U mintransie Rasiei ličać, što Biełaruś nie pryniała mieraŭ pa palapšeńni ŭmovaŭ tranzytu rasiejskich hruzaŭ, jakija iduć z Kalininhradzkaj vobłaści.
Transpartnaje viedamstva Rasiei ličyć, što biełaruski ŭrad vinavaty ŭ składanym paradku pieramiaščeńnia rasiejskich hruzaŭ praź Biełaruś. Jak adznačaje pres‑słužba ministerstva transpartu Rasiei, urad Biełarusi dahetul nie zrabiŭ zachadaŭ, kab palepšyć umovy tranzytu rasiejskich hruzaŭ z Kalininhradzkaj vobłaści.
U hetaj suviazi ministerstva transpartu Rasiei zajaviła, što «nia ličyć mahčymym razhladać pytańnie pra vyłučeńnie biełaruskamu boku rasiejskich dazvołaŭ na ažyćciaŭleńnie pieravozak hruzaŭ u/z trecich krain».
U paviedamleńni Mintransa RF paviedamlajecca, što ad studzienia 2007 hodu «biełaruskija mytnyja orhany stali dahladać usie rasiejskija tavary, jakija iduć z Kalininhradzkaj vobłaści tranzytam praz Respubliku Biełaruś na astatniuju častku terytoryi RF, z prymianieńniem abaviazkovaha kanvajavańnia transpartnych srodkaŭ».
Jak adznačaje transpartnaje viedamstva Rasiei, dziejańni mytnych orhanaŭ Biełarusi pryviali da taho, što «na biełaruska‑litoŭskim učastku miažy sabrałasia vialikaja kolkaść transpartnych srodkaŭ u čakańni afarmleńnia pracedury dastaŭki j prybyćcia naradaŭ kanvoju». Bolš za toje, «heta pryviało da dadatkovych finansavych vydatkaŭ» rasiejskich hruzapieravozčykaŭ, adznačaje mintrans Rasiei.
Dziejańni biełaruskich mytnych orhanaŭ mintrans Rasiei ŭvažaje «parušeńniem sumiesnych damoŭlenaściaŭ 1998 hodu pa pytańniach pieravozak rasiejskich tavaraŭ z Kalininhradzkaj vobłaści na astatniuju častku terytoryi Rasiejskaj federacyi tranzytam praź Biełaruś i stvarajuć napružanaść na miežach».
Miž tym, ministerstva transpartu i kamunikacyjaŭ Biełarusi zajaviła, što nie atrymlivała aficyjnaha paviedamleńnia ad Mintransu Rasiei.
