Kreml atrymaŭ mesydž: za "parazytaŭ" adkažacie! Uradu zahadana zmahacca, a nia "sklejvać łasty". Uvohule ŭ vystupie Łukašenki na "Naftanie" palityki było bolej, čym nafty.
Klučavoj padajecca teza pra toje, što Biełaruś musić vykarystoŭvać svoj resurs — hieapalityčnaje stanovišča — hetak sama, jak Rasieja vykarystoŭvaje syravinny resurs.
Kali ŭličyć, što Rasiei zakidajuć naftahazavy šantaž, to moža skłaścisia ŭražańnie, što ŭ Miensku kančatkova vyrašyli: na vajnie jak na vajnie!
Aficyjny kiraŭnik paćvierdziŭ, što Biełaruś maje zapatrabavać hrošy za ziamlu pad rasiejskimi trubapravodami. (A to chto-kolviek z kramloŭskich nadta raskidvajecca słovami pra "parazytavańnie" partneraŭ. Dyk voś raźbiaremsia, chto parazytuje!) Dyj uvohule, maŭlaŭ, treba jašče pahladzieć, nakolki ŭličvaje kiraŭnik "Transnafty" Vajnštok biełaruskija patreby, pierš čym prapampoŭvać jahonaje "čornaje zołata" ŭ Eŭropu.
Svaim ža ŭradoŭcam zahadana ŭtrymać ekanomiku — kroŭ z nosu!
U hetych zajavach, biezumoŭna, mocny pijaraŭski składnik.
Pa-pieršaje, treba supakoić nasielnictva.
Naturalna, u adukavanaj publiki vyklikajuć adno što ŭśmiešku patetyčnyja frazy pra toje, što darahija enerhanośbity nia musiać adbicca na stanoviščy narodu. Chiba kampensacyju z palca vyssuć? Ale ž u nas jašče tak bahata elektaratu, jakomu zdajecca, što ŭsie dabroty ź niejkaha čaroŭnaha miecha razdaje vysokaje kiraŭnictva!
(Spadarožnaja pijaraŭskaja zadača — zahadzia vyznačyć krajnich na vypadak, kali ekanomika pačnie valicca. Ministry myšej nie łavili!)
Pa-druhoje, treba dezavujavać versii apazycyi pra toje, što za kulisami moža ŭ luby momant adbycca cichaja zdača niezaležnaści: "Nas na kaleni nichto stavić nia budzie!".
Pa-treciaje, Zachad musić ŭpeŭnicca, što Miensk nasamreč aščaciniŭsia suprać rasiejskaha enerhietyčnaha šantažu i ŭ hetym sensie moža pretendavać na rol partnera. (Chacia tut pierabor. Namier absłuhoŭvać naftavy tranzyt zaležna ad pavodzinaŭ sp.Vajnštoka naŭrad ci spadabajecca Eŭropie, jakaja choča harantavanych pastavak.)
I, narešcie, badaj, samaje hałoŭnaje: treba psychalahična ŭździejničać na Rasieju.
Pryčym nia tolki pałochać Kreml dy aliharchaŭ (zachłyniciesia svajoj naftaj, my sabie z Ventśpiłsa napampujem!).
U tamtejšym hramadztvie staŭleńnie da kanfliktu ź Biełaruśsiu zusim nie takoje adnaznačnaje, jak było ŭ vypadku z Hruzijaj. Šmat chto vinavacić svaich aliharchaŭ i zastupajecca za bratoŭ-biełarusaŭ. A tut u Kramla vybary na nosie — adny, druhija... Tak što i ŭnutrany cisk moža prymusić kiroŭnuju elitu trochi strymlivać svoj impet u vyśviatleńni stasunkaŭ ź Mienskam.
Uvohule pahrozy vyłučyć Maskvie paŭnavažki sustrečny zysk hučali i minułymi hadami. "Ale zaraz peryjad vajaŭničaj rytoryki dastatkova praciahły, kab dapuskać imaviernaść realnych zachadaŭ", — miarkuje palitolah Andrej Fiodaraŭ.
Jon ličyć, što hetaja imaviernaść budzie zaležać ad taho, nakolki ekanomika paciahnie novyja košty na enerhanośbity. Kali paŭstanie pahroza rezkaha padaražeńnia pasłuhaŭ ŽKH, vysokaj inflacyi, to Maskva sapraŭdy moža atrymać surjozny rachunak.
Naturalna, kiepska toje, što stratehija enerhietyčnaje biaśpieki lichamankava namacvajecca ŭ fors-mažornych varunkach.
Adno moža hreć dušu adeptaŭ niezaležnaści: doŭžycca taniec na kaściach "sajuznaje dziaržavy".
