Palitolahi ŭ Maskvie vynieśli verdykt: Łukašenku nikoli nia stać prezydentam Rasiei. Apytańnie zrabiła ahiencyja "Novy rehijon".
Šturšok ža abmierkavańniu temy dało stvareńnie ŭ Rasiei "narodnaha ruchu ŭ pytańni vyłučeńnia Alaksandra Łukašenki ŭ prezydenty RF". Darečy, siońnia ruch aficyjna abvieściŭ ab pačatku dziejnaści.
Nu a naviedniki sajtu "NN" paśpieli ŭžo jak śled adkamentavać hetu kalarytnuju inicyjatyvu.
Ź inicyjatarami ŭsio zrazumieła. Ździŭlaje chiba stupień iracyjanalizmu.
Ja navat nie pra toje, što ŭ Łukašenki niama rasiejskaha hramadzianstva (i Pucin peŭna ž nie razhonicca davać :)
Henyja ludzi vidavočna vierać, što "baćka" jość ščyrym adeptam inkarparacyi dziela inkarparacyi, u imia "bratniaha jadnańnia".
Jany nia ŭbačyli prostaha faktu: mienavita kali paŭstała rubam pytańnie pra pahłynańnie (chočacie tannych enerhanośbitaŭ — zhadžajciesia na naš rubiel i h.d.), Łukašenka daŭ Kramlu adłup.
Matyvy pakiniem u baku.
Viadoma, jon sa smakam zhulaŭ by na rasiejskim poli pry peŭnych umovach. Ale picierskija chłopcy nie takija durni, kab kalidor davać. Tamu i apynułasia ŭ tupiku pytańnie pra "kanstytucyjny akt".
Cikava, ci žyviać novastvorany "narodny ruch" niejkija investycyi adsiul? Va ŭsiakim razie, atrymałasia kapitalnaja antyreklama. Daliboh, nu jość ža trochi tančejšyja palittechnalohii! A tut — takoj "šurpataj movaju plakata" :)
Darečy, naviedvańnie, jakim chvalicca sajt ruchu (try tysiačy za sutki) — dla rasiejskaha sehmentu sieciva vielmi ścipłaje. Dy i stupień "baćkavaj" papularnaści siarod rasiejcaŭ hipertrafujecca jahonym łobi dy biełaruskimi dziaržaŭnymi medyjami.
Kali ŭ Miensku i raźličvajuć niejak paŭpłyvać na palityčny landšaft uschodniaj susiedki, to chiba praz vybary ŭ Dumu. Ale i tut investycyi mohuć stacca marnymi. Bo ŭ chaŭruśnikach zbolšaha "čyrvonyja" dy nacyjanał-patryjoty. Jany ž adcisnutyja na marhines i beściać Kreml za zdradu.
Nu a Kreml usiu hetuju mituśniu nadta nie biare da hałavy, bo pieratvaryŭ vybary ŭ takuju samuju dekaracyju, jak i ŭ nas. Chiba što bolej hustoŭnuju — jak u Vialikim teatry, a nie ŭ kałhasnym klubie :)
Niadaŭna ŭ etery "Svabody" mnie daviałosia vieści dyjaloh, u pryvatnaści, z maskoŭskim palitolaham Andrejem Pijantkoŭskim. Dyk voś jon na pytańnie pra mahčymaje hučańnie biełaruskaj temy padčas ichnich elektaralnych kampanijaŭ skazaŭ jak adrezaŭ: biełaruskaja tema nijak hučać nia budzie, i nijak Łukašenka jaje nia vykarystaje.
"Bo ŭvohule nijakaj prezydenckaj kampanii nia budzie", — reziumavaŭ Pijantkoŭski.
Lahičnaja evalucyja "kiravanaj demakratyi".
Niezdarma ž ćvierdziła BT, što Kreml spakvala pierajmaje biełaruski palityčny dośvied :)
Voś i pieraniali. Tak, što ŭ Maskvie łavić niama čaho. Hłucha jak u tanku.
