Čałaviek hodu

Siła voli

Tradycyjna «Naša Niva» vyznačaje Čałavieka hodu ŭ Biełarusi. Sioleta my nia mieli vahańniaŭ na hety kont. U čym prajaŭlajecca Asoba? U tym, što jana prajaŭlaje volu. Čałaviekam hodu sioleta staŭ kožny hramadzianin, jaki mieŭ volu vyjści na Płošču ŭ Sakaviku. Manifestanty padtrymlivali nia niejkaha kankretnaha kandydata. Jany adstojvali ŭłasnaje prava na palityčnyja pierakanańni i kanstytucyjnaje prava narodu być krynicaj ułady. Čałaviek hodu — heta i chłopiec Iljin, jaki sprabavaŭ pranieści ŭ namiotavy haradok bijatualet, i byŭ za heta da straty prytomnaści źbity amonaŭcami. I toj nieviadomy, jaki 19 sakavika ŭźlez ź bieł-čyrvona-biełym ściaham na dach aŭtobusu numar 100.

I toj, chto, abviazaŭšysia sasiskami, sprabavaŭ prarvacca da manifestantaŭ i siadzieŭ za heta na Akreścina.

«Naša Niva» hanarycca, što na Płoščy ŭvieś čas stajali i našy supracoŭniki. Hazeta infarmavała pra tyja padziei i analizavała ich vyčarpalna, a hałoŭny redaktar pieradaŭ svoj repartaž u numar z turmy na Akreścina. «NN» płaciła za svaju pazycyju zabaronaj na raspaŭsiud, paśla na raźmiaščeńnie ŭ Miensku. Hetaha hodu z historyi «NN» i z historyi Biełarusi nia ścierci nijakim paklopnikam. Hazeta praciahvaje vychodzić dziakujučy voli svaich čytačoŭ.

Hieroj hodu

Źmicier Daškievič. Lidera niezarehistravanaha «Maładoha frontu» vyciskali z krainy — zaviali suprać jaho kryminalnuju spravu, ale pry hetym praciahvali vypuskać za miažu. Źmicier vybraŭ pajści ŭ turmu za svaje pierakanańni. A jahonuju arhanizacyju nie razvalili ni represii, ni krytykany, jana praciahvaje dziejničać.

Kryejtary hodu

Aŭtary značkaŭ «Za Svabodu». Fenomenam stała papularnaść bieła-čyrvonych značkaŭ z Ptuškaj-Svabodaj. Hetyja znački prydumała hrupa kryejtaraŭ na čale z mastactvaznaŭcam Vacłavam Areškam. Hutarku ź im čytajcie na staroncy 10.

Tandem hodu

U biełaruskaj palitycy źjaviŭsia tandem. I Milinkievič, i Kazulin apraŭdali pradkazańni. Milinkievič arhanizavaŭ Płošču, nie ciahnučy pry hetym koŭdru na siabie. Pravioŭ vybarčuju kampaniju, u vielmi składany abstavinach, nie zrabiŭšy značnych pamyłak. Apanenty z apazycyi vinavacili jaho ŭ zališniaj miakkaści i adsutnaści prahramy, ale jon, tym nia mienš, dasiahnuŭ rejtynhu papularnaści (18,2 %), jakoha za apošnija dvanaccać hadoŭ nia mieŭ nivodzin apazycyjny palityk.

Voś što piša pra Milinkieviča tydniovik dla dziełavych ludziej «Biełorusy i rynok»: «Jašče hod tamu mała chto viedaŭ pra palityka Alaksandra Milinkieviča, a siońnia jon symbalizuje imknieńnie da demakratyi i eŭrapiejskaje budučyni socień tysiačaŭ hramadzianaŭ Biełarusi. A.Milinkievič zdoleŭ «raskrucicca» ŭ niespryjalnych umovach infarmacyjnaj blakady j palityčnaha cisku. Jahonyja vybarcy, niahledziačy na zapałochvańnie śmiarotnym pakarańniem, vyjšli na Płošču abaraniać svoj vybar.

