Ministerstva ekanomiki Biełarusi raspracavała plan pryvatyzacyi najbujniejšych pradpryjemstvaŭ krainy, u ich lik uvachodzić «Naftan», Mazyrski NPZ, TAA «Palimir», «Biełšyna», «Hrodna Azot», Biełtelekam i tytuniovaja fabryka «Nioman». Taksama razhladajecca varyjant prodažu bujnych pakietaŭ akcyj «Krynicy» i «Mienskaha zavodu pienistych vinaŭ».
Aŭtary prahramy pryvatyzacyi prapanujuć pravieści ŭ 2007 hodzie konkursy pa prodažy bujnych biełaruskich pradpryjemstvaŭ. Pavodle źviestak hazety «Viedomosti», rasiejskija pradprymalniki ŭžo atrymali prapanovy pra pakupku niekatorych pradpryjemstvaŭ.
Pradstaŭnik Dziaržaŭnaha kamitetu pa majomaści Biełarusi Natalla Žarnasiek paviedamiła, što chacia prostyja prodažy pradpryjemstva biełaruskim zakanadaŭstvam nie praduhledžvajecca, «u vypadku pastupleńnia vyhadnych prapanovaŭ jany taksama buduć razhladacca».
Kiraŭnik Nacbanku Biełarusi Piatro Prakapovič paviedamiŭ taksama, što najbližejšym časam rychtujecca pakiet dakumentaŭ pa prodažy Biełźniešekanambanku.
Analityk «Trojki Dyjaloh» Valer Nieścieraŭ raskazaŭ u interviju hazecie, jakim budzie prykładny košt biełaruskich pradpryjemstvaŭ: dziaržpakiet akcyjaŭ (42,7%) Mazyrskaha NPZ moža pry spryjalnych umovach być pradadzieny za 800 miljonaŭ dalaraŭ, dziaržpakiet akcyjaŭ «Naftanu» (99,8%) — za 1,6 młrd dalaraŭ.
U toj ža čas, pavodle mierkavańnia analitykaŭ, prezydent Biełarusi nie pradaść całkam bujnyja pradpryjemstvy, jakija vykonvajuć sacyjalnuju funkcyju. Da ich adnosiacca MAZ, MTZ dy inšyja.
U ilustracyi vykarystany frahment nastolnaj hulni «Manapolija»
