Ciapier miasa, małako j rybu zmohuć pastaŭlać u Rasieju tolki tyja pradpryjemstvy, jakija pravieryŭ Raśsielhasnahlad. Taki paradak dziejničaje dla krainaŭ, jakija ŭ Rasiei nazyvajucca "dalokim zamiežžam", Bałtyi i Ŭkrainy. Dla Ŭkrainy taki paradak byŭ uviedzieny hod tamu i nie nanios značnaj škody ŭkrainskaj ekanomicy.
Jak zajaviŭ u čaćvier kiraŭnik rasiejskaj Federalnaj słužby veterynarnaha j fitasanitarnaha nahladu Siarhiej Dankviert, z hetaha momantu Rasieja budzie impartavać miasa, małako j rybu ź Biełarusi tolki z atestavanych Raśsielhasnahladam pradpryjemstvaŭ.
Faktyčna, heta pieršyja handlovyja sankcyi suprać «bratniaje krainy». Takim čynam, ich uviadzieńnie raspačałosia z žyviołahadoŭčaje pradukcyi, jakoju słavicca Biełaruś.
Taki samy režym dziejničaje dla krainaŭ Bałtyi i Ŭkrainy. Dla Ŭkrainy taki paradak byŭ uviedzieny hod tamu. Varta adznačyć, što jon nie nanios značnaj škody ŭkrainskaj ahrarnapramysłovaj halinie.
Na dumku rasiejskaha internet-vydańnia gazeta.ru, pryčyna, čamu akurat ciapier nadumalisia pieravieści biełaruskija pradpryjemstvy ŭ razrad «dalokazamiežnych», nie z sfery hihijeny, a ŭ vostrym naftahazavym konflikcie miž krainami. A za im, u svaju čarhu, imknieńnie Rasiei dabicca ad Łukašenki vykanańnia intehracyjnych abaviazkaŭ, jakija toj ščodra razdavaŭ.
U apošnija chviliny minułaha hodu Biełaruś pad ciskam Maskvy padpisała damovu ab pieradačy "Hazpromu" kantrolu nad "Biełtranshazam", pierachodzie na eŭrapiejskija ceny ad 2011 hodu i pastaŭkach hazu ŭ Biełaruś pa 100 dalaraŭ za tysiaču kubametraŭ u nastupnym hodzie. Navat premjer-ministar Biełarusi Siarhiej Sidorski pryznaŭ toj kantrakt "u cełym niavyhadnym dla Biełarusi".
A z 1 studzienia "Biełnaftachim" adroksia zakupak nafty z Rasiei z 1 studzienia, paśla ŭviadzieńnia našaj susiedkaj ekspartnych mytaŭ na pastaŭki nafty ŭ Biełaruś. U vyniku hetaha kroku čornaja syravina padaražeła dla našaj krainy na 180 dalaraŭ. Raniej Biełaruś atrymlivała naftu biaz myta, u adroźnieńnie ad Ukrainy ci Litvy, jakija płacili poŭnyja hrošy.
Pra pavyšeńnie mytaŭ stała viadoma 11 śniežnia, kali adpaviednaje rašeńnie padpisaŭ rasiejski premjer Fradkoŭ. Tym nia mienš, vyrašeńnie prablemie dahetul nia znojdzienaje.
Sprabujučy vyrvać ad Maskvy palohki, Alaksandar Łukašenka 4 studzienia zahadaŭ abkładać biełaruskim mytam hihancki naftavy tranzyt praź Biełaruś.
U adkaz u noč na paniadziełak ŭpieršyniu byli prypynienyja pastaŭki nafty ŭ Eŭropy praz naftapravod "Družba". Rasiejskaja "Tranśniefť" abumoviła heta adpampoŭvańniem nafty ŭ Biełarusi z tranzytnaha naftapravodu.
Paśla telefonnaj razmovy Łukašenki z Pucinym u sieradu myty byli nieadkładna skasavanyja, Biełaruś na patrabavańnie "Tranśniefti" viarnuła adpampavanuju syravinu. U čaćvier premjer Siarhiej Sidorski vypraviŭsia ŭ Maskvu na pieramovu z rasiejskim kaleham Fradkovym.
Biełaruski ŭrad raźličvaje padpisać choć jaki varyjant padziełu myta na ekspart naftapraduktaŭ. Sidorski chacieŭ by, kab 50 % myta traplała ŭ biełaruski biudžet. Adnak biełaruskaja dola pošlinaŭ moža akazacca i nižejšaju za 50 %.