Dumajecca, fenomen A.Milinkieviča ŭ tym, što hety palityk vyhladaŭ uvasableńniem tych jakaściaŭ, pa jakich užo zanudziŭsia biełaruski vybarščyk, i jakija zusim nie ŭłaścivyja ciapierašniamu biełaruskamu kiraŭnictvu. Vybarščyk pabačyŭ u im palityka, jaki moža ŭvajści na roŭnych u klub prezydentaŭ eŭrapiejskich krainaŭ».

Niahledziačy na vysiłki prapahandy i jaje dobraachvotnych pamočnikaŭ u stanie apazycyi, Milinkievič zastaŭsia lideram de-fakta, a nie de-jure. Vyjaŭny kantrast z Hančarykam, jaki paprostu vyjechaŭ z krainy nieŭzabavie paśla «svaich» vybaraŭ.

Kazulin ad pačatku byŭ ciomnym konikam, ad jakoha čakali siurpryzaŭ. I jon ich davaŭ. Svaimi televystupami, svaim pachodam na Akreścina, svajoj upartaj haładoŭkaj.

Imia hodu

U paŭstańni Kastusia Kalinoŭskaha ŭdzielničaŭ pradzied Alaksandra Milinkieviča. Ideały Kalinoŭskaha akazalisia blizkimi siońniašnim baraćbitam za svabodu. Manifestanty ŭ Sakaviku pierajmienavali Kastryčnickuju płošču ŭ Płošču Kalinoŭskaha. Hetaje ž imia nosić polskaja prahrama stypendyjaŭ dla represavanaj moładzi. Jana pazbaviła moładź strachu vyhnańnia ź dziaržaŭnych universytetaŭ i daje mahčymaść trom sotniam junakoŭ atrymać eŭrapiejskuju padrychtoŭku.

Uciakač hodu

Pradprymalnik z Vaŭkavysku Mikałaj Aŭtuchovič mieŭ dziorzkaść uciačy z-pad chatniaha aryštu. Jon chavaŭsia ŭ Miensku, pakul nia byŭ aryštavany.

Sychod hodu

Narodny piśmieńnik Biełarusi Janka Bryl byŭ apošnim z tych piśmieńnikaŭ stahodździa, na vačach jakich śviet rujnavaŭsia i paŭstavaŭ nanoŭ; jaho žyćciovy dośvied achoplivaŭ uvieś biełaruski XX viek, z vajnoju i žyćciom pad Polščaj uklučna. Jon pajšoŭ u inšy śviet jak nieasprečny aŭtarytet biełarusaŭ. Jon byŭ maralnym etalonam, adnym z tych Sakrataŭ, jakija, pamirajučy, zastajucca, pakidajuć pa sabie darohu: maralnuju daktrynu, uzor pavodzinaŭ i myśleńnia. Jon loh na spačyn na mohiłkach u Kałodziščach 27 lipienia.

Znak hodu

Vyłučeńnie Alesia Bialackaha na Nobeleŭskuju premiju miru było pryznańniem maralnych zasłuhaŭ biełaruskaha niezaležnaha hramadztva. Tolki vyłučany, Bialacki adrazu trapiŭ u piaciorku imaviernych pretendentaŭ na ŭznaharodu.

Skandalisty hodu

Čaves i Achmadynedžad. Prezydentami, pra jakich najbolš havaryli ŭ śviecie, stali Čaves z Venesueły, jaki z trybuny AAN nazvaŭ Buša djabłam i pieražahnaŭsia, a taksama Achmadynedžad ź Iranu, jaki admaŭlaje Hałakost i zaklikaŭ ścierci Izrail z mapy śvietu.

Chapała aryhinalnych zajavaŭ i ŭnutry krainy.

