Pra svoj udzieł u śviatkavańni Dnia Voli 25 sakavika paćvierdzili kiraŭniki palityčnych partyjaŭ, pradprymalnickich i moładzievych arhanizacyjaŭ. Pra heta było paviedamlena na pres-kanferencyi, zładžanaj arhakamitetam praviadzieńnia Dnia Voli 25 sakavika. Udzieł u joj uziali Vincuk Viačorka, Barys Harecki ad moładzi, Ihar Šynkaryk ad Abjadnanaj hramadzianskaj partyi, Anatol Laŭkovič ad Hramady, Alaksiej Maračkin ad Zhurtavańnia biełarusaŭ śvietu "Baćkaŭščyna", Alaksandar Milinkievič, Uładzimier Kołas ad Rady intelihiencyi, a taksama pradprymalnicki lider Alaksandar Makajeŭ.
Akcyi 25 sakavika budzie mieć vyklučna mirny i śviatočny charaktar, paviedamiŭ kiraŭnik arhkamitetu V. Viačorka. Ciapier rychtujecca zajaŭka ŭ Mienharvykankam, miescam praviadzieńnia akcyi, pa rašeńni arhkamitetu, stanie Kastryčnickaja płošča. Adkazvajučy na pytańnie pra mahčymy paŭtor minułahodniaha varyjantu ź pierakryćciom płoščy, staršynia arhkamitetu zapeŭniŭ, što arhanizatary majuć zapasnyja varyjanty. «Akcyja adbudziecca ŭ lubym razie» – upeŭnieny V. Viačorka.
Arhkamitet padrychtavaŭ listy-zvaroty da Alaksandra Łukašenki, biełaruskich hramadzianaŭ i mižnarodnaj supolnaści. U zvarotach robicca akcent na sytuacyi vakoł biełaruska-rasiejskich dačynieńniaŭ, a taksama prapanujecca zrabić nieabchodnyja zachady pa palapšeńni stanovišča. Tak, u zvarocie da Łukašenki, razdadzienym na pres-kanferencyi, kiraŭnik dziaržavy zaprašajecca da ŭdziełu ŭ śviatočnych mierapryjemstvach. Adnak na sajcie Partyi BNF źmieščany inšy varyjant zvarotu, bolš žorstki i biez zaprašeńnia.
Kiraŭnik kaardynacyjnaj rady pradprymalnikaŭ Alaksandar Makajeŭ raspavioŭ pra ŭdzieł pradprymalnikaŭ u budučym śviatkavańni Dnia Voli. Pa jaho słovach, drobnaje pradprymalnictva ŭrešcie zrazumieła, što ekanamičnaja svaboda nieadłučnaja ad svabody palityčnaj. «Ciapier viadziecca pra vyžyvańnie pradprymalnictva, jak klasy, tamu my šukajem u hramadztvie tyja siły, ź jakimi my možam supolna supraćstajać cisku ŭładaŭ» – skazaŭ sp. Makajeŭ.
Kiraŭnik arhkamitetu V. Viačorka kaža, što budučaja akcyja stanie symbaličnaj lakmusavaj papierkaj sytuacyi ŭ krainie i pakaža, čaho vartaja niezaležnickaja rytoryka ŭładaŭ.
