Eŭropa padaje Miensku syhnały.
Chavijer Salana namiakaje, što stasunki mohuć być razmarožanyja.
Metar litoŭskaj palityki Brazaŭskas kaža, što moh by sustrecca z Łukašenkam, kali Brusel daść paŭnamoctvy.
Što heta — tryjumf prahmatyzmu ci iluzii idealizmu?
Kaniešnie, zajavy kštałtu Salanavych mohuć być vyklučna pijaraŭskimi. Tutejšamu načalstvu pakazvajuć morkaŭku.
Zrešty, mienski analityk Raman Jakaŭleŭski, ź jakim ja tolki što mieŭ havorku, nie vyklučaje, što Brusel vyjavić padvojnyja standarty.
— Mohuć uziać vierch, umoŭna kažučy, antyrasiejskija mierkavańni. To bok žadańnie supraćstajać enerhietyčnaj imperyi, — miarkuje Jakaŭleŭski.
Na jahonuju dumku, u vyniku Eŭraźviaz zdolny pajści na niejki "vyhadny dla režymu kampramis".
Sapraŭdy, pry žadańni možna pastavić aficyjnamu Miensku zalik ("praces pajšoŭ"), naprykład, za paru krokaŭ kštałtu viartańnia apalnych hazetaŭ u šapiki. Chacia nasamreč heta budzie tolki adnaŭleńniem status-kvo, a nijakaj nie liberalizacyjaj.
Ci voś padaduć jak sastupku zvyšhumannaj Eŭropie abmiežavańnie śmiarotnaha pakarańnia. Chacia, sami razumiejecie, symptomam palityčnaj adlihi heta možna nazvać tolki ź nievierahodnaj naciažkaj.
Dyj navat kali vypuściać daterminova pad markaj jakoj-niebudź amnistyi adnaho-dvuch palityčnych... Kaniešnie, daj boh choć heta! Adnak u vymiareńniach demakratyi i pravoŭ čałavieka takim čynam ničoha nia zrušycca.
Pytańnie ŭ tym, nakolki mocnaja ŭ Bruseli spakusa zadavolicca palijatyvam.
Darečy, letaś, jašče da vyłučeńnia 12 umovaŭ EZ i naftahazavaj vajny, mnie ŭžo davodziłasia abmaloŭvać jak vielmi imavierny dla aficyjnaha Miensku scenar zaciažnoj "šmatvektarnaj imitacyi".
Vyhladaje na toje, što našych apazycyjaneraŭ zaraz kłapocić mienavita takaja perspektyva.
Va ŭsiakim razie, Anatol Labiedźka refrenam ćvierdzić, kab eŭrapiejcy nie ŭchapilisia za jakuju niebudź butaforyju kštałtu pryznačeńnia ambudsmena. Dy choć zaŭtra pryznačać dekretam, kaža staršynia AHP. I dadaje: Kaściana...
Admietna, što i Milinkievič zaŭčora na sustrečy z emisarami Salany paŭščuvaŭ Brusel za brak rašučaści ŭ biełaruskim pytańni.
Tam sapraŭdy nie śpiašajucca puskać u chod peŭnyja vahary. Heta Vašynhton zaŭždy rviecca ŭ boj pad štandaram demakratyi (i časam naryvajecca). A ŭ maleńkaj Eŭropie ličać, što ŭžo navajavalisia.
Trochi śmiešna byvaje čytać asobnyja ŭltraapazycyjnyja sajty, kali jany namahajucca stvaryć uražańnie, što ŭvieś kantynent dzień i noč dumaje pra svabodu Biełarusi. Jak ni cynična, masie biurhieraŭ najpierš važna, kab spraŭna pampavalisia enerharesursy. Ad tranzytu praz dyktaturu jany ž, urešcie, nie psujucca!
Naturalna, i siarod eŭrapiejskich palitykaŭ jość roznyja padychody da biełaruskaha pytańnia. Ale ŭvohule hety voś "biurhierski" čyńnik adčuvalny.
Zrešty, što da byłoha litoŭskaha prezydenta, dyk jon, va ŭsiakim vypadku na słovach, vyjaŭlaje chutčej nia lišak prahmatyzmu, a lišak idealizmu.
Pra Brazaŭskasa, kolišniaha lidera kampartyi, jašče pry SSSR kazali, što jon najpierš litoviec, a potym užo kamunist. Hety mocny, aŭtarytetny dziejač, jak i mnohija pradstaŭniki savieckaj elity Litvy, arhanična ŭpisaŭsia ŭ realii novaj epochi. Jany biez škadavańnia raźvitalisia z "saŭkom". Jany napracavali maralny kapitał u baraćbie za niezaležnaść, eŭrapiejski vybar. I daviali svaju prafesijnuju prydatnaść va ŭmovach kankurentnaj palityki.
Ale Brazaŭskas sa svaimi sacyjał-demakratami, pry ŭsioj vysakarodnaści namieraŭ u biełaruskim pytańni, bajusia, pierabolšvajuć zdolnaść tutejšaha načalstva da padobnaj transfarmacyi :)
U kantekście razvahaŭ pra imaviernuju sustreču z Łukašenkam eks-prezydent Litvy zajaviŭ: "Ja i byłyja kiraŭniki susiednich ź Biełaruśsiu dziaržaŭ mahli b raspavieści ŭ Biełarusi, što takoje žyć va ŭmovach demakratyi, umovach svabodnaha rynku, kali isnuje volnaja presa dy apazycyja".
Admietna, što kali "Interfaks-Zachad" jašče padaŭ hety pasaž, to ŭradavaja ahiencyja, infarmujučy pra zajavu byłoha litoŭskaha kiraŭnika, ŭvohule abyšłasia biaz zhadak pra hniłyja zachodnija kaštoŭnaści.
Tak što nia varta ciešycca iluzijaj, nibyta tut daduć trybunu dla lekcyjaŭ pra demakratyju.
Uvohule ž tutejšaja kiroŭnaja elita jakraz dobra ŭśviedamlaje, čym dla jaje abierniecca pašyreńnie niepadkantrolnaha rynačnaha absiahu, mahčymaściaŭ niezaležnaj presy dy apazycyi. Tamu i dušyć.
