Rada Biełaruskaha PEN-Centru vyrašyła sioleta ŭhanaravać tradycyjnaj premijaj Biełaruskaha PEN-Centru imia Alesia Adamoviča žurnalista Alaksandra Tamkoviča — za knihu intervju «Biez palityki» i Mikałaja Mielnikava, dyrektara hrodzienskaha muzieja Vasila Bykava, — za istotny ŭniosak u zachavańnie duchoŭnaj spadčyny Vasila Bykava.
Premijaj imia Franciška Bahuševiča buduć uhanaravanyja vydaviec Źmicier Sańko, stvaralnik i hałoŭny redaktar knižnaj sieryi «Našy słavutyja ziemlaki» i piśmieńnica Ludźmiła Rubleŭskaja — za raman «Sutareńni Romuła»
(nadrukavany ŭ «Dziejasłovie» № 47, 48,49).
Uručeńnie premij adbudziecca pry kancy 2011 hodu ŭ Minsku.
Premija imia Alesia Adamoviča była zasnavanaja Biełaruskim PEN-centram u 1996 hodzie, praz dva hady paśla śmierci piśmieńnika i hramadskaha dziejača na znak pašany jahonaha imia. Premija prysudžajecca za najlepšyja publicystyčnyja tvory. Za 15 hod isnavańnia premii joj byli ŭhanaravanyja kala 30 piśmieńnikaŭ, publicystaŭ, daśledčykaŭ litaratury. Łaŭreatami premii byli Siarhiej Navumčyk, Valancin Akudovič, Leanid Marakoŭ, Hienadź Buraŭkin, Pavał Sieviaryniec, Siarhiej Šapran.
Premija imia Franciška Bahuševiča — štohadovaja litaraturnaja premija Biełaruskaha PEN-centru. Zasnavana ŭ 1994 hodzie. Prysudžajecca za knihi, jakija adnaŭlajuć histaryčnuju praŭdu i spryjajuć viartaniuju histaryčnaj pamiaci. vydatnuju histaryčnuju prozu aŭtaram knih, jakija spryjajuć abudžeńniu pačućciaŭ histaryčnaj samaśviadomaści i nacyjanalnaj niezaležnaści čytačoŭ. Z 1996 jaje łaŭreatami stali Kastuś Akuła, Uładzimir Arłoŭ, Hienadź Sahanovič, Lavon Barščeŭski, Michaś Čarniaŭski, Alaksandar Łukašuk, Vasil Siomucha, Ivan Savierčanka, Taciana Proćka, Nina Stužynskaja, Ała Sakałoŭskaja, Viačka Cieleš, Aleś Bieły, Zachar Šybieka, Alaksandr Nadsan, Volha Babkova.
SM
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