Kontraprapahandysty hodu

Ściapan Sucharenka i jaho pacuki. Zastrašvajučy vybarcaŭ, staršynia KDB Ściapan Sucharenka prasłaviŭsia zajavaj, što ekstremisckija elementy padrychtavali 19 sakavika terakty, padpały i atručvańnie vodapravodu dochłymi pacukami. Paśla hetaha jon i hienprakuror krainy pahražali ŭsim, chto navažycca vyjści na vulicy 19 sakavika, śmiarotnym pakarańniem. U vyniku Miensk u dzień vybaraŭ zdavaŭsia miortvym horadam. A tym nia mienš znajšlisia niekalki dziasiatkaŭ tysiačaŭ hramadzianaŭ, jakija pryjšli na centralnuju płošču stalicy.

«Pastradaŭšy» hodu

Radavy Łosieŭ. Pacukami sprava nia skončyłasia. Paŭstała patreba apraŭdać razhon demanstracyi 25 Sakavika, pakazany pa suśvietnych telekanałach. Tak źjaviłasia kranalnaja historyja pra radavoha Łosieva, jakoha ciažka paranili raźjušanyja manifestanty. BT pakazvała až vosiem «ciažka paranienych» vajennasłužačych u hipsie, nakładzienym na kamuflažnuju formu. Krychu mienš «pastradali» sami rabotniki BT, jakich pa?źviersku zakidali śniežkami.

Eŭrapieizatarka hodu

Lidzija Jarmošyna. Bajka pra unter-aficeraŭ, jakija sami siabie vysiekli — heta byli jašče kvietački. Jak my daviedalisia ź interviju Alaksandra Łukašenki, «na hetych vybarach za mianie prahałasavała 93,5 %. Ale my zrabili 86 %. Eŭropa skazała nam, heta nie eŭrapiejski pracent. Voś zrobicie eŭrapiejski pracent, i my pryznajem Vašy vybary». I Lidzija ž zrabiła! A Eŭropa...

«Kantrabandysty» hodu

Anžalika Borys i jaje paplečniki pa Sajuzu palakaŭ byli źvinavačanyja ŭ kantrabandzie amfetaminu. Narkotyk znajšli ŭ mašynie, u jakoj jechała Borys, u lusterku zadniaha vyhladu. Usia biaskoncaja kampanija suprać Borys i polskich aktyvistaŭ była zadumanaja, zdajecca, z metaj nahniatańnia antypolskich nastrojaŭ i atajasamleńnia haradzienca Milinkieviča z palakami. Adnak hetaja kampanija moža mieć balučy dla biełaruskaha hramadztva vodhuk u budučym. Cikava, što Polšča, niahledziačy na kiepskija adnosiny ź Biełaruśsiu, da apošniaha blakavała rašeńnie Eŭrasajuzu ab pazbaŭleńni našaj krainy handlovych preferencyjaŭ.

Antybiełarus hodu

Rasiejski palitolah Andrej Suzdalcaŭ prapanavaŭ departavać biełarusaŭ z Rasiei. Heta była adna ź jaho idejaŭ u ramkach kampanii, jakaja b mieła na mecie dabicca pieradačy «Biełtranshazu» pad kantrol «Hazpromu». Suzdalcaŭ maje asabistyja rachunki z našaj krainaj: na pačatku hetaha hodu jaho departavali ź Biełarusi.

Tvar hodu

Biełaruska Kaciaryna Damańkova stała supermadellu śvietu pavodle versii ahienctva «Ford Modełz». Musić, u tym, što biełaruski takija pryhožyja, jość zasłuha i biełaruskich mužčynaŭ!

Mamy hodu

Julija Małachoŭskaja, Kryścina Vituška i Alina Stefanovič, stvaralnicy sajtu dzietki.org i supolnaści biełaruskamoŭnych siemjaŭ stalicy. Biełarusy datul buduć biełarusami, pakul niechta ŭ Biełarusi budzie havaryć pa-biełarusku. Kryścina, Julija i Alina nia stali čakać dapamohi ad dziaržavy ci pieramieny ŭłady. Jany hadujuć dziaciej biełarusami tut i ciapier, viedajučy: dzieci mohuć raści biełaruskamoŭnymi tolki kali ŭ ich budzie biełaruskamoŭnaja kampanija. Niamožna zachavać biełaruskamoŭnaść u miežach adnoj siamji.