Pa darozie ŭ Maskvu Sidorski siońnia zajaviŭ, što pryniatyja Maskvoj zachady "skiravanyja na padparadkavańnie ekanomik inšych krainaŭ". Hetyja rezkija słovy majuć hrunt pad saboj. Tolki što Biełaruś nia maje čym adkazać, akramia jak ahryzacca.
Rasieja praciahvaje žorstki presinh. Abmiežavańnie, pra jakoje abvieščana siońnia, -- heta čarhovy akt šantažu.
U ciažkim procistajańni ŭrad Łukašenki nia moža raźličvać pa palityčnuju i finansavuju dapamohu Zachadu, jaki ŭ analahičnych sytuacyjach dapamoh vytrymać cisk i pierabudavać haspadarku spačatku krainam Bałtyi, a apošnija hady – Ukrainie i Hruzii. Hetyja krai pieražyli "naftavy šok" u pieršaj pałovie 90-ch, a "hazavy šok" u minułyja hady bieź vialikaha kłopatu dla ekanomik.
Jak raspaviali "Hazietie.Ru" ŭ Raśsielhasnahladzie, «pakul nivodnaje žyviołahadoŭčaje pradpryjemstva Biełarusi rasiejskim viedamstvam akredytavanaje nie było. Plan akredytacyi maje być zaćvierdžany 15 studzienia na sustrečy kiraŭnikoŭ veterynarnych słužbaŭ Biełarusi j Rasiei.
Ad uviedzienych sankcyj pacierpiać, u pryvatnaści, "Savuškaŭ pradukt" (Bieraście), "Biełavieskija syry" (Pružany-Vysokaje), "Biarozka" (Biaroza) i inšyja kampanii, što asvojvali rasiejski rynak pad ciopłaj apiekaj byłoha bieraściejskaha staršyni abłvykankamu, a ciapier pasła ŭ Rasiei Vasila Daŭhalova. Daŭhaloŭ, asabisty siabar A. Łukašenki, byŭ, darečy. pryznačany na hetuju pasadu paśla šerahu vypadkaŭ, kali pad kołami jahonaha vykankamaŭskaha aŭtamabila pad Bieraściem hinuli ludzi. Hetyja zdareńni mocna padarvali jahonuju papularnaść. Takoha čałavieka možna było vypuścić na adkaznuju pasadu ŭ Maskvu biaz ryzyki, što hety čałaviek paviadzie ŭłasnuju palityčnuju hulniu. Jak bačym, intaresy Biełarusi takomu pasłu abaraniać pakul nia duža ŭdajecca.
❏
Pa čym udarać sielskahaspadarčyja sankcyi?
Pa-pieršaje, pa miasakambinatach i, adpaviedna, žyviołahadoŭčych kompleksach. Pavodle vynikaŭ 2006 hodu Biełaruś zaniała šostaje miesca pa pastaŭkach u Rasieju śvininy paśla Brazylii, Danii, ZŠA, Kanady j Niamieččyny. Jak padaje rasiejskaja mytnia i "Rosstat", u pieršym paŭhodździ 2006 hodu ŭ Rasieju było pastaŭlena pa imparcie kala 563 tys. t śviežaha j marožanaha miasa. Biełaruskaja dola ŭ imparcie padskočyła, bo biełarusy sprytna apanavali nišu zabaronienaj dla ŭvozu ŭ Rasieju ŭkrainskaj miasnoj pradukcyi.
Dola Biełarusi ŭ imparcie masła ŭ 2006 hodzie dasiahnuła bolš čym 45 % (38 % u 2005-m). Impart suchoha małaka ŭ Rasieju praktyčna całkam ažyćciaŭlaŭsia Biełaruśsiu (bolš čym na 80 %).
Vykanaŭčy dyrektar Małočnoha sajuzu Rasiei Ŭładzimir Łabinaŭ u sieradu navat vykazaŭ dumku, što na biełaruskuju małočnuju pradukcyju varta ŭvieści paŭnavartyja myty ŭ pamiery 15 %. Tolki heta, na jahonuju dumku, moža ŭratavać Rasieju ad biełaruskaha dempinhu j reekspartu.
Fota z sajtu kp.ru
