Urad Biełarusi ŭnios prapanovu ŭradu Rasii ab vydzialeńni stabilizacyjnaha kredytu našaj krainie na $1,5 młrd. Ab hetym paviedamili karespandentu BIEŁTA ŭ Ministerstvie finansaŭ Biełarusi.
U Minfinie rastłumačyli, što adpaviednaje rašeńnie było abumoŭlena nieabchodnaściu dadatkovaha finansavańnia vydatkaŭ biudžetu, vyklikanych pavyšeńniem cenaŭ na enerhanośbity.
«Liču, što takaja prośba maje prava na isnavańnie. My abmiarkoŭvali mahčymaść, što ŭ razie patreby ŭrad Rasiei hatovy razhledzieć taki varyjant», – tak prakamentavaŭ učora prośbu Biełarusi ministar ekanamičnaha raźvićcia Rasiei Hierman Href. Terminy i suma kredytu, zajaviŭ jon, buduć pradmietam pieramovaŭ.
Na pačatak 2007 hodu zamiežny dziaržaŭny doŭh Biełarusi skłaŭ 840 miljonaŭ dalaraŭ pry praduhledžanym biudžetam limicie 2 miljardy dalaraŭ.
Kredyt na $1,5 młrd byŭ by biesprecedentnym dla Biełarusi. Heta $155 na kožnaha žychara našaj krainy, ź niemaŭlatami ŭklučna, abo bolš za try sotni dalaraŭ na kožnaha pracazdolnaha biełarusa.
Prośba ab takim kredycie aznačaje, što ŭrad sutyknuŭsia ź niepieraadolnymi ciažkaściami z napaŭnieńniem biudžetu.
Varta adznačyć, što ceny na enerhanośbity pry hetym zastajucca dla Biełarusi najnižejšymi siarod krainaŭ rehijonu, ale majuć dalej raści nastupnyja hady. Uzamien za lhotnyja ceny na haz i naftu Biełaruś usie apošnija hady znachodziłasia ŭ vasalnaj zaležnaści ad Rasiei i pravodziła palityku rusifikacyi i kanfrantacyi z Zachadam.
Zvarot da Rasiei, jakuju ŭsie apošnija miesiacy biełaruskaja prapahanda abvinavačvała va ŭsich hrachach, aznačaje jašče j pravał sprobaŭ znajści kredytnyja resursy ŭ dastatkovym pamiery ŭ bankach Eŭropy j Kitaju.
Nia vyklučana, što ŭzamien za kredyt krainie pryjdziecca pajści na čarhovyja ekanamičnyja sastupki Rasiei. Nahadajem, što ŭzhadnieńnie źnižanych cenaŭ na naftu Maskva abumoviła sastupkami Biełarusi pa saraka inšych tavarnych pazycyjach. U vyniku ŭ ciažkim stanoviščy akazalisia biełaruskija cukravarni, brovary, miasapierapracoŭka, a samaje hałoŭnaje – biełaruskija tavary vyciskajucca rasiejskimi z roźničnaha handlu ŭ samoj Biełarusi. U doŭhaterminovaj perspektyvie heta moža akazacca dla biełaruskaj ekanomiki bolš zabojča za darahoŭlu paliva.
* * *
Čytajcie kamentary da temy ŭ rubrycy "Kamentary" našaha sajtu.