Znoŭ pieramohšy na łyžni, aficyjny kiraŭnik Biełarusi lacić u haračyja piaski arabijskaj ziamli. Najpierš, treba dumać, pa investycyi. Ale šejchaŭ ź ich saładžavymi ŭśmieškami razvarušyć niaprosta.
Emisary aficyjnaha Miensku daŭno pryhledzielisia da hetaha rajskaha kutka. U šejchaŭ hrošaj da chalery. Dyj palityčnyja noravy tut dalokija ad hniłoj demakratyi Zachadu. Čamu b nie pasiabravać?
U 1999 hodzie ŭ AAE dvojčy pabyvaŭ tahačasny ministar zamiežnych spraŭ Urał Łatypaŭ. Nieŭzabavie tam adkryłasia biełaruskaja ambasada. Ad taho času i pa siońnia — redki vypadak dla takoj ratacyjnaj pasady! — pradstaŭnictva ačolvaje Uładzimier Sulimski.
U Emiraty zavitvali Šejman, Martynaŭ, Navumaŭ, Malcaŭ, kiraŭnik Dziaržaŭnaha vajskova-pramysłovaha kamitetu Azamataŭ. Sioleta biełaruskuju pradukcyju adpaviednaha profilu pakazali na viadomaj vystavie ŭzbrajeńniaŭ "Ajdeks".
Tut kuplajuć našy kołavyja ciahačy, "MAZy", padšypniki... Upadabali i pradukcyju "Miłavicy" :)
Miensk razhladaje Emiraty jak patencyjny tramplin dla handlovaj ekspansii ŭ rehijon.
Zrešty, ličby dvuchbakovaha handlu pakul što nia ŭražvajuć. Letaś tavarazvarot skłaŭ tolki $26,1 młn. Handal idzie niaroŭna (u 2003-m, naprykład, było bolej — $38,2 młn.)
Nie vypadaje kazać, što tamtejšyja taŭstasumy nadta razahnalisia investavać u biełaruskuju ekanomiku.
Na dumku mienskaha palitolaha Andreja Fiodarava, tut moža adbivacca i ŭpłyŭ ZŠA. (Dziela daviedki: Emiraty — ichni stratehičny chaŭruśnik u rehijonie, tut mieściacca amerykanskija bazy. Ad Dubaju źniščalnik, kali što, za paŭhadziny dalacić da Iranu.)
Hałoŭnaje ž, badaj, toje, što ŭ emirackich bahaciejaŭ jość investycyjny vybar. Naŭrad ci biełaruskija ŭmovy vyhladajuć najlepšymi, miarkuje Andrej Fiodaraŭ.
Karaciej, finansavyja ŭkładańni — heta vam nia skački na Kubak Dubaju! Šejchi umiejuć praličvać ryzyki biznesu.
Davodzicca apelavać da pasiarednikaŭ, naprykład kiraŭnika kampanii "SB-Telekom" Ida Samavi — udałaha biznesoŭca arabskaha pachodžańnia, jaki daŭno pačuvajecca ŭ Abu-Dabi svaim čałaviekam.
Łukašenka pieršy raz naviedaŭ Emiraty ŭ sakaviku 2000-ha.
Voś tam sapraŭdy ździejśnili ekanamičny cud.
Ci daŭno anhielcy na marskich mapach paznačali hetyja miaściny jak Piracki bierah? Tubylcy kampensavali niahody žyćcia ŭ hołaj pustelni tym, što rabavali karabli z kaštoŭnymi hruzami.
Ciapier tam ziamny raj z chmaračosami, basejnami i navat svaimi Siličami :) — harnałyžnym kompleksam pad škłom!
I ŭsio heta pabudavana — nota bene! — biez anijakich demakratyčnych zavitušak.
Farmalna ŭ krainie abirajecca prezydent. Ale faktyčna heta spadčynnaja manarchija. Hałoŭnym emiratam Abu-Dabi ŭžo dva z pałovaj stahodździ kiruje kłan al-Nachajan. Ź jaho pachodzić i ciapierašni aficyjny lider krainy. Uvohule ž uładu dzielać miž saboj siem šejchaŭ — kiraŭnikoŭ emirataŭ (jany i ŭtvarajuć radu, što abiraje kiraŭnika krainy).
Palityčnyja partyi i prafsajuzy zabaronienyja. Federalny nacyjanalny schod nia maje navat zakanadaŭčaj inicyjatyvy i razhladaje tolki prajekty, prapanavanyja Radaj ministraŭ. Pryčym rašeńni parlamentu nia majuć jurydyčnaje mocy (!).
Praŭda, i tut musili trochi sastupić zachodnim prychamaciam.
Letaś u śniežni ŭpieršyniu prajšli častkovyja vybary ŭ parlament. Los 20 mandataŭ (astatnija raźmiarkoŭvajucca dyrektyŭna) vyznačała vuzkaje koła vybarščykaŭ (u svaju čarhu, pryznačanych šejchami:)
Karaciej, tryjumf demakratyi. A ŭžo ab pravoch čałavieka i kazać niama čaho.
Sami razumiejecie, tut prosta adpačyvaješ dušoj ad nadakučlivych maralite pana van der Lindena.
Vo kudy litaralna jak na kurort mohuć jeździć na abmien dośviedam našy parlamentary! A jakija perspektyvy supracy ŭ Ruchu niedałučeńnia!
Ale ž hałoŭny imperatyŭ, kaniešnie, hrošy.
Siońnia biełaruskaja ŭłada razharnuła ichni pošuk pa ŭsich azimutach.
Bo, adrozna ad Emirataŭ, stvaryć cud na nafcie nie pašenciła :(