Biełaruskamoŭnaja impreza pad čyrvona-zialonym ściaham 2

Nacyjanalna-kulturnaja aŭtanomija «Biełarusy Maskvy» ŭ čaćvier praviała viečarynu z nahody Dnia biełaruskaha piśmienstva.

Ivan Karenda

Niekatorym udzielnikam viečaryny było dadatkova pryjemna, što mierapryjemstva vypała na Dzień biełaruskaj vajskovaj słavy, ź jakim jany adno adnaho pavinšavali;)

Było vielmi pryjemna i niazvykła bačyć całkam i stoadsotkava biełaruskamoŭnaje mierapryjemstva pad čyrvona-zialonym ściaham.

Zvyčajna na padobnych viečarynach, kali niechta pramaŭlaje pa-biełarusku, ty siadziš i baišsia, što ŭ niejki momant čałavieku nie chopić biełaruskaj leksiki, i jon paprosić prabačeńnia. Kareta pieratvarycca ŭ harbuza, a čałaviek praciahnie pramovu pa-rasijsku.

Tut takoha nie było.

Vystupili damy ź biełaruskich dziaržaŭnych ustanovaŭ, raspaviali, što prykładna 20% najmieńniaŭ knih u Biełarusi vychodziać na biełaruskaj movie i što biełaruskaja dziaržava padtrymlivaje pieradusim jak raz biełaruskamoŭnyja vydańni. Zaprasili naviedać biełaruski stend na niejkim knižnym kirmašy ŭ Maskvie.

Vystupiŭ piśmieńnik Ivan Karenda, ź cikavaj mini-lekcyjaj pra historyju biełaruskaha knihadrukavańnia, a potym pračytaŭ niekalki svaich vieršaŭ — sapraŭdy vielmi dobrych. Potym byŭ nievialiki film z cytataj Bahuševiča pra biełaruskuju movu — a videašerah tym časam pad «Staroha Olsu» demanstravaŭ biełaruskija krajavidy, harady, Vilniu, rekanstruktaraŭ ŭ łatach ź jahiełonskim kryžom — a ŭ najbolš dramatyčny momant na ekranie źjavilisia navat Kurapaty. Potym i namieśnik staršyni Aŭtanomii Raman Čyrvoncaŭ začytaŭ vydatnyja vieršy roznych aŭtaraŭ, u tym liku Viktara Šnipa, Anatola Sysa.

Voś mnohija žyvuć i nie zadumvajucca, što jość i na tym baku ludzi, jakija vielmi ščyra pieražyvajuć za stan biełaruskaj movy,

ale chiba ŭ čyjo žyćciovaje kreda nie ŭvachodzić volnadumstva i pratest. Ale ž usie my biełarusy, i navat kali majem roznyja palityčnyja pazicyi, pavinny być i rečy, jakija nas jadnajuć. Pahatoŭ kali heta biełaruskaja mova i kultura.

Miž inšym, pra biełaruskija padziei ŭ Maskvie možna daviedacca ŭ niadaŭna stvoranaj hrupie «Biełarusy ŭ Maskvie» na Facebook

A taksama na sajcie RNKA «Biełarusy Maskvy».

Aleś Čajčyc

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH