U Siecivie praciahvajuć abmiarkoŭvać Łukašenkava interviju hazecie "Velt". Beściać surazmoŭcu, niemca Rara: maŭlaŭ, paźbiahaŭ vostrych pytańniaŭ i ŭsio takoje.
Ja ž zhadaŭ, jak, musić, pieršy i apošni raz aficyjny kiraŭnik ryzyknuŭ zaprasić u svaju rezydencyju hrupu pradstaŭnikoŭ ajčynnaj niezaležnaj presy. Trapiŭ tudy i aŭtar hetych radkoŭ.
Heta było pierad čarhovymi vybarami. Ułada vyrašyła blisnuć adkrytaściu.
8 žniŭnia 2001 hodu. Zahadana pryjści ŭ rezydencyju na Karła Marksa hadziny za dźvie da pačatku. Prastornaje faje nahadała zału čakańnia aeraportu. Praviarajuć hetak sama. Daviałosia prajści praz metalašukalnik i navat dastać akumulatary z dyktafona. "Dobra, baču, što nie patrony", — viarnuŭ "palčyki" słužboviec. Ja zrazumieŭ: heta taki humar.
A voś na samoj presavaj kanferencyi byŭ razhuł liberalizmu. "Zadavajcie lubyja pytańni — pra žonku, kachanak, pra roliki", — zrabiŭ šyroki žest haspadar.
Pra što, mahčyma, potym paškadavaŭ.
Napačatku ŭsio išło hładka. Peŭna ž miełasia niejkaja režysura. Vakoł vielizarnaha kruhłaha stała (taho samaha, što časta pakazvajuć u aficyjnych telerepartažach) siadzieli ŭpieremiešku "česnyja" i "niačesnyja". Pradstaŭnica dziaržaŭnaj televizii, pieršaj atrymaŭšy słova, zhadała pra siomuju ciaham hodu sustreču biełaruskaha i rasiejskaha prezydentaŭ, što niezadoŭha da taho adbyłasia ŭ Sočy.
Pytańnie vyhladała, kažučy chakiejnaj movaj, jak pas na spodačku. Pierad vybarami nadta darečy było davieści elektaratu, što Kreml padtrymlivaje dziejnaha kiraŭnika.
Łukašenka padkreśliŭ: "Akramia rašeńnia dziaržaŭnych spraŭ, my z Uładzimieram Uładzimieravičam prosta majem dobryja stasunki, i vielmi daŭno, jašče ź Picieru, kali jon pracavaŭ z Anatolem Sabčakom. U svoj čas ja pryjazdžaŭ na zaprašeńnie Anatola Alaksandraviča ŭ Picier, i Ŭładzimier Uładzimieravič sustrakaŭ i supravadžaŭ tam". (To bok — byŭ na pabiahuškach. Tonka padadziena!)
Samaj ža pikantnaj na siońniašni dzień vyhladaje zajava Łukašenki pra toje, što ŭ Sočy jon z Pucinym vyrašaŭ pytańni enerhietyčnaje biaśpieki. Maŭlaŭ, kali raskrucim sumiesnyja prajekty, dyk pašencić zabiaśpiečyć "biaźbiednaje isnavańnie" navat "dzieciam i ŭnukam":)
Dobryja byli plany. Tolki voś zaraz uradoŭcy ź Miaśnikovičam musiać lichamankava pierapisvać kancepcyju toj samaj enerhietyčnaje biaśpieki...
Zrešty, nia budziem ab sumnym.
Voś na toj presavaj kanferencyi nichto nie zasumavaŭ:) Kali prezydenckaje atačeńnie i mieła jaki jaki scenar, dyk ad jaho kamienia na kamieni nie pakinuli dźvie pasyjanarnyja pradstaŭnicy niezaležnaj žurnalistyki — Iryna Chalip dy Maryna Koktyš.
Na hetym tle tyja dva pytańni, što mnie pašenciła ŭklinavać, — čamu nie zaprašajuć naziralnikaŭ ABSE i čamu tak abmiežavany dostup apanentaŭ da medyjaŭ? — padavalisia, ličy, biaskryŭdnymi. Zaŭvažcie: i tady Łukašenka davodziŭ, što nieŭzabavie naładzić stasunki z Zachadam.
Tak što Rar ničoha novaha nie pačuŭ.
Voś tut vy znojdziecie paru materyjałaŭ z taje sustrečy. Navat ad pryčasanaj stenahramy "SB" patychaje lutaściu palemičnaha boju. Nia kažučy ŭžo pra publikacyju samoj Chalip.
A voś tut — taksama davoli smačny kavałak z "BiełHaziety".
Ciapier heta zdajecca fantasmahoryjaj: niaŭžo na Karła Marksa, 38 mahli hučać takija, miakka kažučy, niazručnyja dla haspadara pytańni? Pra karupcyju ŭ vysokich strukturach, medyčnuju ekspertyzu i navat pra źnikłych.
Karaciej, bolej nas tudy nia klikali.
Moža, Alaksandar Rar prosta ŭličyŭ hety dośvied? :)