Siońnia, 8 lutaha, na čempijanacie śvietu ŭ italjanskim Antcholcy‑Anterselvie prajšła miašanaja estafeta. U składzie kožnaj z nacyjanalnych družynaŭ pa čarzie biehli čatyry bijatlanisty: dźvie žančyny pa šeść kilametraŭ, potym dva mužčyny — pa siem z pałovaj km.
Biełaruskaja zbornaja ŭ składzie Darji Domračavaj, Natalli Sakałovaj, Alaksandra Symana i Siarhieja Novikava zaniała 13‑ie miesca. Našy suajčyńniki adstali ad švedaŭ, što finišavali pieršymi, na try chviliny 45,5 sekundy.
Druhoje miesca ŭ francuzaŭ, «bronza» – u narveskaj družyny. Rasieja finišavała – 9‑j, Ukraina — 10‑j, Polšča — 11‑j, Estonija — 12‑j. Usiaho na start vyjšła 21 kamanda.
Zaŭtra na čempijanacie śvietu dzień pierapynku. U subotu projdzie estafeta ŭ mužčyn (pačatak a 11:45) i mas‑start u žančyn (15:15). U niadzielu naadvarot: estafeta ŭ žančyn (12:00) i mas‑start u mužčyn (15:15).
Honki ŭ žyvym etery pakazvajuć telekanał «Ład» i «Eŭrasport».
Pakul najbolš medaloŭ zavajavała zbornaja Narvehii. Na jaje rachunku piać uznaharod (try załatyja, adzin srebrany, adzin bronzavy). U zbornaj Niamiečyny i Francyi – pa čatyry medali (2, 1,1 — 1, 2, 1). Švedy majuć na svaim rachunku pa adnym załatym, srebranym, bronzavym medali. Rasieja i Čechija — pa «srebry» i «bronzie». Ukraina maje adnu «bronzu».
