Biełaruskaha frystajlista Źmitra Raka siońnia planujuć pieravieści z reanimacyi ŭ adździaleńnie neŭralohii haradzkoj kliničnaj bolnicy. Spartoviec, jaki atrymaŭ u Kitai ciažkuju traŭmu hałavy, ciapier pieražyvaje ŭznaŭlenčy peryjad, jaki, z słovaŭ daktaroŭ, praciahniecca nia miesiac i nia hod. Pra heta — u ekskluziŭnym interviju «Salidarnaści» z zahadčykam adździaleńnia reanimacyi j anestiezijalohii intensiŭnaj terapii Aleham Hryšanavym.
— U Źmitra — ciažkaja čerapna‑mazhavaja traŭma. I my lečym jaje nastupstvy. Ciapier u jaho ŭznaŭlenčy peryjad, jaki budzie ciahnucca vielmi doŭha.
—Nakolki?
—Na hetaje pytańnie niemahčyma adkazać dakładna. Ale zrazumieła, što heta sprava ni dzion i nia miesiacaŭ, a chutčej za ŭsio — hadoŭ.
— Praŭda, što Źmicier znachodzicca ŭ komie?
— Nie. Jon ciapier u śviadomaści. Z komy jon vyjšaŭ da novaha hodu.
— Možna skazać, što jon idzie na papraŭku?
— Možna.
— Paznaje kaho‑niebudź?
— Chutčej tak. Ź im pastajanna znachodzicca maci, peryjadyčna — baćka, jaki byŭ sa Źmitrom u Kitai z kanca śniežnia. Uličvajučy toje, što pacyjent idzie na papraŭku, u aŭtorak jon budzie pieraviedzieny dla dalejšaj reabilitacyi ŭ adździaleńnie neŭralohii. Moža, heta adbudziecca ŭ sieradu. Heta budzie ahulnaje adździaleńnie. Jamu užo padrychtavana pałata.
— Źmicier užo moža samastojna jeści?
— Trochi jon staŭ siabie absłuhoŭvać. Pačaŭ prymać zvyčajnuju ježu. Moža sam jeści banan, kusać jabłyk, navat kostački vyploŭvać ź vinahradu.
— Kitajskija kalehi dobra papracavali?
— Ahułam, tak. Aperacyi jamu nie rabili, i, nakolki viedaju, aperavać jaho nia treba było. Bolš padrabiazna adkazać składana. Naahuł, historyju chvaroby my atrymali na kitajskaj movie. Na anhielskaj była tolki transpartoŭka. Pieravieści historyju chvaroby musiła Ministerstva sportu i turyzmu. Siońnia‑zaŭtra my čakajem takoj dakumentacyi.
Bolš padrabiaznuju infarmacyju pra stan zdaroŭja Źmitra Raka daktaram bolnicy zabaraniła raspaŭsiudžvać administracyja ŭstanovy. Mama Źmitra, jakaja pastajanna znachodzicca pobač ź im, taksama admaŭlajecca ad kantaktaŭ z presaj, zaznačajučy, što treba źviartacca ŭ spartovy kamitet. U śpisach pacyjentaŭ, jakija možna prahledzieć u faje 5‑j bolnicy, paznačana, što Źmicier znachodzicca ŭ reanimacyi. Jahony stan — siaredniaj ciažkaści.
Nahadajem, što 30‑hadovy frystajlist atrymaŭ ciažkuju traŭmu 10 śniežnia — padčas pieršaha etapu Kubku śvietu, što pravodziŭsia ŭ kitajskim Hirynie. U kitajskaj klinicy spartoviec pravioŭ kala piacidziesiaci dzion, ciaham jakich ź im pastajanna znachodziŭsia lekar zbornaj Biełarusi Ŭładzimier Daronin. Samalot izrailskaj avijakampanii uviečary 1 lutaha dastaviŭ Źmitra ŭ Miensk. Pieralot skłaŭ 13 hadzin
