajcie narešcie pałovu "truby"! Tady ź 1 studzienia faktyčna daviałosia b płacić za "błakitnaje paliva" pa $75 (z ulikam koštu akcyjaŭ "Biełtranshazu").
Ale pieršy vice-premjer Siamaška, jaki siońnia sustrakaŭsia ŭ Maskvie z kiraŭnikom "Hazpromu" Mileram, treba dumać, mieŭ dyrektyvu kštałtu viadomaj stalinskaj "Ni kroku nazad!".
Miensk aŭtamatam dziaŭbie pra smalenskija taryfy.
Dyk ci začynić Maskva hazavuju zasaŭku na Novy hod?
Palitolah Andrej Fiodaraŭ adznačaje, što, va ŭsiakim razie, rasiejcy nastrojenyja jak nikoli rašuča. Pra bajavy duch śviedčyć, na dumku majho surazmoŭcy, ichniaja nastupalnaja, biaźlitasnaja taktyka na inšych frantach — naftavym, cukrovym i h.d.
Ekspert dadaje: Kramlu zaraz važna nia stracić tvar. Zvyš taho, jon, zdajecca, užo nie abciažarany intehracyjnymi kompleksami.
A na što tady raźličvaje biełaruskaje kiraŭnictva? Andrej Fiodaraŭ miarkuje, što jano navažyłasia da kanca hrać na viadomaj kramloŭskaj fobii — zaściarozie stracić apošniaha chaŭruśnika.
Jašče adzin ekspert — Jarasłaŭ Ramančuk vykazaŭ mierkavańnie, što skandał z adklučeńniem hazu de-fakta vyhadny Miensku. Tady možna budzie z čystym sumleńniem paviesić na Rasieju ŭsich sabakaŭ. To bok patłumačyć jejnym imperskim vierałomstvam niepaźbiežny pierachod na novyja košty da taryfy va ŭsich sferach unutry krainy.
Zrešty, mo' niama licha biez dabra? Mo' biełaruskaje načalstva choćki-niachoćki raspačnie narešcie ekanamičnuju transfarmacyju?
Voś u hetym Ramančuk, jak vyśvietliłasia, akurat i nia ŭpeŭnieny. Nia vyklučana, kaža, što niejki čas sacyjalistyčny eksperyment budzie doŭžycca jašče ŭ bolš vyrodlivych formach. Chacia ŭvohule, biezumoŭna, cisk vonkavych čyńnikaŭ padychodzić da krytyčnaj rysy.
Nu a što zastajecca paspalitamu ludu? Chiba što rychtavać da navahodniaha maskaradu adhaźniki. Budzie nadta aktualna ŭ vypadku hazavaj vajny!
