Cełych 6 młrd dalaraŭ u najbližejšyja piać hod investujuć aŭtamabilnyja kancerny ŭ Polščy i inšych dziaržavach Centralnaj Eŭropy, — prahnazuje daradčaja firma «PriceWaterhouseCoopers».
Heta vialiki šaniec dla prafesijnych kadraŭ — pracoŭnych ruk užo ciapier nie chapaje na novych zavodach u Słavaččynie.
Halina aŭtamabilebudavańnia ŭ Centralnaj Eŭropie kvitnieje. Na praciahu 15 hadoŭ da 2006 h. suśvietnyja aŭtamabilnyja kancerny ŭžo investavali ŭ vytvorčaść aŭtamabilaŭ 20 młrd dalaraŭ, — aceńvaje «PriceWaterhouseCoopers» (PWC) u svaim novym dakładzie na temu aŭtamabilnaj vytvorčaści ŭ Centralnaj i Ŭschodniaj Eŭropie. Dziakujučy hetamu ŭdzieł hetych dziaržavaŭ u hlabalnym aŭtamabilebudavańni ŭzros da 6,8%. U najbližejšyja hady zachavajecca tendencyja pieravodu aŭtamabilnaj vytvorčaści z Zachadu ŭ Centralnuju Eŭropu. «Peugeot» zakryŭ zavod u Vialikabrytanii i pieranios zborku aŭtamabilaŭ u Słavaččynu. Novaja versija haradzkoj mašyny «Ka» ŭžo nia budzie bolej vyrablacca na zavodzie «Ford» u Hišpanii. Amerykanski kancern daručyć vytvorčaść zavodam «Fiat» u polskich Tychach. Na dumku «PWC», u najbližejšyja piać hadoŭ aŭtamabilnyja kancerny investujuć u vytvorčaść aŭtamabilaŭ u Centralnaj Eŭropie čarhovyja 3 młrd dalaraŭ i jašče stolki ž vydatkujuć ich kaaperanty. Dziakujučy hetamu ŭdzieł dziaržavaŭ Centralnaj Eŭropy ŭ hlabalnym aŭtamabilebudavańni padskočyć da 8%.
Kancerny vymušanyja pieranosić vytvorčaść z pryčyny ŭsio vyšejšych koštaŭ. U 15 dziaržavach staroha Eŭraźviazu z 1997 h. da pieršaj pałovy 2005 h. inflacyja skłała ŭ siarednim 16%, u toj čas jak cana novaj mašyny ŭzrasła tolki na 4%. Zaŭziataje spabornictva nie dazvalaje kancernam padymać košty na novyja aŭtamabili, u toj čas jak vydatki rastuć šalonymi tempami. U minułym hodzie, naprykład, cana tony stali dla vytvorčaści aŭtamabilnych kuzavaŭ padskočyła z 385—405 da 480—495 eŭra.
Bolš vysokija vydatki na materyjały možna kampensavać, pieranosiačy vytvorčaść u dziaržavy, dzie zarobki nižejšyja, čym na Zachadzie. Pavodle «Federacyi Eŭrapiejskich Pracadaŭcaŭ», zarobki ŭ Centralnaj Eŭropie składajuć z 16 da 34% zarobkaŭ pracaŭnikoŭ u Niamieččynie. Užo navat Hišpanija nie pryvablivaje nizkimi zarobkami — były dyrektar «VW» Bernd Pišetsryder kazaŭ niadaŭna, što zarobki na «Škoda» — českaj firmie «VW» — u dva razy nižejšyja, čym na «Seat», hišpanskaj firmie niamieckaha kancernu.
Adnak najbolšaj pieraškodaj dla raźvićcia aŭtamabilnaj vytvorčaści ŭ Centralnaj Eŭropie moža być niedachop kvalifikavanych pracaŭnikoŭ. Vialikaja kolkaść specyjalistaŭ źjaždžaje na Zachad, spakusiŭšysia na lepšyja zarobki. Ale taksama niestaje ludziej i na prostuju pracu. Heta adčuvajuć kancerny, što razhladali mahčymaść kapitałaŭkładańniaŭ u Polščy, adnak paśla vybrali Słavaččynu. «Pad słavackim zavodam karejskaha kancernu «Kia» ja bačyŭ 20 aŭtobusaŭ, jakija pryvoziać ludziej z haradoŭ, addalenych na 100 km», — raspaviadaŭ nam uražany menedžar adnaho z polskich aŭtamabilnych zavodaŭ. Pavodle ahiencyi «Reuters», u słavackija zavody «VW» fabryčnyja aŭtobusy taksama kožny dzień pryvoziać pracaŭnikoŭ, jakija žyvuć na adlehłaści bolš za 100 km. Pamiž investarami ŭ Słavaččynie ŭžo pačynajecca zarobkavaje spabornictva. U Polščy — jak my pačuli ad pradstaŭnikoŭ zavodaŭ «General Motors», «Fiat» i «FSO» — jašče niama prablemy deficytu pracaŭnikoŭ. Adnak zatoje prablemaj jość usio bolšy nacisk na padvyšeńnie.
