Byłyja deputaty Pałaty pradstaŭnikoŭ Valery Frałoŭ i Siarhiej Skrabiec 12 sakavika padali ŭ Mienharvykankam zajaŭku na praviadzieńnie šeścia ŭ honar Dnia jadnańnia narodaŭ Biełarusi i Rasiei 2 krasavika.
Nam zusim niezrazumiełaja, — skazaŭ Skrabiec, — taja vajna z Rasiejaj, jakuju abjaviła biełaruskaje kiraŭnictva. My suprać hetaj vajny. My źviazanyja z Rasiejaj histaryčna i palityčna. Pryčym, z našaha punkta hledžańnia, heta vajna zusim nia tyčycca enerhanośbitaŭ. Adnak realnaje abjadnańnie narodaŭ nichto nie admianiaŭ. U mianie maci naradziłasia ŭ Rasiei, babula — ukrainka, i takaja karcina nazirajecca ŭ mnohich biełaruskich siemjach. Tamu nas aburaje hetaja vajna ŭ etery biełaruskich telekanałaŭ. My hutaryli z moładździu, veteranami, ludźmi, jakija pracujuć u Rasiei, tymi, chto viadzie z rasiejcami sumiesny biznes — nichto nie razumieje takoj biełaruskaj palityki. Tamu my chočam padkreślić: nikudy ad Rasiei my nie padzieniemsia, i ź joju treba vystrojvać dobrasusiedzkija i sajuźnickija stasunki, a nie vajavać.
Abodva eks‑deputaty paprasili ŭ Mienharvykankamie dazvołu na šeście ad Pałacu Respubliki da parku imia Horkaha i śviatočny kancert u samim parku.
Raniej Mienharvykankam admoviŭ Skrabcu ŭ dazvole na akcyju salidarnaści ź niezakonna asudžanymi, zajaŭku na jakuju jon padavaŭ 16 sakavika.
«Pa jakoj pryčynie [admovili] — pakul nieviadoma, pakolki ŭ Mienharvykankamie mnie zajavili, što admovu jany vysłali poštaju. Ja jašče ničoha nie atrymaŭ, a pryčynu admovy vusna mnie nazvać admovilisia, — skazaŭ Skrabiec. — Heta aznačaje tolki toje, što ŭłady bajacca našaj salidarnaści i nie dazvalajuć praviadzieńnie mienavita takich mitynhaŭ navat na ŭskrainnaj płoščy Banhałor».
