Na fota — presavaja kanferencyja z udziełam staršyni CVK Lidzii Jarmošynaj. |
Sioletnija miascovyja vybary nia stalisia takimi vynikovymi dla apazycyi, jak čatyry hady tamu. Tady deputatami roznych uzroŭniaŭ stali bolš za sotniu demakratyčnych aktyvistaŭ. Siarod pieramožcaŭ toj kampanii byli Juraś Hubarevič, Aleś Zarambiuk, Aleś Čyhir, Aleś Michalevič, jaki paźniej zmahli vyraści ŭ lideraŭ ciapierašniaj demakratyčnaj apazycyi.
Napiaredadni hałasavańnia ceły šerah kandydataŭ źnialisia ź pieradvybarčaj honki, adznačyŭšy, što nie źbirajucca hulać pa praviłach, jakija dyktuje ŭłady. Siarod takich vyłučajecca lider AHP Anatol Labiedźka, jaki pryniaŭ rašeńnie pra svajo źniaćcio za dva dni da vybaraŭ.
U piatnicu‑subotu pravaachoŭnyja orhany praviali ceły šerah preventyŭnych zatrymańniaŭ apazycyjnych aktyvistaŭ, što prymali ŭdzieł u kampanii. Bolšaść aktyvistaŭ musili vychodzić z turmaŭ u paniadziełak‑aŭtorak. Achviarami hetaj demanstracyi siły stali Siarhiej Sałaš (Barysaŭ), Maksim Hubarevič, Jaŭhien Skrabutan, Staś Pačobut (usie — Horadnia), Siaržuk Huminski (Vorša), kandydaty ŭ deputaty Alaksandar Vasiljeŭ i Alaksandar Ramanovič (abodva – Pinsk) i inš, usiaho kala 20 čałaviek.
Ahulnaja kolkaść niezaležnych kandydataŭ sioleta składała kala 230 čałaviek, mienš za adzin 1% ad ahulnaj kolkaści kandydataŭ. Taksama treba adznačyć, što bolšaść alternatyŭnych kandydataŭ balatavałasia ŭ stalicy. Na niekatorych učastkach stalicy było pa niekalki apazycyjnych aktyvistaŭ. U cełym ža ŭ krainie vybaru nie było nijakaha. Na adno miesca prypadała navat nia dva, a 1,04 % kandydata.
Sioleta ŭpieršyniu miascovyja vybary prachodzili ŭ adzin tur, u adpaviednaści z novym vybarčym zakanadaŭstvam. Hetym razam siarod niezaležnych kandydataŭ pieramahli adzinki.
Pieramohu ŭ Mahilovie dastaŭ Alaksandar Ahiejeŭ, jaki druhi raz zapar stanovicca deputatam miascovaha harsavietu. Cikava, što na akruzie, na jakoj pieramoh Ahiejeŭ, nie było kandydata ad ułady. Dyrektarka škoły źniałasia jašče zadoŭha da vybaraŭ. U vioscy Bryli na Mahiloŭščynie deputatkaj sielskaha savietu abrali siabra partyi BNF Ału Jackovu.
Ekanamist Źmicier Babicki pa papiarednich padlikach atrymlivaje pieramohu na vybarach u barysaŭski miascovy harsaviet. Jon na 37 hałasoŭ apiaredziŭ dyrektara barysaŭskaha aŭtaparku № 3 Alaksandra Škredava. Babicki pravioŭ dobra svaju vybarčuju kampaniju, arhanizavaŭ niezaležnaje nazirańnie na kožnym vybarčym učastku i, jak vynik, jon prachodzić u harsaviet. Varta adznačyć, što i Ahiejeŭ, i Babicki źjaŭlajucca aŭtarami «Našaj Nivy».
Taksama ŭ Fanipali pieramoh kandydat ad AHP Alaksandar Załatar.
U svaju čarhu deputatami nia stali Juraś Hubarevič u Biełaaziorsku, Aleś Łahviniec, Andruś Klikunoŭ, Karen Akopaŭ, Alaksiej Janukievič – Miensku. U Horadni Siarhiej Antusievič prajhraŭ dyrektaru AAT «Horadnia Azot». Nie zmahła prajści ŭ połacki harsaviet nastaŭnica i paetka Lera Som. Suprać ichnych proźviščaŭ u vynikovych pratakołach stajać ličby ad 5 da 35 pracentaŭ.
Staršynia Partyi BNF Vincuk Viačorka, što balatavaŭsia ŭ Miensku pa Mirašničenkaŭskaj vybarčaj akruzie, maje namier abskardzić vyniki vybaraŭ u svajoj akruzie. Pavodle papiarednich źviestak za V. Viačorku prahałasavali 14,1 % hałasoŭ, za pradprymalnika Ŭładzimiera Hałaburdu — 54,5 %, bałatavalisia ŭ akruzie taksama pradprymalnik Iryna Fiafiołava (12,9 %), siabra Abjadnanaj hramadzianskaj partyi Lidzija Sitava (5 %).
Jaŭka vybarcaŭ skłała bolš za 70 %, što značna mienš u paraŭnańni ź letašnimi prezydenckimi vybarami, a taksama referendumam 2004 hodu. Zrešty, niekatoryja naziralniki staviać jaje pad sumnieŭ. Asabliva ŭ stalicy, dzie vybarčyja ŭčastki 14 studzienia pieravažna pustavali.
«...Asablivy šarm joj nadavaŭ kandydat‑pensijaner Uładzimier Łapcevič, jaki ŭ 2001 hodzie adsiedzieŭ amal hod u turmie i Navinkach za sprobu balatavacca na prezydenckich vybarach. Taksama tut supierničali dva kandydaty ad Partyi BNF».
Jak prachodzili vybary ŭ 51-aj mienskaj akruzie — repartaž Źmitra Pankaŭca.
