Kolki b ni klalisia naviersie, što padaražeńnie enerhanośbitaŭ nia ŭdaryć pa nasielnictvie, narod natapyryŭsia i čakaje horšaha. Pra heta śviedčać ličby samaha śviežaha (kaniec studzienia) apytańnia zarehistravanaha ŭ Vilni NISEPD.
Letaś ekanamisty adznačali: u krainie spažyviecki bum. Zaŭždy ekanomnyja biełarusy raptam stali tracić hrošy jak šalonyja.
Eŭfaryja adlustroŭvałasia i ŭ sacyjalahičnych ličbach. Jašče ŭ listapadzie 42,5% suajčyńnikaŭ byli ŭpeŭnienyja, što ciaham nastupnych hadoŭ sacyjalna-ekanamičnaja sytuacyja palepšycca. Paharšeńnie prahnazavali tolki 10,7%. Zaraz hetaja praporcyja vyhladaje jak 30,6: 25,6.
Adčuvajecie roźnicu?
Paspality lud empiryčna pierakonvajecca: latentnaja, paŭzučaja inflacyja značna pieravyšaje pakazčyki aficyjnaje statystyki. Chacia i jana, darečy, zafiksavała ŭ studzieni rost koštaŭ na 1,8%. Takimi tempami ŭžo ŭviesnu budzie vybrany zaplanavany na hod limit (6-8%).
46% respandentaŭ (u tym liku, zaŭvažcie, 30,9% tych, chto daviaraje Łukašenku!) dapuskajuć, što sioleta hrymnie bankaŭski kryzys sa strataju ŭkładaŭ i aščadžeńniaŭ. 37,9% miarkujuć, što nas moža spaścihnuć masavaje biespracoŭje, rost cenaŭ dy skočvańnie ŭ haleču.
Pesymizm nastrojaŭ peŭna budzie narastać. Navat lajalny da ŭłady abyvatal daviaraje nie dziažurna-aptymistyčnym pramovam u televizary, ale ž svaim vačam pry suzirańni ceńnikaŭ u kramach dy ličbaŭ u "žyroŭkach". A tut praces pajšoŭ...
Mienavita heta i pradrakała apazycyja. Zdajecca, navat pryniała letaś raźličanuju na sacyjalna-ekanamičny kryzys stratehiju. Dy voś nia bačna, kab jana stała vostraj palityčnaj zbrojaj.
U apazycyjnym katle nibyta niešta i bulkoča. Ale kudy sychodzić para?
Partyjnyja lidery zbolšaha ŭščuvajuć nieśviadomaha Milinkieviča, jaki, by taja kotka ŭ Kiplinha, vyrašyŭ hulać sam pa sabie. (Ci zrabiŭ vyhlad, što tak vyrašyŭ...)
Nia budziem razdavać acenki, chto bolej maje racyi ŭ hetaj mižusobicy.
Pavodle ž sacyjalahičnych parametraŭ sytuacyja nastupnaja: apazycyjaner z rejtynham 11,4% kinuŭ vyklik hrupie apazycyjaneraŭ z rejtynhami ŭ miežach statystyčnaje pamyłki :)
(Kaho cikaviać doli adsotkaŭ, hladziecie tut.)
Cikava, što rejtynh Milinkieviča, upaŭšy za paŭhodu paśla vybaraŭ prykładna ŭdvaja, potym stabilizavaŭsia i apošnija miesiacy vyhladaje takim samym "teflonavym", jak i rejtynh Łukašenki (naftahazavaja vajna na jaho faktyčna nie paŭpłyvała).
Tak što peŭny elektaralny kapitał (napracavany, darečy, usioj kaalicyjaj) jašče nie paśpieli spuścić darešty. Pakul što...
Dla paraŭnańnia: kolišni adziny kandydat Hančaryk za hod paśla vybaraŭ-2001 pavodle rejtynhu spoŭz amal što da rysy statystyčnaje pamyłki. Bo rezka syšoŭ z dystancyi.
U palitycy, by na rovary: jak pierastaŭ krucić pedali, tak i lasnuŭsia.
Heta tyčycca, darečy, jak apazycyjnych, tak i kiroŭnych dziejačaŭ. Asabliva kali Kreml tak i pniecca tycnuć kij u koły.
