Na płoščy Svabody pierad moładździu vystupiŭ Milinkievič. Adbyłosia šeście praz centar stalicy. Usie zatrymanyja ŭ Miensku adpuščanyja.
Hałoŭnaje pytańnie, jakoje turbavała pierad pačatkam «maładafrontaŭskaj» akcyi lubovi: ci budzie razhon? Pačatak dnia ŭ hetym planie nie nadavaŭ aptymizmu, byli zatrymanyja niekatoryja moładzievyja aktyvisty, la padjezdaŭ dziažuryli ludzi ŭ cyvilnym, chłopcaŭ vyklikali na dopyty.
Za niekalki chvilinaŭ da pačatku akcyi płošča Svabody była pierakrytaja milicyjantami. Hadzińnik pakazvaŭ 18:10, a maładzionaŭ na płoščy nie nazirałasia. Usio pačałosia, kali šaściora dziaŭčat, apranutych ŭ sakołki «Małady front» i razdajučy bieł‑čyrvona‑biełyja stužki, nakiravałasia da Ratušy, za śpinam panienak byli prymacavanyja symbaličnyja krylcy. Milicyjanty, jakija dziažuryli dahetul, niekudy źnikli. Dziaŭčaty prajšli koła vakoł Ratušy, ludziej stanaviłasia ŭsio bolej, narešcie padciahnulisia chłopcy.
Paśla ŭžo byli razhornutyja raściažki ‑‑ «Akcyja lubovi» i «Małady front», udzielniki abharnulisia eŭraźviazaŭskimi ściahami. Pačałosia skandavańnie «Žyvie Biełaruś!» Milicyjantaŭ užo nie nazirałasia.
Udzielniki spakojna prajšli darohu da francuskaha pasolstva. Tam da ich dałučyŭsia Alaksandar Milinkievič. Jon byŭ adzinym z darosłych palitykaŭ, chto pryjšoŭ padtrymać maładzionaŭ. Pobač ź im z pryhožaj maleńkaj ružaj stajała Ina Kulej. Milinkievič skazaŭ: «Toj chto maje ŭ sercy luboŭ, toj niepieramožny. Toj, chto kachaje, toj niepieramožny. Ja hanarusia Vami, my pieramožam! Žyvie Biełaruś!» Stała zrazumieła, što sioleta razhonu nia budzie.
Praŭda, la Kastryčnickaj płoščy zatrymali Barysa Hareckaha i jašče niekalkich udzielnikaŭ. Praź niejkuju hadzinu ich užo adpuścili. Śviata kachańnia ŭdałosia, niahledziačy ni na što.
* * *
21.20 Vypuščanyja z Centralnaha RUUS Barys Harecki i Siaržuk Huminski, zatrymanyja padčas akcyi. Pavodle Barysa Hareckaha, milicyjanty pastavilisia da ich vielmi karektna. Adpuščanyja taksama aktyvisty moładzievaha kryła BNF, što ździejśnili ŭdzień akcyju na Płoščy Jakuba Kołasa
21.05 Udzielniki akcyi pavinšavali supracoŭnikaŭ amerykanskaj ambasady z Dniom śv. Valancina i nievialikimi hrupami razyšlisia.
Jak paviedamlaje pres-słužba Maładoha frontu, uviečary na hałoŭnym placy Salihorsku pry sprobie pravieści akcyju da Dnia śv. Valancina, zatrymany Ivan Šyła. Dakładnaje miesca znachodžańnia lidera salihorskaha MF nieviadoma.
Kala 21-j hadziny z budynku KDB vypuščanyja Aleh Korban i Źmicier Chviedaruk, jakich admysłova za dźvie hadziny da pačatku akcyi vyklikali na dopyt.
19.53
Udzielniki iduć da amerykanskaj ambasady. Prajšli vulicu Kujbyšava.
19.40
Udzielniki akcyi źbirajucca iści da amerykanskaj ambasady. U pierachod metro pajšli Alaksandar Milinkievič i Ina Kulej, za imi ŭviazałasia vosiem specnazaŭcaŭ. La pierachodu ŭ adnaho z udzielnikaŭ akcyi milicyjanty vychapili ściah.
19.35
Ź niamieckaj ambasady nichto nia vyjšaŭ. Maładafrontaŭcy pieradali vinšavańni i kvietki cieraz achoŭnika pasolstva.
19.24
Udzielniki akcyi znachodziacca la niamieckaj ambasady. Jość źviestki, što amapaŭcy źbili adnaho chłopca. Źviestki pra zatrymanych vielmi roznyja. Zatrymanyja piać čałaviek, u tym liku Barys Harecki.
Moładź skanduje "Žyvie Biełaruś!", "Lublu Biełaruś!".
19.15
Udzielniki akcyi padyšli da Płoščy Pieramohi, zbočvajuć na Zacharava, kab nakiravacca da niamieckaj ambasady.
19.04
Udzielniki akcyi iduć nasuprać cyrku, la parku Janki Kupały. Vakoł natoŭpu "tusujucca" cichary. Mašyna DAI vietliva paprasiła pierachodzić praspekt na zialonaje śviatło.
18.59.
