«Naša Niva» – laŭreat premii imia Buceryjusa fundacyi «Zeit».
Sioleta z 48 kandydataŭ byli abranyja šeść. Akramia «Našaj Nivy», u lik pryzioraŭ trapili vydańni i žurnalisty z Rasiei i Azerbajdžanu.
D‑r Markus Baŭmans, siabra prezydyjumu fundacyi «Zeit», padkreślivaje: «My chočam razam z našymi kalehami z partnerskaha fondu ŭ Narvehii padbadzioryć žurnalistaŭ i ŭzmacnić niezaležnaje stvareńnie infarmacyi. Stanovišča ŚMI ŭ mnohich dziaržavach Uschodniaj Eŭropy niepakoić, uličvajučy toj fakt, što svaboda vykazvańniaŭ źjaŭlajecca pakazčykam palityčnaj kultury ŭ krainie. Žurnalisckaja praca tam časta mahčymaja tolki ŭ vyklučna ciažkich umovach».
Na atrymańnie premii «Naša Niva» była vyłučanaja nastupnymi arhanizacyjami: Narveski chelsynski kamitet, Narveski PEN-centar, Human Rights House Foundation, Rafto Human Rights House. Što cikava, nie ŭsie z hetych arhanizacyjaŭ nam navat viadomyja. Voś ža, viadomaść «Našaj Nivy» vychodzić za miežy viedy samoj hazety.
Siabrami mižnarodnaha žury źjaŭlajucca: Hru Cholm (Osła), Vibekie fon Šperlinh (Kapenhahien), Falk Bamsdorf (Maskva), Michael Tuman (Hamburh), Tea Somer (Hamburh) i Hans-Hieorh Vik (Berlin).
Premija budzie ŭručanaja 21 červienia ŭ Nobeleŭskim instytucie ŭ Osła.
❏
Premija fondu «Zeit» źjaŭlajecca štohadovaj uznaharodaj, što prysudžajecca žurnalistam i ŚMI z Rasiei, Biełarusi, Ukrainy, Hruzii i Paŭnočnaha Kaŭkazu, jakija ŭ svajoj pracy vystupajuć za svabodu słova i hramadzianskaj supolnaści. Premija zasnavanaja ŭ 2000 h. u honar jurysta, žurnalista i vydaŭca Hierda Buceryjusa. Z 2004 h. fond vydaje premiju supolna z narveskaj fundacyjaj «Fritt Ord» (Svabodnaje słova) (Osła).
