"Łukašenka mianiaje kurs", "Łukašenka zdaŭ Rasieju" — takimi zahałoŭkami strakaciać siońnia maskoŭskija medyi.
Miensk moža być zadavoleny: pijar atrymaŭsia budź zdaroŭ!
Cikava, pad jakim mikraskopam možna ŭhledzieć u tym interviju sastupki Eŭropie? Tam — kankretny śpis žadanych dabrotaŭ: skasujcie vizavyja zabarony, rasčynicie svoj rynak dla našaha tavaru, niakiepska było b pabolej investycyjaŭ...
Ale jak tolki havorka pra demakratyčnyja standarty dy hramadzianskija pravy — vybačajcie, chłopcy, vy sa svaim bruselskim kapyłom da nas nia leźcie! U nas — "specyfičnyja nacyjanalnyja intaresy".
Hetak sama bahata pijaru było i na naradzie ŭ Navapołacku. U admysłoŭcaŭ vialiki sumnieŭ, što prajekt "Nafta z Ventśpiłsu" ekanamična praličany. Kažuć, toje "čornaje zołata" budzie takim darahim, što praściej kuplać u "brydkaj" Rasiei.
Ale ž važna nastrašyć!
Inšaja reč, što kankretny materyjalny efekt ad pijaru, raźličanaha na imperskija fobii Maskvy (vo, blin, užo i apošnija siabry — biełarusy uciakajuć na čortaŭ Zachad!), pakrysie vyčychajecca. Navat viadomy intehratar Hryzłoŭ, vahajučysia razam z hieneralnaj linijaj, ćviorda zajaŭlaje: my nie finansujem mity!
Ale na Zachad iści nasamreč strašna. Jahonaja kružełka pra demakratyčnyja standarty hučyć dla režymu pachavalnaj muzykaj. Zrazumieła, što za kožny skormleny vitamin Brusel z Vašynhtonam zapatrabujuć svajho.
Tamu zastajecca zadača vycisnuć z Maskvy maksymum na raźvitańnie (jakoje abiacaje być davoli zaciahnutym). Kab dzień prastajać dy noč pratrymacca. A dalej jašče babula nadvaja varažyła. Mo sapraŭdy košty na enerhanośbity sadźmucca. Ci jašče jakoje šancavańnie. Ciapierašniaj uładzie nie adnojčy šalona šancavała.
Admietnaje pryznańnie aŭtara interviju, Alaksandra Rara, "Komsomolskoj pravdie": "Mnie zdałosia, što ŭ Łukašenki kryŭda na Rasieju, jon ličyć, što ŭ Maskvie jaho pierajhrali. I praz presu jon sprabuje zmusić Kreml pajści na mužčynskuju razmovu".
Tak što i naiŭnyja zachodniki, i dubovyja antyzachodniki ŭbačyli ŭ interviju toje, čym tam i nie patychaje. Nasamreč biełaruskamu kiraŭnictvu ciažka niekudy padziecca z padvodnaje łodki.