Udzielniki akcyi dajšli da Domu prafsajuzaŭ. Na Placy Kalinoŭskaha -- šmat amapaŭcaŭ. Až čorna ŭ vačoch.
18.53
Cichary napali na adnaho maładoha čałavieka. Jaho žorstka zaciahnuli ŭ arku, što na vulicy Lenina, la hatelu "Eŭropa".
Dakładna viadoma, što zatrymany Barys Harecki. Ale ci pra jaho havorka była vyšej, nie viadoma.
Milinkievič źviarnuŭsia da specnazaŭcaŭ, kab adpuścili chłopca. Biezvynikova.
18.47
Udzielniki akcyi kirujucca da niamieckaha pasolstva. Niamieččyna, jak viadoma, ciapier staršyniuje ŭ Eŭrasajuzie. Pa vulicy Lenina da Makdonaldzu, u bok płoščy Pieramohi. Kolkaść udzielnikaŭ akcyi bolšaje.
18.34
Łunajuć ściahi "Maładoha frontu", Eŭraźviazu, biełaruski ściah.
Ludzi trymajuć maleńkija partreciki Kazulina ŭ vyhladzie sardečak, jakija zrabiŭ barysaŭski žurnalist i pravaabaronca Aleś Abramovič.
Skandujuć "Žyvie Biełaruś" i "Milicyja z narodam".
18.30
Da Milinkieviča, jaki pryjechaŭ z žonkaj Inaj Kulej, padyšli dva bamžavatyja mužčyny i pačali "hutarku": "Bratok, i ty tut!" Adrazu padlacieła zdymačnaja hrupa BT na čale ź Lednikam i pačała zdymać heta.
Udzielniki akcyi kryčać "Svabodu palitviaźniam".
18.26
Udzielniki akcyi śpiavajuć "Mahutny Boža"
18.24
Pryjechaŭ Milinkievič i zdymačnaja hrupa BT. Udzielniki akcyi skandujuć "Žyvie Biełaruś!"
"Toj chto maje ŭ sercy luboŭ, toj niepieramožny. Toj, chto kachaje, toj niepieramožny. Ja hanarusia Vami, my pieramožam! Žyvie Biełaruś!" -- zajaviŭ Milinkievič.
Udzielniki akcyi fatahrafujucca, razdajuć benhalskija ahni. Milicyi i "cicharoŭ" pakul niama.
18.21
Udzielnikaŭ akcyi la francuskaha pasolstva sustrakaje pieršy sakratar pasolstva Francyi.
18.19
Udzielniki akcyi kirujucca da francuskaha pasolstva. Kiroŭcy aŭtamabilaŭ vitajuć udzielnikaŭ akcyi syhnałami. Kolkaść udzielnikaŭ akcyi ŭzrasła da sta čałaviek.
18.17
Da prysutnych źviarnuŭsia pres-sakratar MF Barys Harecki. Minakam razdajuć benhalskija ahni. Udzielniki musiać zapalić hetyja ahni, što symbalizujuć zorki na ściahu Eŭraźviazu, a pasiaredzinie — zapalić "biełaruskuju zorku".
Udzielniki skandujuć "Žyvie Biełaruś", "Biełaruś u Eŭropu" Milicyja pakul nia ŭmiešvajecca.
18.15
Raściahnuta raściažka "Małady front -- akcyja lubovi". Udzielniki akcyi abhortvajucca ściahami: hišpanski, italjanski, rumynski, biełaruski. Tyja, chto abhornuty ściahami, stali paŭkołam (siem čałaviek).
Prysutnym razdajuć stužački "Małady front"
18.11
Kala dziasiatka dziaŭčat u sakołkach z nadpisam "Małady front" i kryłami aniołaŭ za śpinoj iduć vakoł Ratušy. Projdziena adno koła. Razam z žurnalistami ŭdzielnikaŭ akcyi -- 80. Žurnalistaŭ pałova.
❏
Da 18:00 Płošča Svabody była ačeplenaja niekalkimi dziasiatkami čałaviek u čornym. Pierakryty ŭsie padychody. Na Płošču nikoha nie puskajuć. Na pytańnie, čamu nie puskajuć, milicyjanty adkazvajuć koratka: "Mierapryjemstva".
A 18-j mieła pačacca tradycyjnaja kaściumavanaja akcyja «Maładoha frontu». Maładyja ludzi musili abychodzić pasolstvy zachodnich diazržaŭ, kab vinašavać z dniom śv. Valancina.
Pierad akcyjaj byli praviedzienyja preventyŭnyja zatrymańni. Zatrymany na ŭłasnaj kvatery adzin z kiraŭnikoŭ «Maładoha Frontu» Siaržuk Lisičonak. Supracoŭniki KDB advieźli jaho na dopyt pavodle spravy Źmitra Chviedaruka. Samoha Źmitra taksama siońnia vazili na dopyt.
Na vulicy zatrymanaja aktyvistka Ludmiła Atakułava. Milicyja dziažuryć la domu, dzie žyvie Nasta Pałažanka.
Fota Andreja Lankieviča
Redakcyja zahadzia pieraprašaje za hramatyčnyja i leksyčnyja pamyłki ŭ tekście onłajnavaha repartažu.
