Chłopiec aryštavany na troje sutak i ciapier znachodzicca ŭ śledčym izalatary KDB. Jaho vinavaciać u dziejańniach ad imia niezarehistravanaj arhanizacyi (art. 193-1 KK). Pra heta baćkam Korbana paviedamili ŭ «amerykancy».
A. Korban byŭ zatrymany ŭ niadzielu na ŭłasnym dni narodzinaŭ. U toj ža viečar byli zatrymanyja asoby, jakija prysutničali na pasiedžańni Centralnaj Rady niezarehistravanaj arhanizacyi «Małady front». Bolšaść junakoŭ adpuścili.
Jak stała viadoma, Źmicier Chviedaruk taksama znachodzicca ŭ "amerykancy". Jahonym baćkam patelefanavali adtul i paviedamili hetuju navinu.
Na pres-kanferencyi, pryśviečanaj učorašnim zatrymańniam, adzin ź lideraŭ arhanizacyi Barys Harecki paviedamiŭ, što siłami KDB i milicyi było praviedziena 6 pieratrusaŭ: na ofisie niezarehistravanaha «Maładoha frontu», u mienskich kvaterach A. Korbana, Z. Chviedaruka, N. Pałažanki, A. Janušeŭskaha, Ja. Hryščeni z Baranavičaŭ.
Sankcyju na pieratrus i zatrymańni ŭ ofisie niezarehistravanaha «Maładoha frontu» padpisaŭ staršynia KDB. U kamitet nibyta pastupiła infarmacyja pra praviadzieńnie palityčnaha mierapryjemstva, charaktar jakoha padpadaje pad artykuł 193-1 KK. Kiravaŭ pieratrusam i dopytami zatrymanych kapitan KDB Śvistun D.M.
Dopyt kožnaha zatrymanaha ciahnuŭsia ŭ siarednim hadzinu, pry hetym «maładafrontaŭcam» prapanoŭvali čystasardečna pryznacca va ŭdziele ŭ niezarehistravanaj arhanizacyi i adkazać na pytańni datyčna funkcyjavańnia arhanizacyi.
Padčas pieratrusaŭ kanfiskoŭvalisia kamputary, drukavanaja pradukcyja.
Pieratrus na kvatery Janušeŭskaha pravodzili 5 supracoŭnikaŭ KDB, jakija nie patłumačyli pryčynaŭ svaich dziejańniaŭ i nie pradstavilisia.
Barys Harecki zapeŭniŭ, što dziejańni specsłužbaŭ nia spyniać dziejnaści arhanizacyi. na dumku niekatorych maładafrontaŭcaŭ, zatrymańni 4 lutaha byli skiravanyja na toje, kab sarvać akcyju na Dzień śv. Valancina. Ale akcyja 14 lutaha, abiacaje jon, adbudziecca pry lubych abstavinach. Jana maje prajści ŭ tradycyjnym farmacie – z naviedvańniem pasolstvaŭ viadučych zachodnich dziaržavaŭ. Heta budzie dziasiataja valancinaŭskaja akcyja, praviedzienaja niezaležnaj moładzievaj arhanizacyjaj.